ભારતના આ રાજ્યમાં 16 વર્ષથી ઓછી ઉંમરના બાળકો સોશિયલ મીડિયાને નહી કરી શકે ઉપયોગ, જાણો શું છે સરકારનો પ્લાન?

આ સમિતિ ભારતીય કાયદાઓ તેમજ વિદેશમાં બાળકો પર લાગુ થતી નીતિઓનો અભ્યાસ કરી રહી છે.

પ્રતિકાત્મક તસવીર

ઓસ્ટ્રેલિયા બાદ ભારતના આંધ્રપ્રદેશમાં હવે બાળકો માટે સોશિયલ મીડિયા પ્લેટફોર્મ પર પ્રતિબંધ મૂકવાની તૈયારી ચાલી રહી છે.  અહેવાલો અનુસાર, આંધ્રપ્રદેશ 16 વર્ષથી ઓછી ઉંમરના બાળકો માટે ફેસબુક, એક્સ, ઇન્સ્ટાગ્રામ, સ્નેપચેટ અને અન્ય સોશિયલ મીડિયા પ્લેટફોર્મ પર પ્રતિબંધ મૂકનાર પ્રથમ રાજ્ય બની શકે છે. આ પગલું ભરવા માટે, સરકારે 16 વર્ષથી ઓછી ઉંમરના બાળકો માટે સોશિયલ મીડિયાનું નિયમન કરવા માટે મંત્રીઓના જૂથ (GoM)ની રચના કરી છે. આ જૂથની અધ્યક્ષતા માહિતી અને શિક્ષણ મંત્રી નારા લોકેશ કરે છે. એનડીટીવીના રિપોર્ટ અનુસાર, આ જૂથનો મુખ્ય ઉદ્દેશ્ય સોશિયલ મીડિયાને નિયંત્રિત કરતા હાલના કાયદાઓની સમીક્ષા કરવાનો અને મહિલાઓ અને બાળકો વિરુદ્ધ ખોટી માહિતી, નકલી સમાચાર અને વાંધાજનક સામગ્રીના ફેલાવાને રોકવા માટે રાજ્ય સ્તરે નિયમો વિકસાવવાનો છે.

આ સમિતિ ભારતીય કાયદાઓ તેમજ વિદેશમાં બાળકો પર લાગુ થતી નીતિઓનો અભ્યાસ કરી રહી છે. હાલમાં સમિતિ ઓસ્ટ્રેલિયાની જેમ 16 વર્ષથી ઓછી ઉંમરના બાળકો માટે સોશિયલ મીડિયા પ્રતિબંધ લાગુ કરવાનું વિચારી રહી છે.

માહિતી અને શિક્ષણ મંત્રી નારા લોકેશે જણાવ્યું હતું કે બાળકોની ઉંમર ઓનલાઈન કન્ટેન્ટને સમજવા અને યોગ્ય નિર્ણયો લેવા માટે યોગ્ય નથી. તેથી તેમને ડિજિટલ પ્લેટફોર્મથી બચાવવા ખૂબ જ મહત્વપૂર્ણ છે. જોકે, એ નોંધવું મહત્વપૂર્ણ છે કે કેન્દ્ર સરકાર પાસે મુખ્યત્વે સોશિયલ મીડિયાને નિયંત્રિત કરવાનો અધિકાર છે. આંધ્ર પ્રદેશ સરકાર રાજ્ય સ્તરે એક ખાસ કાયદો લાવવાનું વિચારી રહી છે. આ જૂથમાં ગૃહમંત્રી વાંગલાપુડી અનિતા, આરોગ્ય મંત્રી સત્ય કુમાર યાદવ અને માહિતી અને જનસંપર્ક મંત્રી નારા લોકેશનો સમાવેશ થાય છે.

ગૃહમંત્રી વાંગલાપુડી અનિતાએ જણાવ્યું હતું કે બાળ દુર્વ્યવહાર અથવા તેમના હિત વિરુદ્ધ ઉલ્લંઘનના કેસોનું ધીમે ધીમે વિશ્લેષણ કરવામાં આવી રહ્યું છે. વધુમાં એક NGOને પણ 16 વર્ષથી ઓછી ઉંમરના બાળકોમાં માનસિક અને વર્તણૂકીય ફેરફારોનો અભ્યાસ કરવા માટે સામેલ કરવામાં આવી છે. આ જૂથ ટૂંક સમયમાં માર્ગદર્શિકાનો મુસદ્દો તૈયાર કરશે, જે કેન્દ્ર સરકાર સાથે શેર કરવામાં આવશે. જો જરૂરી હોય તો આંધ્ર પ્રદેશ સરકાર રાજ્ય સ્તરે સોશિયલ મીડિયાને નિયંત્રિત કરવા માટે એક ખાસ કાયદો પણ ઘડી શકે છે.

આ પગલું સ્પષ્ટ કરે છે કે આંધ્ર પ્રદેશ ડિજિટલ પ્લેટફોર્મ પર બાળકોના રક્ષણ માટે ગંભીર પગલાં લેવા જઈ રહ્યું છે અને ભારતમાં બાળકો માટે સોશિયલ મીડિયા નિયંત્રણના ક્ષેત્રમાં આ પહેલો મહત્વપૂર્ણ પ્રયાસ સાબિત થઈ શકે છે.