ગુજરાતમાં લોકોના 500 કરોડના ચાઉં કરી જનારા મહાકૌભાંડી અભય ગાંધીને દોઢ વર્ષની કેદ

શેરબજારમાથી પોતાની કારકિર્દીની શરૂઆત કરનાર અભય શ્રેણિક ગાંધીએ એઆઈએસઈ પ્રાઈવેટ કેપિટલ કંપની ખોલીને અભય અને તેના ભાઇ પારસ ગાંધીએ સંખ્યાબંધ લોકો પાસેથી એક કા તીન કરવાની લાલચ આપી કરોડો રૂપિયા ખંખેરી લીધા હતા. લોકોના રૂપિયે અભય ગાંધી બીએમડબલ્યુ ગાડીમાં ફરવા લાગ્યો હતો.

પોતે રોકેલાં નાણાં એક વરસમાં ત્રણ ગણાં થઈ જાય તેવી લાલચે અભયની કંપનીમાં અબ્દુલ રહીમ વલીઉદ્દીન દેસાઇએ ૧.૬૦ કરોડ રૂપિયાનું રોકાણ કર્યું હતું. તેમને ફરિયાદ નહીં કરવા માટે અભય ગાંધીએ સમાધાન પેટે 1.60 કરોડ રૂપિયાના ત્રણ ચેક આપ્યા હતા જે બાઉન્સ થતાં કોર્ટે અભયને સજા ફરમાવી છે.

અભય ગાંધીએ આપેલા ચેક બાઉન્સ થતા અબ્દુલ રહીમે તેમના વકીલ એસ.એમ.કાજી મારફતે સીબીઆઇ સ્પેશિયલ નેગોશિયેબલ કોર્ટમાં ફરિયાદ કરી હતી. બીજી તરફ સમય આવ્યે રોકાણકારોને રૂપિયા પરત નહીં મળતાં સેટેલાઇટ પોલીસ સ્ટેશન તથા ક્રાઇમ બ્રાંચમાં અભય ગાંધી વિરુદ્ધ છેતરપિંડીની ફરિયાદ દાખલ થઇ હતી.

અભયની કંપનીમાં રોકાણ કરનારા અબ્દુલ રહીમને રૂપિયા નહીં મળતાં તેણે અભય વિરુદ્ધમાં ફરિયાદ દાખલ કરવા માટે તજવીજ શરૂ કરી હતી. જોકે અબ્દુલ રહીમ ફરિયાદ ના કરે તે માટે અભય ગાંધીએ તેમની સાથે સમાધાન કરી લીધુ હતું અને 1.60 કરોડ રૂપિયાના ત્રણ ચેક આપ્યા હતા.

ધરપકડથી બચવા માટે અભય વિદેશ ફરાર થઇ ગયો હતો. થોડાક સમય બાદ અભય વિદેશથી પરત આવતાં ક્રાઇમ બ્રાંચે તેની ધરપકડ કરી હતી. નેગોશિયેબલ કોર્ટના મેજિસ્ટ્રેટે બન્ને પક્ષે દલીલો સાંભળતાં અભય ગાંધીને 1.60 કરોડ રૂપિયાના ચેક રિટર્ન કેસમાં દોઢ વર્ષની સજા ફરમાવી છે.

કોર્ટે ભોગ બનનાર અબ્દુલ રહીમને ચેકની રકમ વળતર તરીકે એક મહિનામાં ચૂકવવા માટેનો આદેશ કર્યો છે. 500 કરોડ કરતાં વધુનું કૌભાંડ આચરનાર અભય પાસે કોર્ટમાં ભરવા માટેના 30 હજાર રૂપિયા નહીં હોવાની રજુઆત અભયે કોર્ટ સમક્ષ કરી છે. કોર્ટે સજા સંભળાવ્યા બાદ અભય ગાંધીને જામીન પર મુક્ત કર્યો હતો.

અમદાવાદઃ લોકોને એક કા તીન કરવાની લાલચ આપીને 2011માં 500 કરોડ રૂપિયા કરતાં વધુનું કૌભાંડ આચરીને ખળભળાટ મચાવનાર મહાઠગ અભય ગાંધીને સીબીઆઇ સ્પેશિયલ નેગોશિયેબલ કોર્ટે ચેક રીટર્નના કેસમાં દોઢ વર્ષની સજા ફટકારી છે અને ૩૦ હજાર રૂપિયાનો દંડ કર્યો છે.