ભાવનગર: ખરકડી ગામે શંકાસ્પદ વિદેશી દારૂ પીવાથી 1 યુવકનું મોત, 2 હોસ્પિટલમાં, તપાસ શરૂ

સોશિયલ મીડિયામાં 'રોયલ સ્ટેગ' દારૂની બોટલના ફોટા વાયરલ થયા. વિશ્વરાજસિંહ ગોહિલ અને ઘનશ્યામસિંહ જાડેજાની હાલત નાજુક. પોલીસે FSL રિપોર્ટ માટે સેમ્પલ મોકલી સમગ્ર શહેરમાં તપાસનો ધમધમાટ શરૂ કર્યો.

Bhavnagar Kharakadi Suspected Liquor Case One Dead Police Investigation

Source : abp asmita

Show Quick Read

Key points generated by AI, verified by newsroom

• ભાવનગરમાં શંકાસ્પદ દારૂ પીતા એક યુવકનું મોત.
• બે યુવકોની હાલત ગંભીર, સારવાર હેઠળ ખસેડાયા છે.
• રોયલ સ્ટેગ બોટલના ફોટા વાયરલ, પોલીસ તપાસ આરંભી.

Bhavnagar Suspected Liquor Case: ભાવનગર જિલ્લાના ખરકડી ગામેથી એક અત્યંત ચોંકાવનારા અને ગંભીર સમાચાર સામે આવ્યા છે. અહીં કોઈ શંકાસ્પદ કેફી પીણું (વિદેશી દારૂ) પીધા બાદ 3 યુવાનોની તબિયત અચાનક લથડી ગઈ હતી. જેમાંથી 1 યુવકનું સારવાર દરમિયાન કરુણ મોત નીપજ્યું છે, જ્યારે અન્ય 2 યુવકો હાલ જીવન-મરણ વચ્ચે ઝોલા ખાઈ રહ્યા છે.

વાયરલ થઈ દારૂની બોટલની તસવીરો

મળતી માહિતી મુજબ, આ યુવાનોએ જે પીણું પીધું હતું તેને લઈને અનેક સવાલો ઊભા થઈ રહ્યા છે. ખાસ વાત એ છે કે, યુવકોએ જે બોટલમાંથી આ શંકાસ્પદ દારૂ પીધો હતો, તેના ફોટા હવે સોશિયલ મીડિયામાં ભારે વાયરલ થઈ રહ્યા છે. વાયરલ થયેલી તસવીરોમાં 'રોયલ સ્ટેગ' (Royal Stag) બ્રાન્ડની વિદેશી દારૂની બોટલ સ્પષ્ટપણે જોવા મળી રહી છે. આ બોટલમાંથી પીણું ગટગટાવ્યા બાદ જ ત્રણેયની તબિયત બગડી હોવાની પૂરેપૂરી આશંકા છે.

2 યુવકો હોસ્પિટલમાં દાખલ

ઝેરી અસરને કારણે યુવકોની હાલત નાજુક બનતાં તેમને તાત્કાલિક ભાવનગર શહેરની વિવિધ હોસ્પિટલોમાં સારવાર અર્થે ખસેડવામાં આવ્યા હતા. આ યુવકો પૈકી વિશ્વરાજસિંહ ગોહિલ અને ઘનશ્યામસિંહ જાડેજા નામના 2 યુવકોને શહેરની એક ખાનગી હોસ્પિટલમાં દાખલ કરવામાં આવ્યા છે, જ્યાં હાલ તેમની સઘન સારવાર ચાલી રહી છે. જ્યારે ત્રીજા યુવકનું ટૂંકી સારવાર બાદ જ મોત નીપજતાં પરિવારમાં આક્રંદ છવાયો છે.

પોલીસ એક્શનમાં: ઠેર-ઠેર તપાસ શરૂ

આ ગંભીર દુર્ઘટનાની જાણ થતાં જ ભાવનગર પોલીસનો મોટો કાફલો હોસ્પિટલ અને ખરકડી ગામે દોડી ગયો હતો. પોલીસે મૃતક યુવકના મૃતદેહને પોસ્ટમોર્ટમ (PM) માટે મોકલી આપ્યો છે. આ શંકાસ્પદ પીણું ખરેખર શું હતું, તેમાં કેટલું ઝેર હતું અને આ બોટલો ક્યાંથી લાવવામાં આવી હતી, તે બધી જ વિગતો પીએમ રિપોર્ટ અને FSL (ફોરેન્સિક સાયન્સ લેબોરેટરી) ના સેમ્પલિંગ રિપોર્ટ બાદ જ સ્પષ્ટ થશે.

આ ઘટનાને ગંભીરતાથી લેતા પોલીસે શહેરમાં આવી શંકાસ્પદ દારૂની બોટલો ક્યાંથી ઘૂસાડવામાં આવી રહી છે, તે જાણવા માટે અલગ-અલગ વિસ્તારોમાં સઘન તપાસ અને દરોડા પાડવાની કાર્યવાહી શરૂ કરી દીધી છે.

એક યુવકના અકાળે અવસાનથી આખા ખરકડી ગામમાં ભારે શોકનું મોજું ફરી વળ્યું છે. આ દુર્ઘટના બાદ ગામલોકો અને જાગૃત નાગરિકો દ્વારા તંત્ર સમક્ષ ખુલ્લેઆમ વેચાતા આવા શંકાસ્પદ નશીલા પીણાંઓ અને દારૂના વેચાણ અંગે મોટા પ્રશ્નો ઊભા કરવામાં આવી રહ્યા છે.