30 દિવસમાં 6.46 લાખ વાહનોનું વેચાણ! આ કંપનીના સ્કૂટર-બાઇક ખરીદવા પડાપડી
ઈલેક્ટ્રિક સ્કૂટર અને નિકાસમાં જબરદસ્ત ઉછાળા સાથે ટીવીએસ મોટર કંપનીએ 24.35 ટકાનો વાર્ષિક વિકાસ નોંધાવ્યો; ત્રીજા ક્વાર્ટરમાં 19.19 લાખ વાહનો વેચાયા.

TVS Motor September Sales: ઓટોમોબાઈલ સેક્ટર માટે સપ્ટેમ્બર મહિનો અત્યંત શાનદાર સાબિત થયો છે. તહેવારોની સિઝન પહેલા જ વાહનોના વેચાણમાં મોટો ઉછાળો જોવા મળ્યો છે. ખાસ કરીને ભારતની અગ્રણી ઓટોમોબાઈલ કંપની ટીવીએસ મોટર (TVS Motor) માટે આ મહિનો ઐતિહાસિક રહ્યો છે. કંપનીએ માત્ર 30 દિવસના ટૂંકા ગાળામાં 6.46 લાખથી વધુ દ્વિચક્રી વાહનોનું બમ્પર વેચાણ કર્યું છે. ઈલેક્ટ્રિક સ્કૂટરની સતત વધતી માંગ અને આંતરરાષ્ટ્રીય બજારમાં મજબૂત નિકાસના કારણે કંપનીએ વેચાણના નવા રેકોર્ડ સ્થાપિત કર્યા છે.
સપ્ટેમ્બર મહિનામાં વેચાણના જબરદસ્ત આંકડા
ટીવીએસ મોટર કંપની દ્વારા જાહેર કરવામાં આવેલા સત્તાવાર આંકડાઓ અનુસાર, સપ્ટેમ્બર મહિનામાં કંપનીએ કુલ 672,790 વાહનોનું જંગી વેચાણ કર્યું છે. પાછલા વર્ષના આ જ સમયગાળાની સરખામણીમાં આ વેચાણમાં 24.35 ટકાનો મજબૂત વાર્ષિક વિકાસ નોંધાયો છે. જો માસિક વેચાણની વાત કરીએ તો, ઓગસ્ટ મહિનાની તુલનામાં સપ્ટેમ્બરમાં કંપનીના વેચાણમાં 9.12 ટકાનો વધારો જોવા મળ્યો છે.
ટુ-વ્હીલર (દ્વિચક્રી) સેગમેન્ટમાં કંપનીએ સપ્ટેમ્બરમાં 645,955 યુનિટ્સ વેચ્યા છે, જેમાં 23.29 ટકાનો નોંધપાત્ર વધારો નોંધાયો છે. માત્ર સ્થાનિક બજારમાં જ કંપનીએ 482,073 વાહનોનું વેચાણ કરીને ગ્રાહકોનો વિશ્વાસ જાળવી રાખ્યો છે.
ત્રીજા ક્વાર્ટરમાં 19.19 લાખ વાહનોનું વેચાણ
કેલેન્ડર વર્ષના ત્રીજા ક્વાર્ટર (જુલાઈથી સપ્ટેમ્બર) ના આંકડાઓ પર નજર કરીએ તો કંપનીનું પ્રદર્શન ખૂબ જ પ્રોત્સાહક રહ્યું છે. આ ત્રણ મહિનાના ગાળામાં કંપનીએ કુલ 19.19 લાખ વાહનોનું વેચાણ કર્યું છે. જુલાઈ અને સપ્ટેમ્બર વચ્ચેના સમયમાં ટીવીએસ મોટરે 18.40 લાખથી વધુ ટુ-વ્હીલર વેચ્યા છે. સ્થાનિક બજારમાં ટુ-વ્હીલરના વેચાણમાં 24.05 ટકાનો સીધો વધારો થયો છે, જ્યારે નિકાસના મોરચે કંપનીએ 34.37 ટકાનો જંગી ઉછાળો નોંધાવ્યો છે.
ઈલેક્ટ્રિક સ્કૂટર્સની બમ્પર માંગ અને લોકપ્રિયતા
હાલમાં ગ્રાહકોનો ઝોક ઈલેક્ટ્રિક વાહનો (EV) તરફ ઝડપથી વધી રહ્યો છે, જેનો સીધો ફાયદો કંપનીને મળ્યો છે. કંપનીના લોકપ્રિય મોડલ iQube અને અન્ય ઈલેક્ટ્રિક સ્કૂટર્સને ગ્રાહકોનો જબરદસ્ત પ્રતિસાદ મળ્યો છે. સપ્ટેમ્બર મહિનામાં કંપનીએ 65,799 ઈલેક્ટ્રિક વાહનોનું વેચાણ કર્યું છે.
ઈલેક્ટ્રિક સેગમેન્ટમાં કંપનીનો વાર્ષિક વિકાસ 110.45 ટકા જેટલો અધધ રહ્યો છે. ઓગસ્ટ મહિનાની સરખામણીમાં પણ ઈવીના વેચાણમાં 10.67 ટકાનો વધારો થયો છે. કંપનીના કુલ વાહન વેચાણમાં હવે ઈલેક્ટ્રિક સ્કૂટર્સનો હિસ્સો 10.19 ટકા પર પહોંચી ગયો છે. જો જુલાઈ-સપ્ટેમ્બર ક્વાર્ટરની વાત કરીએ તો, ઈલેક્ટ્રિક સ્કૂટર્સનું વેચાણ 132.71 ટકાના તોતિંગ ઉછાળા સાથે 186,186 યુનિટ્સ પર પહોંચી ગયું છે.
નિકાસ અને થ્રી-વ્હીલર વ્યવસાયમાં મજબૂત વૃદ્ધિ
ટીવીએસ મોટર માત્ર ભારતમાં જ નહીં, પરંતુ આંતરરાષ્ટ્રીય બજારમાં પણ પોતાનો વ્યાપ વધારી રહી છે. થ્રી-વ્હીલર (ત્રિચક્રી) વ્યવસાયને સામેલ કરીને જોઈએ તો, ત્રીજા ક્વાર્ટરમાં કંપનીનો આંતરરાષ્ટ્રીય વ્યવસાય 34.82 ટકા વધીને 5.39 લાખ યુનિટ સુધી પહોંચી ગયો છે. કંપનીના કુલ ત્રિમાસિક વેચાણમાં નિકાસનો હિસ્સો 28.11 ટકા જેટલો મોટો રહ્યો છે.





















