IPL: ચાલુ મેચમાં જ ખોવાઈ ગયો બોલ, બધા શોધવા લાગ્યા અને પછી....

બેંગલુરુમાં બુધવારે આરસીબી અને કિંગ્સ ઈલેવન પંજાબ વચ્ચે મેચ રમાયો હતો જેમાં એક રસપ્રદ ઘટના જોવા મળી હતી.

બેંગલુરુઃ બેંગલુરુમાં બુધવારે આરસીબી અને કિંગ્સ ઈલેવન પંજાબ વચ્ચે મેચ રમાયો હતો જેમાં એક રસપ્રદ ઘટના જોવા મળી હતી. આરસીબીની ઇનિંગની 14 ઓવર બાદ મેદાનમાંથી ચાલુ મેચે જ બોલ ગાયબ થઈ ગયો હતો. ત્યાર બાદ બધા એક બીજાને બોલ વિશે પૂછવા લાગ્યા, જોકે થોડી જ વારમાં અમ્પાયરના ગજવામાંથી બોલ મળી આવ્યો હતો. મેચમાં ટોસ હારીને આરસીબીએ 14 ઓવરમાં 4 વિકેટ ગુમાવીને 109 રન બનાવી લીધા હતા. ત્યાર બાદ સ્ટ્રેટેજિક ટાઈમ આઉટ લેવામાં આવ્યો. 2.30 મિનિટના સમય બાદ બન્ને ટીમના ખેલાડીઓ મેદાનમાં પરત ફર્યા. મેદાન પર 15મી ઓવર ફેકવા માટે અંકિત રાજપૂતને મોકલવામાં આવ્યા પરંતુ તેને બોલ ન મળ્યો. ત્યાર બાદ પંજાબના તમામ ખેલાડી એક બીજાને જોવા લાગ્યા અને પૂછવા લાગ્યા કે બોલ ક્યાં છે. ચાલુ મેચમાં જ બોલ ગાયબ થવાથી બધા હેરાન હતા. કેટલાક ખેલાડીઓ હસી રહ્યા હતા કે આખરે બોલ ક્યાં ખોવાઈ ગયો. પરિસ્થિતિને જોતા ફોર્થ અમ્પાયર એક બોલના બોક્સ સાથે મેદાન પર પહોંચી ગયા. ત્યારે મેદાન પર હાજર અમ્પાયરના ગજવામાંથી ગાયબ થયેલ બોલ નીકળ્યો. વાત એમ છે કે, મેદાન પર હાજર અમ્પાયર કેસી શમસુદ્દીને ટાઈમ આઉટ પહેલા બોલને પોતાના ગજવામાં રાખ્યો હતો અને 2.30 મિનિટ બાદ બધા પરત ફર્યા તો અમ્પાયર એ ભૂલી ગયા કે તેના ગજવામાં બોલ છે. મેદાન પર આ ઘટનાએ એક સમય માટે બધાને હેરાન કર્યા હતા કે આખરે બોલ ક્યાં ગાયબ થઈ ગયો.