Monsoon Car Tips: મોનસૂનમાં વરસાદમાં કાર બગડી ન જાય, તે માટે અપનાવો આ જરૂરી ટિપ્સ
Monsoon Car Tips: વરસાદી મોસમ શરૂ થાય તે પહેલાં અને ચોમાસા દરમિયાન કેટલીક જરૂરી સાવચેતીઓ રાખવી ખૂબ જરૂરી છે. તેનાથી તમારી કાર સુરક્ષિત રહેશે અને મુસાફરી પણ વધુ આરામદાયક બનશે
Monsoon Car Tips: ચોમાસાની ઋતુ ગરમીથી રાહત આપે છે, પરંતુ કાર માલિકો માટે અનેક પડકારો પણ લઈને આવે છે. ભારે વરસાદ, પાણી ભરાવાની સ્થિતિ અને રસ્તા પર જમા થયેલું પાણી વાહનો માટે નુકસાનકારક સાબિત થઈ શકે છે. ઘણી વખત થોડી બેદરકારીના કારણે કારના એન્જિન, ઇલેક્ટ્રિકલ સિસ્ટમ અને ઇન્ટિરિયરને ભારે નુકસાન થાય છે, જેના કારણે મરામત પાછળ મોટો ખર્ચ કરવો પડે છે. તેથી વરસાદી મોસમ પહેલાં અને દરમિયાન કેટલીક મહત્વપૂર્ણ સાવચેતીઓ રાખવી જરૂરી છે.
વરસાદી મોસમમાં સૌથી મહત્વની વાત એ છે કે પાણી ભરાયેલા રસ્તાઓ પર જવાનું ટાળવું જોઈએ. ઘણી વખત રસ્તા પર ભરાયેલા પાણીની ઊંડાઈનો અંદાજ લગાવવો મુશ્કેલ બને છે. જો કાર વધુ ઊંડા પાણીમાં પ્રવેશે તો એન્જિનમાં પાણી જઈ શકે છે. આવી સ્થિતિમાં એન્જિનને ગંભીર નુકસાન થઈ શકે છે, જેને હાઇડ્રોલોક (Hydrolock) કહેવામાં આવે છે. તેથી જ્યાં રસ્તા પર વધુ પાણી ભરાયેલું દેખાય ત્યાંથી પસાર થવાને બદલે વૈકલ્પિક માર્ગ પસંદ કરવો વધુ યોગ્ય છે.
કાર ધીમી ગતિએ ચલાવો
જો કોઈ કારણસર પાણી ભરાયેલા રસ્તા પરથી પસાર થવું જરૂરી હોય તો કારને ધીમી ગતિએ ચલાવવી જોઈએ. એક્સિલેટરનું સંતુલન જાળવવું જરૂરી છે જેથી પાણી સાઇલેન્સર અથવા એન્જિનમાં ન પહોંચે. અચાનક બ્રેક મારવાથી અથવા વધુ ઝડપે પાણીમાંથી પસાર થવાથી પાણી એન્જિન અને અન્ય મહત્વપૂર્ણ ભાગોમાં પહોંચી શકે છે. આવી સ્થિતિમાં લો ગિયરમાં વાહન ચલાવવું અને રસ્તાની વચ્ચે કાર રોકવાનું ટાળવું જોઈએ.
ઇલેક્ટ્રિકલ સિસ્ટમની તપાસ કરાવો
ચોમાસા પહેલાં કારની ઇલેક્ટ્રિકલ સિસ્ટમની તપાસ કરાવવી પણ ખૂબ જરૂરી છે. બેટરી, વાયરિંગ, ફ્યૂઝ અને ઇલેક્ટ્રોનિક કનેક્શનમાં ભેજ પહોંચવાથી અનેક સમસ્યાઓ સર્જાઈ શકે છે. તેથી વરસાદી મોસમ શરૂ થાય તે પહેલાં સર્વિસ સેન્ટરમાં કારની ચકાસણી કરાવવી ફાયદાકારક રહે છે. સમયસર ખામી દૂર કરવાથી રસ્તામાં કાર બંધ પડી જવાની સમસ્યાથી બચી શકાય છે.
રબર સીલની પણ તપાસ કરો
કારના દરવાજા અને બારીઓની રબર સીલની સ્થિતિ તપાસવી જોઈએ. જૂની અથવા ખરાબ સીલના કારણે વરસાદનું પાણી ધીમે ધીમે કારની અંદર પ્રવેશી શકે છે. તેનાથી સીટ, કાર્પેટ અને ઇલેક્ટ્રોનિક સાધનોને નુકસાન થઈ શકે છે. લાંબા સમય સુધી ભેજ રહેવાના કારણે કારની અંદર દુર્ગંધ અને ફૂગની સમસ્યા પણ સર્જાઈ શકે છે. તેથી રબર સીલ નબળી અથવા તૂટેલી જણાય તો તેને તરત બદલાવી દેવી જોઈએ.
આ પણ વાંચો: Car Engine Capacity: કારના એન્જિનની કેટલી હોય છે કેપેસિટી, કેટલા કિલોમીટર સુધી ચાલી શકે છે ?
ટાયરની સ્થિતિ પર ખાસ ધ્યાન આપો
વરસાદી મોસમમાં રસ્તાઓ લપસણા બની જાય છે અને ઘસાઈ ગયેલા ટાયર અકસ્માતનું જોખમ વધારી શકે છે. જો ટાયરની ગ્રિપ ઓછી થઈ ગઈ હોય અથવા ટ્રેડ વધુ ઘસાઈ ગયો હોય તો ટાયર બદલાવી દેવા જોઈએ. સારી ગ્રિપ ધરાવતા ટાયર વરસાદમાં વાહન પર વધુ નિયંત્રણ આપે છે અને બ્રેકિંગ અંતર પણ ઘટાડે છે. સાથે જ ટાયરમાં યોગ્ય હવાનું દબાણ જાળવવું પણ જરૂરી છે.
વાઇપર અને વોશર સિસ્ટમ ચેક કરો
ચોમાસા દરમિયાન વાઇપર અને વોશર સિસ્ટમનો સૌથી વધુ ઉપયોગ થાય છે. જો વાઇપર બ્લેડ જૂના થઈ ગયા હોય અથવા કાચને યોગ્ય રીતે સાફ ન કરતા હોય તો તેને બદલાવી દેવા જોઈએ. ભારે વરસાદ દરમિયાન Visibility સુરક્ષિત ડ્રાઇવિંગ માટે અત્યંત જરૂરી છે. જો ઓછી વિઝિબિલિટી હોય તો ડ્રાઇવિંગ ટાળવું જોઇએ, વોશર ટાંકીમાં પૂરતું ફ્લુઇડ ભરેલું હોવું જોઈએ જેથી કાદવ અથવા ગંદકી લાગતાં જ વિન્ડશીલ્ડને તરત સાફ કરી શકાય.
ચોમાસા દરમિયાન થોડી સાવચેતી અને સમયસરની તપાસ તમારી કારને મોટા નુકસાનથી બચાવી શકે છે અને તમારી મુસાફરીને વધુ સુરક્ષિત બનાવી શકે છે.
ટોપ સ્ટોરી
ટ્રેન્ડિંગ સમાચાર
