પંજાબનો આ ખેલાડી બન્યો સૌથી નાની ઉંમરે IPLમાં હેટ્રિક લેનારો બૉલર, તોડ્યો રોહિત શર્માનો રેકોર્ડ

નવી દિલ્હીઃ આઇપીએલ સિઝન 12ની દિલ્હી અને પંજાબ વચ્ચે રમાયેલી મેચમાં એક મોટો રેકોર્ડ બન્યો છે. પંજાબની ટીમે દિલ્હી કેપિટલ્સને 14 રનથી હારવ્યુ, આ મેચમાં સૌથી મોટો ફાળો સેમ કુરેનનો રહ્યો. સેમ કુરેનને 2.2 ઓવરમાં માત્ર 11 રન આપીને દિલ્હીના 4 ખેલાડીઓને પેવેલિયન ભેગા કર્યા હતા, આ દરમિયાન સેન કુરેને આઇપીએલ 12ની પહેલી હેટ્રિક પણ પોતાના નામે કરી હતી. આ સાથે જ સેમ કુરેન આઇપીએલમાં સૌથી નાની ઉંમરે હેટ્રિક લેનારો ખેલાડી બની ગયો હતો. કુરેને મુંબઇ ઇન્ડિયન્સના કેપ્ટન રોહિત શર્માનો રેકોર્ડ તોડતા 20 વર્ષ અને 302 દિવસમાં આ ઉપલબ્ધિ હાંસલ કરી લીધી હતી. આ પહેલા આ રેકોર્ડ રોહિત શર્માના નામે હતો, તેને 22 વર્ષ, 6 દિવસમાં આ કારનામું કર્યુ હતુ. દિલ્હીએ ટૉસ જીતીને પહેલા બૉલિંગ કરવાનો નિર્ણય કર્યો હતો. જેમાં પંજાબની ટીમે 20 ઓવરમાં 9 વિકેટ ગુમાવીને 166 રન બનાવ્યા હતા. જવાબમાં દિલ્હીની ટીમ 19.2 ઓવરમાં 152 રને જ સમેટાઇ ગઇ હતી. આ સાથે પંજાબની ટીમ 14 રનથી જીતી ગઇ હતી.