ટિમ કૂકે Apple ના CEO પદેથી આપ્યું રાજીનામું, લખી ભાવુક પોસ્ટ; જાણો કોણ હશે નવા સીઈઓ

ટિમ કૂક બોર્ડના એક્ઝિક્યુટિવ ચેરમેન તરીકે નવી ભૂમિકા ભજવશે, જ્યારે 1 સપ્ટેમ્બરથી જ્હોન ટર્નસ એપલના નવા ચીફ એક્ઝિક્યુટિવ ઓફિસર તરીકે કાર્યભાર સંભાળશે.

Tim Cook Steps Down As Apple CEO Emotional Farewell Message John Ternus

Source : Social Media

Show Quick Read

Key points generated by AI, verified by newsroom

• એપલના સીઈઓ ટીમ કૂકે 15 વર્ષ બાદ રાજીનામું આપ્યું.
• કૂકે એપલ વોચ, એરપોડ્સ, વિઝન પ્રો જેવા ઉત્પાદનો રજૂ કર્યા.
• ભારતમાં સ્ટોર્સ ખોલ્યા; કંપનીએ સ્વદેશી સિલિકોન ચિપ્સ અપનાવી.
• કૂક બોર્ડમાં એક્ઝિક્યુટિવ ચેરમેન; જ્હોન ટર્નસ નવા સીઈઓ.

Tim Cook steps down: વિશ્વની દિગ્ગજ ટેકનોલોજી કંપની એપલના ઇતિહાસમાં એક અધ્યાયનો આજે અંત આવ્યો છે. સીઈઓ ટિમ કૂકે એપલના સીઈઓ પદેથી રાજીનામું આપ્યું છે. છેલ્લા 15 વર્ષથી કંપનીનું સફળતાપૂર્વક નેતૃત્વ કરી રહેલા ટિમ કૂકે આજે ચીફ એક્ઝિક્યુટિવ ઓફિસર (સીઈઓ) તરીકેનો પોતાનો છેલ્લો દિવસ વિતાવ્યો હતો. પોતાના અંતિમ દિવસે તેઓ અત્યંત ભાવુક જોવા મળ્યા હતા અને તેમણે સોશિયલ મીડિયા પર કંપનીના કર્મચારીઓ, ગ્રાહકો અને સમગ્ર એપલ સમુદાય માટે એક હૃદયસ્પર્શી સંદેશ પણ શેર કર્યો હતો. તેમણે આભાર વ્યક્ત કરતા જણાવ્યું હતું કે, "આવતીકાલે મારું પદ ચોક્કસ બદલાશે, પરંતુ એપલ સમુદાય પ્રત્યેનો મારો પ્રેમ ક્યારેય નહીં બદલાય. તમે બધા મારા માટે પ્રેરણાનો સતત સ્ત્રોત રહ્યા છો અને તે બદલ મારી કૃતજ્ઞતા અનંત છે."

ઓગસ્ટ 2011 માં એપલના સહ-સ્થાપક સ્ટીવ જોબ્સના સ્થાને સીઈઓ તરીકેનો કાર્યભાર સંભાળનાર ટિમ કૂકે કંપનીને નવી ઊંચાઈઓ પર પહોંચાડી છે. તેમના 15 વર્ષના રેકોર્ડબ્રેક અને ઐતિહાસિક કાર્યકાળ દરમિયાન કંપનીએ 2015 માં એપલ વોચ, 2016 માં એરપોડ્સ અને 2024 માં વિઝન પ્રો હેડસેટ જેવા ક્રાંતિકારી ઉત્પાદનો બજારમાં મૂક્યા હતા. આ ઉપરાંત, આઇફોન, આઈપેડ અને મેક કમ્પ્યુટર્સની સિરીઝનો પણ મોટો વિસ્તાર થયો હતો. કૂકના શાસનકાળમાં સૌથી મોટો બદલાવ એ હતો કે એપલે ઇન્ટેલ પ્રોસેસર્સને બદલે પોતાની સ્વદેશી એપલ સિલિકોન ચિપ્સનો ઉપયોગ શરૂ કર્યો, જેનાથી કમ્પ્યુટર્સના હાર્ડવેર અને સોફ્ટવેર પર કંપનીનું નિયંત્રણ વધુ મજબૂત બન્યું હતું.

ભારત જેવા વિશાળ બજારમાં પણ ટિમ કૂકે વિશેષ ધ્યાન કેન્દ્રિત કર્યું હતું. તેમના નેતૃત્વમાં કંપનીએ 2023 માં મુંબઈ અને દિલ્હી ખાતે ભારતમાં પોતાના પ્રથમ બે સત્તાવાર રિટેલ સ્ટોર્સની શરૂઆત કરી હતી અને વ્યવસાય મોડલમાં સેવાઓનો ફાળો નોંધપાત્ર રીતે વધાર્યો હતો.

સીઈઓ પદ પરથી રાજીનામું આપ્યા બાદ ટિમ કૂક હવે એપલના બોર્ડમાં એક્ઝિક્યુટિવ ચેરમેન તરીકે નવી ભૂમિકા ભજવશે. આ નવી જવાબદારી અંતર્ગત તેઓ અમેરિકા અને ચીન સહિત વિશ્વભરની સરકારો સાથે કંપની વતી કામ કરશે. જ્યારે 1 સપ્ટેમ્બરથી જ્હોન ટર્નસ એપલના નવા સીઈઓ તરીકેનો સત્તાવાર કાર્યભાર સંભાળી લેશે. અગાઉ એપ્રિલ મહિનામાં જ એપલના બોર્ડ દ્વારા લાંબા સમયથી આયોજિત આ નેતૃત્વ સંક્રમણને મંજૂરી આપી દેવામાં આવી હતી.

Apple CEO Tim Cook, in a post on his last day as CEO, says, "My title changes tomorrow, but the love I have for the Apple community never will. Thank you for being a constant source of inspiration. My gratitude is endless, and I’m excited for the next chapter." pic.twitter.com/EHVajyGX6U

— ANI (@ANI) August 31, 2026

ટિમ કૂકે પોતાના અંતિમ ઈમેલમાં કર્મચારીઓને સંબોધતા લખ્યું હતું કે, "જેમ તમે જાણો છો, હું એપલ છોડી રહ્યો નથી, પરંતુ હું એવી ભૂમિકાથી દૂર થઈ રહ્યો છું જેને મેં ખૂબ પ્રેમ કર્યો છે. હું આ કાર્યને એવી રીતે યાદ કરીશ જેની હું માત્ર કલ્પના જ કરી શકું છું. જ્હોન ટર્નસના નેતૃત્વમાં મને સંપૂર્ણ વિશ્વાસ છે. બહુ ઓછા લોકો સમજે છે કે દુનિયા બદલી નાખે તેવા ઉત્પાદનો બનાવવા માટે શું જરૂરી છે અને જ્હોન તેમાં માહેર છે." અંતમાં તેમણે એપલની અનોખી સંસ્કૃતિના વખાણ કરતા કહ્યું હતું કે, "અમે એક એવી માન્યતા શેર કરીએ છીએ કે આપણી પાસે દુનિયાને વધુ સારી બનાવીને છોડી દેવાની તક અને જવાબદારી બંને છે. આપણી સફળતાનું રહસ્ય એ જ છે કે આપણે એકબીજામાં શ્રેષ્ઠતા બહાર લાવીએ છીએ અને એકબીજાને ઊંચા કરીએ છીએ."