Gujarat Rain Forecast: ગુજરાતમાં 4 વરસાદી સિસ્ટમ સક્રિય, 7 દિવસ ગાજવીજ સાથે ભારે વરસાદની આગાહી

આગામી 7 દિવસ રાજ્યમાં વરસશે વરસાદ- આ આગાહી કરી છે હવામાન વિભાગે. હવામાન વિભાગ અનુસાર શિયર ઝોન, મોંનસુન ટ્રફ, સાકલોનીક સર્ક્યુલેશન, વેલ માર્ક લો પ્રેશર સક્રિય હોવાથી રાજ્યના કેટલાક વિસ્તારોમાં છુટા છવાયા સ્થળોએ વરસાદ વરસશે. આજે વાવ થરાદ, બનાસકાંઠા સાબરકાંઠા મહેસાણા મહિસાગર, દાહોદ, છોટા ઉદેપુર, તાપી ડાંગ નવસારી વલસાડ દમણ દાદરા નગર હવેલીના  છુટા છવાયા સ્થળે ભારે વરસાદની આગાહી છે. તો આવતી કાલે 16 ઑગસ્ટે રાજ્યના નવસારી,વલસાડ, તાપી,ડાંગ ,સંઘપ્રદેશ દમણ ,દાદરા અને નગર હવેલીમાં ભારે વરસાદનું યલો એલર્ટ આપવામાં આવ્યું.

ચાલુ સિઝનમાં 15 ઓગસ્ટ સુધીમાં રાજ્યમાં કુલ સરેરાશ 26.43 ઇંચ વરસાદ નોંધાઈ ચૂક્યો છે. ઝોન વાઇસ જોઈએ તો દક્ષિણ ગુજરાતમાં સિઝનનો 100% આંકડો વટાવીને સૌથી વધુ 61.12 ઇંચ અને પૂર્વ-મધ્ય ગુજરાતમાં 23.73 ઇંચ વરસાદ વરસી ચૂક્યો છે. જ્યારે ઉત્તર ગુજરાતમાં 16.09 ઇંચ, સૌરાષ્ટ્રમાં 16.64 ઇંચ અને કચ્છમાં 5.73 ઇંચ વરસાદ નોંધાયો છે.