રાજકોટ: ધોરાજીમાં ખાણ ખનીજ કૌભાંડ, સ્થાનિક પોલીસની શંકાસ્પદ ભૂમિકા, જુઓ વીડિયો

ખનીજચોરો ચોરી ઉપરાંત નકલી હુકમ બનાવવા જેવી છેતરપિંડી પણ કેટલી હદ સુધી આચરી શકે છે તેનો કિસ્સો ધોરાજીમાંથી બહાર આવ્યો છે.  જેમાં ચોરી કરેલા ખનીજની ટ્રક છોડાવવા માટે ભૂસ્તરશાસ્ત્રીના નકલી સહી-સિક્કા કરી પોલીસ સ્ટેશનમાંથી વાહન છોડાવવાનું કૌભાંડ બહાર આવ્યું છે. ધોરાજી-ઉપલેટા રોડ પરથી 24 ફેબ્રુઆરીએ બે ટ્રક પકડી હતી જેમાં એક ટ્રક વિજય નાનજી બોરીચા અને બીજી ટ્રક દિનેશ થોભણ બાંભવાની હતી. આ બંને ટ્રકને પકડીને ધોરાજી પોલીસ સ્ટેશન સોંપવામાં આવી હતી. બાદમાં અનુક્રમે 5 માર્ચે 101384 અને 31 માર્ચ 96388 રૂપિયાના દંડનો હુકમ કર્યો હતો. 

આ સમય બાદ ખાણ ખનીજ વિભાગના ભૂસ્તરશાસ્ત્રી જે. એચ. વાઢેરે રિવ્યૂ બેઠક બોલાવી હતી અને જેટલામાં દંડનો હુકમ કરવા છતાં ભરપાઈ ન થઈ હોય તેવા કિસ્સામાં પોલીસ ફરિયાદ કરવાનો હુકમ કર્યો હતો. આ પૈકી ધોરાજીની ઉપરોક્ત બંને ટ્રકમાં ફરિયાદ કરવા માટે ધોરાજી પોલીસ સ્ટેશનનો સંપર્ક કરાતા આ બંને ટ્રક કચેરીના હુકમના આધારે છોડાવી ગયાનો જવાબ મળ્યો હતો. જેથી ભૂસ્તરશાસ્ત્રીએ મુક્તિ હુકમ મગાવ્યા હતા.  જે 25 અને 28 ફેબ્રુઆરીના હતા એટલે કે ટ્રક પકડી બાદ તુરંત જ દંડની કાર્યવાહી અને ભરપાઈ ઉપરાંત મુક્તિ હુકમ બની ગયો હતો પણ તેમણે સહી જોતા પોતાની નહિ પણ નકલી હોવાનું સ્પષ્ટ જણાયું હતું. તેથી 18મીએ સાંજે જ હુકમના જાવક નંબરની ખરાઈ કરાતા તે પણ ખોટા નીકળતા પોલીસ ઈન્સ્પેક્ટરને જાણ કરી હતી અને તાત્કાલિક છેતરપિંડીની ફરિયાદ નોંધાવી હતી.