ઇંગ્લેન્ડમાં એક સેન્ચુરી ફટકારતા જ રોહિત શર્મા બનાવશે આ મોટો રેકોર્ડ

ઇંગ્લેન્ડમાં સૌથી વધારે સદી ચાર બેટ્સમેનોએ ફટકારી છે જેમાં શિખર ધવન, વિવિયન રિચર્ડસ, રોહિત શર્મા અને કેન વિલિયમ્સન છે.

નવી દિલ્હીઃ ભારતીય ક્રિકેટ ટીમના ઓપનર બેટ્સમેન રોહિત શર્માએ વર્લ્ડકપ 2019ની શરૂઆત શાનદાર રીતે કરી છે. રોહિતે વર્લ્ડકપમાં પાંચ મેચમાં બે સેન્ચુરી અને એક હાફ સેન્ચુરી ફટકારી છે. ભારતની આગામી મેચ વેસ્ટઇન્ડીઝ સામે છે અને આ મેચમાં રોહિત શર્મા સેન્ચુરી ફટકારે તો તે ઇંગ્લેન્ડમાં એક શાનદાર રેકોર્ડ પોતાના નામે કરશે. ઇંગ્લેન્ડમાં સૌથી વધારે સદી ચાર બેટ્સમેનોએ ફટકારી છે જેમાં શિખર ધવન, વિવિયન રિચર્ડસ, રોહિત શર્મા અને કેન વિલિયમ્સન છે. આ બધાએ ઇંગ્લેન્ડમાં 4-4 સદી ફટકારી છે. જો રોહિત વધુ એક સદી ફટકારશે તો ઇંગ્લેન્ડમાં સૌથી વધારે સદી ફટકારનાર વિદેશી બેટ્સમેન બની જશે. ઇંગ્લેન્ડમાં રોહિત શર્માએ અત્યાર સુધી 19 મેચમાં 67.13ની એવરેજથી 1007 રન બનાવ્યા છે. ચાર સદી ફટકારનાર રોહિત શર્મા એવરેજના મામલે ફક્ત કેન વિલિયમ્સન કરતા પાછળ છે. વિલિયમ્સનની એવરેજ અહીં 79.20ની છે.