ગુજરાત ભાજપમાં કઈ 10 બેઠકોનું કોકડું ગુંચવાયું? જાણો શું છે કારણ

અમદાવાદ: ગુજરાતમાં ભાજપે જ્યાં ઉમેદવારો જાહેર કર્યાં તે 15 લોકસભા મતક્ષેત્રોમાં કાર્યકરો સહિત લોકોએ ફટાકડાં ફોડ્યા હતાં પરંતુ બાકી રહેલી 10 બેઠકોમાં કાર્યકર્તાથી લઈને વર્તમાન સાંસદો, દાવેદારો ડખે ચઢ્યાનો માહોલ આખી રાત છવાયેલો રહ્યો હતો. શનિવારે રાત સુધીમાં 26માંથી 16 ઉમેદવારના નામે જાહેર થયા બાદ બાકીની 10 બેઠકો માટે કોકડું ગુંચવાયેલું રહ્યું છે. જેનો ઉકેલ સોમવાર સુધીમાં આવી જશે તેવું સુત્રો દ્વારા જાણવા મળ્યું છે. જોકે બાકી રહેલી 10 બેઠકો માટે ભાજપ કોંગ્રેસના ઉમેદવારો જાહેર થયા બાદ તબક્કાવાર ટીકિટ ફાળવણી કરશે તેવું સુત્રો દ્વારા જાણવા મળ્યું છે. બનાસકાંઠા, પાટણ, મહેસાણા, અમદાવાદ પૂર્વ, પોરબંદર, જૂનાગઢ, આણંદ, પંચમહાલ, છોટાઉદેપુર અને સુરતમાં ઉમેદવાર હજુ જાહેર કરવાના બાકી છે. દિલ્હીમાં શુક્રવારની રાતે 11-30 કલાક સુધી ગુજરાતના 25 ઉમેદવારો નક્કી કરવા માટે કવાયત હાથ ધર્યા બાદ પણ કોંગ્રેસમાંથી આયાતી ડો.આશાબહેન પટેલ સામે સ્થાનિક સંગઠનના વિરોધને કારણે મહેસાણા લોકસભા અને ઊંઝા વિધાનસભાના ઉમેદવારોના નામ નક્કી થઈ શક્યા નહોતા. એટલું જ નહીં પાટણ-બનાસકાંઠામાં કોંગ્રેસની રણનીતિ હજુ સુધી સ્પષ્ટ થઈ નથી ત્યારે અમદાવાદ પૂર્વ સહિતની ઉત્તર ગુજરાતની આ ચારેય બેઠકો અંગે ભાજપ જ્ઞાતિગત સમીકરણોને સેટ કરી શક્યું નથી.