ગાંધીનગર બેઠક પર અમિત શાહ સામે કોંગ્રેસના કયા મોટા નેતા ચૂંટણી લડશે? જાણો વિગત

ગાંધીનગર: શનિવારે ભાજપનાં રાષ્ટ્રીય અધ્યક્ષ અમિત શાહે લોકસભાની ચૂંટણીમાં ગાંધીનગરની બેઠક માટે ઉમેદવારી પત્ર ભર્યું હતું. ત્યારે કોંગ્રેસમાંથી ગાંધીનગર બેઠકનાં ઉમેદવાર સી.જે.ચાવડા રહેશે તેવું ખુદ તેમણે કહ્યું છે. જોકે હજુ સુધી કોંગ્રેસ તરફથી આ બેઠક પર સત્તાવાર રીતે કોઈ ઉમેદવારનું નામ જાહેર કરવામાં આવ્યું નથી. મહત્વનું છે કે ગાંધીનગર બેઠક પર છેલ્લા છ ટર્મથી ભાજપ જ જીતી રહી છે. સી.જે.ચાવડા સાથે ગાંધીનગર બેઠકની વાત કરતાં તેમણે આત્મવિશ્વાસ સાથે કહ્યું હતું કે, હું ચોથી તારીખે 12.39 મિનિટે ફોર્મ ભરવાનો છું, સી.જે.ચાવડા ગાંધીનગર બેઠક પરથી અમિત શાહ સામે જ લડવાનો છું. કોઈ ઉમેદવારી બદલવાની વાત ચાલી રહી નથી. આજે તેની જાહેરાત પણ થઈ જશે. આ પહેલા પણ જ્યારે સી.જે.ચાવડાનાં નામની ચર્ચાઓ ચાલતી હતી ત્યારે પણ તેમણે કહ્યું હતું કે, ગાંધીનગર બેઠક પર કોંગ્રેસમાંથી હું જ લડીશ. અમિતભાઈના આવવાથી કોંગ્રેસને કોઈ ફેર નહીં પડે. ભાજપની સલામત બેઠક પર રાષ્ટ્રીય અધ્યક્ષને મેદાનમાં આવવું પડે છે તે જ કહે છે કે ભાજપની ગુજરાતમાં કફોડી હાલત છે. ગાંધીનગર લોકસભા સીટ પર અમિત શાહને ટીકિટ આપતાં ભાજપનાં કાર્યકરોમાં ઉત્સાહનો માહોલ જોવા મળ્યો છે. આગામી 23મી એપ્રિલના રોજ લોકસભા ચૂંટણી યોજાવાની છે ત્યારે લાલકૃષ્ણ અડવાણીના સ્થાને ભાજપ અધ્યક્ષ અમિત શાહને ટિકીટ આપવામાં આવી છે.