દ્વારકાના રૂપેણ બંદર પર પોલીસ અને ટોળા વચ્ચે ઝપાઝપી, પોલીસે કર્યું હવામાં ફાયરિંગ

દ્વારકાના રૂપેણ બંદરમાં ક્રાંતિવીર મુળુભા માણેકની પુણ્યતિથિ પર બાઈક રેલી યોજાઈ હતી. આ જ બાઈક રેલી દરમિયાન હાઈવે પર રસ્તો રોકતા લોકોને પોલીસે સમજાવવાનો પ્રયાસ કરતા મામલો બિચક્યો હતો. ઉશ્કેરાયેલા લોકોના ટોળાએ પોલીસ પર પથ્થરમારો કર્યો. એટલુ જ નહીં પોલીસ ચોકીમાં પણ ભારે તોડફોડ કરી. વિરોધ કરતુ લોકોનું ટોળુ એટલી હદે હિંસક બન્યું કે પોલીસકર્મીઓ સાથે જ ઝપાઝપી કરી દીધી. જેમાં કેટલાક પોલીસ કર્મચારીઓ પણ ઈજાગ્રસ્ત થયા. સ્થિતિ એટલી હદે વણસી ગઈ કે ટોળાને કાબૂમાં લેવા માટે હાજર પોલીસકર્મીએ હવામાં પાંચ રાઉન્ડ ફાયરિંગ કરવાની ફરજ પડી. પોલીસકર્મીએ પાંચ રાઉન્ડ ફાયરિંગ કરીને ટોળાને વિખેરવાનો પ્રયાસ કર્યો. તો સામે ધારાસભ્ય પબુભા માણેકે પણ પોલીસને નિયમ મુજબ કામગીરી કરવાની ચેતવણી આપી દીધી. ઘર્ષણની આ જ ઘટનામાં દ્વારકા પોલીસે અશ્વીન વાઘા, કાના વાઘા, દેવુ કેર, અજય મકવાણા, રવિ માણેક, અર્જૂન માણેક અને કનૈયાભા માણેક વિરૂદ્ધ નામજોગ  અને અન્ય અજાણ્યા શખ્સો સહિત ટોળા વિરૂદ્ધ રાયોટિંગની સહિતની કલમો હેઠળ ફરિયાદ નોંધી વધુ તપાસ હાથ ધરી હતી.