South Gujarat Rain : દક્ષિણ ગુજરાતમાં વરસાદની ધમાકેદાર એન્ટ્રી, ક્યાં કેટલો ખાબક્યો વરસાદ?

વલસાડ જિલ્લામાં મન મુકીને વરસ્યા મેઘરાજા. વલસાડ શહેરના તિથલ રોડ, હાલર રોડ, સ્ટેશન રોડ, આઝાદ ચોક, ભાગડાવાડા, કોસંબા સહિતના વિસ્તારોમાં ધોધમાર વરસાદ વરસ્યો.. તો ગ્રામ્ય વિસ્તાર એવા તિથલ સેગવી, કોસંબા, મગોધ,ડુંગરી સહિતના ગ્રામ્ય વિસ્તારોમાં પણ મેઘરાજા મહેરબાન થયા. કાળા ડિબાંગ વાદળો વચ્ચે વહેલી સવારથી વરસી રહેલા વરસાદથી અલગ અલગ વિસ્તારોમાં રસ્તા પર પાણી ભરાયા.. તો લોકો પણ રેઈનકોટ અને છત્રીનો સહારો લેતા જોવા મળ્યા. દિવસ દરમિયાન કોઈ વિસ્તારમાં પવન સાથે ધોધમાર વરસાદ વરસ્યો.. તો કોઈ વિસ્તારમાં ધીમીધારે વરસાદ વરસી રહ્યો છે. 

લાંબા વિરામ બાદ તાપી જિલ્લામાં પણ મેઘરાજાનું થયું આગમન.. વ્યારા શહેર સહિત આસપાસના વિસ્તારો અને વાલોડ તાલુકામાં વરસાદ વરસતા સમગ્ર પંથકમાં ખુશીની લહેર જોવા મળી.. વ્યારાના મુખ્ય વિસ્તારો જેવા સ્ટેશન રોડ, મિશનનાકા અને જનકનાકા સહિતના વિસ્તારોમાં ધીમીધારે વરસાદ વરસ્યો.. ન માત્ર વ્યારા, સોનગઢ અને વાલોડ તાલુકામાં પણ વરસાદી માહોલ જામ્યો.. વાલોડ ગામની હાઈસ્કૂલ નજીક સહિતના અલગ અલગ વિસ્તારોમાં વરસાદ વરસતા સ્થાનિકોમાં આનંદ જોવા મળ્યો.. ખેતી પર નિર્ભર આ જિલ્લામાં લાંબા વિરામ બાદ આજે વરસેલા વરસાદે ખેડૂતોના ચહેરા પર સ્મિત લાવી દીધુ.. 

નવસારી જિલ્લાનું પણ બદલાયું વાતાવરણ.. વરસાદને લીધે લાંબા સમયથી ગરમી અને બફારાથી પરેશાન લોકોને આંશિક રાહત મળી.. ચીખલી ટાઉન, થાલા સહિતના અન્ય ગ્રામ્ય પંથકમાં પવનના સુસવાટા સાથે વરસાદી ઝાપટા વરસ્યા.. લાંબા સમય બાદ વરસાદનું આગમન થતા ધરતીપુત્રોમાં પણ ખુશીની લહેર જોવા મળી.. ચીખલી તાલુકામાં અડધા ઈંચ સુધીનો વરસાદ વરસી ચૂક્યો છે.. જો કે સામાન્ય વરસેલા વરસાદથી નેશનલ હાઈવે નજીક સર્વિસ રોડ પર વરસાદી પાણી ભરાતા વાહન ચાલકો પણ હાલાકી ભોગવતા જોવા મળ્યા..