WhatsAppમાં આવ્યું નવું ફિચર, હવે નવા ગૃપ મેમ્બર્સ પણ વાંચી શકશે જુની ચેટ્સ પરંતુ સેટ છે લિમીટ

WhatsApp: વૉટ્સએપે તેના ઓફિશિયલ બ્લોગ પર આ ફીચરની પુષ્ટિ કરી છે. વોટ્સએપે ગ્રુપ યુઝર્સ માટે આ ફીચર રોલઆઉટ કર્યું છે

(તસવીર- એબીપી લાઇવ)

Source : એબીપી અસ્મિતા

WhatsApp: વૉટ્સએપ તેના લાખો યુઝર્સ માટે વધુ એક અદભૂત ફિચર રજૂ કર્યું છે, જે તેમની લાંબા સમયથી ચાલી આવતી સમસ્યાનું નિરાકરણ લાવશે. આ ફિચર તાજેતરમાં એન્ડ્રોઇડ અને iOS બીટા વર્ઝનમાં જોવા મળ્યું હતું. હવે, વૉટ્સએપે આ ફિચર રજૂ કર્યું છે. નજીકના ભવિષ્યમાં બધા યુઝર્સને વોટ્સએપમાં આ નવી ગ્રુપ મેસેજ હિસ્ટ્રી ફિચર મળવાનું શરૂ થશે.

વૉટ્સએપઃ નવું ગ્રુપ મેસેજ હિસ્ટ્રી ફિચર શું છે? 
વૉટ્સએપે તેના ઓફિશિયલ બ્લોગ પર આ ફીચરની પુષ્ટિ કરી છે. વોટ્સએપે ગ્રુપ યુઝર્સ માટે આ ફીચર રોલઆઉટ કર્યું છે. હાલમાં, જ્યારે કોઈ નવો યુઝર વૉટ્સએપ ગ્રુપમાં જોડાય છે, ત્યારે તેઓ ગ્રુપના પહેલાના મેસેજ જોઈ શકતા નથી. આ નવી ફિચરની શરૂઆત સાથે, ગ્રુપના નવા સભ્યો હવે જૂની ચેટ્સ જોઈ શકશે. જોકે, આ માટે એક મર્યાદા નક્કી કરવામાં આવી છે.

બ્લોગ પોસ્ટ મુજબ, વૉટ્સએપ ગ્રુપ માટે આ ફિચર એન્ડ્રોઇડ અને આઇફોન બંને યુઝર્સ માટે રોલઆઉટ કરવામાં આવ્યું છે. જ્યારે પણ કોઈ નવો સભ્ય ગ્રુપમાં જોડાય છે, ત્યારે તેઓ વધુમાં વધુ 100 જૂના મેસેજ જોશે. જોકે, તે ગ્રુપ એડમિન પર નિર્ભર રહેશે કે તેઓ નવા સભ્યોને 25, 50, 75 કે 100 જૂના મેસેજની એક્સેસ આપશે કે નહીં. આ ફીચર આવ્યા પછી, નવા યુઝર્સને ગ્રુપના જૂના મહત્વપૂર્ણ મેસેજની પણ એક્સેસ મળશે. આ ઉપરાંત, ગ્રુપમાં નવા યુઝરને ઉમેરનાર સભ્યનું નામ પણ ફ્લેશ થશે.

વૉટ્સએપઃ એડમિન પાસે ખાસ પાવર 
WhatsApp એ તેના બ્લોગમાં સમજાવ્યું છે કે WhatsApp ગ્રુપના નવા સભ્યને જૂના મેસેજોની ઍક્સેસ આપવી તે સંપૂર્ણપણે ગ્રુપ એડમિનિસ્ટ્રેટર પર નિર્ભર છે. જો એડમિનિસ્ટ્રેટર ઈચ્છે, તો તેઓ આ સુવિધાને અક્ષમ પણ કરી શકે છે. આ સુવિધાને પારદર્શક બનાવવા માટે, જ્યારે પણ એડમિનિસ્ટ્રેટર નવા સભ્ય સાથે જૂના સંદેશ ઇતિહાસ શેર કરશે, ત્યારે ગ્રુપના બધા સભ્યોને એક સૂચના મોકલવામાં આવશે, જેમાં તેમને જણાવવામાં આવશે કે નવા સભ્યને તેમની જૂની વાતચીતોની ઍક્સેસ છે.

વૉટ્સએપે જણાવ્યું હતું કે આ સુવિધા તબક્કાવાર રીતે શરૂ કરવામાં આવી રહી છે. જે વપરાશકર્તાઓને હજુ સુધી આ સુવિધા મળી નથી તેમણે ગૂગલ પ્લે સ્ટોર અથવા એપલ એપ સ્ટોર પરથી તેમની એપ્લિકેશનને નવીનતમ સંસ્કરણ પર અપડેટ કરવી જોઈએ. ત્યારબાદ તેમને આ સુવિધા મળવાનું શરૂ થશે.