‘ગોલ્ડ’ અને ‘સત્યમેવ જયતે’ ફિલ્મે પ્રથમ દિવસેજ બોક્સ ઓફિસ પર કમાણીના મામલે બનાવ્યો આ રેકોર્ડ

મુંબઈ: અક્ષય કુમારની ‘ગોલ્ડ’ અને જૉન અબ્રાહમની ફિલ્મ ‘સત્યમેવ જયતે’બન્ને ફિલ્મોએ બોક્સ ઓફિસ પર ધમાકેદાર ઓપનિંગ કરતા રેકોર્ડ તોડ કમાણી કરી લીધી છે. ઓપનિંગ કલેક્શન મામલે આ બન્ને ફિલ્મોએ વર્ષ 2018ની સૌથી વધુ કમાણી કરનારી ફિલ્મોની લિસ્ટમાં ટોપ ફાઈવમાં શામેલ થઈ ગઈ છે.

બોક્સ ઓફિસ પર કમાણીના મામલે અક્ષય કુમારની ‘ગોલ્ડ’ ફિલ્મે 25.25 કરોડ રૂપિયાની કમાણી કરી છે. જ્યારે જૉન અબ્રાહમની ફિલ્મ ‘સત્યમેવ જયતે’ એ 20.52 કરોડ રૂપિયાની ધમાકેદાર ઓપનિંગ કરી છે. તેની સાથે આ વર્ષે રિલીઝ થયેલી સૌથી વધુ કમાણી કરનારી ફિલ્મોની યાદીમા ‘ગોલ્ડ’ ત્રીજા અને ‘સત્યમેવ જયતે’ પાંચમાં નંબર પર આવી ગઈ છે. કલેક્શનના આ આંકડા ટ્રેડ એનાલિસ્ટ તરણ આદર્શે ટ્વિટ દ્વારા જાણકારી આપી હતી.

ટૉપ પાંચમાં સૌથી વધુ કમાણી કરનારી બોલીવૂડ ફિલ્મોની વાત કરીએ તો આ યાદીમાં પ્રથમ નંબરે રણબીર કપૂરની ફિલ્મ સંજૂ છે જેણે પ્રથમ દિવસે 34.75 કરોડ રૂપિયાની જબરજસ્ત કમાણી કરી હતી ત્યાર બાદ રેસ-3(29.17 કરોડ), ત્રીજા નંબરે ગોલ્ડ(25.25), ચોથા નંબરે બાગી-2 (25.10 કરોડ) અને પાંચમાં નંબરે જોન અબ્રાહમની ફિલ્મ સત્યમેવ જયતે(20.52 કરોડ) છે.