ગુજરાત હાડ થીજવતી ઠંડીમાં ઠુઠવાયુ, નલિયામાં પારો ગગડ્યો

ગુરૂવારે રાજ્યના નલિયામાં લઘુત્તમ તાપમાન ગઈકાલ કરતા પણ વધુ ઘટી ગયું હતું અને પારો ઘટીને ૫.૨ સુધી નીચે પહોંચ્યો હતો. રાજ્યમાં સૌથી ઠંડુ શહેર નલિયા રહ્યું હતું. જ્યારે ડીસામાં ૬ અને ગાંધીનગરમાં ૭.૫ ડિગ્રા લઘુત્તમ તાપમાન નોંધાયું હતું. અમદાવાદ શહેરમાં લઘુત્તમ તાપમાન ૧૦.૬ ડિગ્રી રહ્યું હતું. તીવ્ર ઠંડીના કારણે લોકોની હાલત કફોડી બની છે.

તીવ્ર ઠંડીથી લોકોને હાલ રાહત નહીં મળે તેવી શક્યતા દેખાઈ રહી છે. ઠંડીથી બચવા માટે તમામ પ્રયાસો કરવામાં આવી રહ્યા છે. સૌથી વધારે મુશ્કેલ હાલત ફુટપાથ પર જીવન વીતાવી રહેલા લોકોની થઈ છે.

અમદાવાદઃ ઉત્તરાખંડ, હિમાચલ સહિત ઉત્તર ભારતમાં છેલ્લા કેટલાક દિવસોથી થઇ રહેલી હિમવર્ષાને કારણે ઠંડીનો ચમકારો વધ્યો છે. ગુજરાતમાં પણ સતત બે ત્રણ દિવસથી કાતિલ ઠંડીનું મોજુ ફરી વળ્યું છે. હાડ થીજવતી ઠંડીના લીધે જનજીવન ઉપર પણ અસર થઈ છે. ગુજરાતના જુદા જુદા ભાગોમાં સુસવાટા મારતા ઠંડા પવનોને લીધે તાપમાન સતત ઘટી રહ્યું છે. કોલ્ડ વેવની ચેતવણી પણ આગામી ૨૪ કલાક માટે જારી કરવામાં આવી છે.

જમ્મુ-કાશ્મીર અને હિમાચલમાં હિમવર્ષા થઈ રહી છે ત્યારે ઉત્તર ભારતમાં કાતિલ ઠંડીના લીધે લોકો પરેશાન થયેલા છે. સૌરાષ્ટ્ર અને કચ્છ તેમજ ગુજરાત પ્રદેશમાં કોલ્ડવેવની સ્થિતિ રહી શકે છે. અમદાવાદ હવામાન વિભાગના અધિકારીઓના કહેવા મુજબ આગામી ૪૮ કલાક સુધી કોલ્લ વેવ રહેશે.

ઉત્તર ભારતમાં તીવ્ર ઠંડી પડી રહી છે બીજી બાજુ હિમચાલ પ્રદેશ અને જમ્મુ-કાશ્મીરમાં હિમવર્ષા થઈ છે. મળેલી માહિતી મુજબ ગુજરાતમાં ૧૪મી જાન્યુઆરી બાદ તીવ્ર ઠંડીનો ચમકારો રહી શકે છે. તીવ્ર ઠંડીના લીધે તમામ લોકો ગરમ વસ્ત્રોમાં હવે નજરે પડી રહ્યા છે.

આજે સવારે ૮.૩૦ વાગ્યાની આસપાસ આંકડા જારી કરાયા હતા. જેમાં ડીસામાં લઘુત્તમ તાપમાન 7 થયું હતું. જ્યારે અમદાવાદમાં 11.1, વડોદરામાં 6.5, સુરતમાં 12.6 રાજકોટમાં 12.1, ભાવનગરમાં 15.4, પોરબંદરમાં 13, વેરાવળમાં 12, દ્વારકામાં 14.4, ઓખામાં 17, ભુજમાં 10.2, નલિયામાં 6.8, સુરેન્દ્રનગરમાં 10.9, અમરેલીમાં 8, ગાંધીનગરમાં 8, મહુવામાં 10.9, દીવમાં 8, વલસાડમાં 9.3 અને માંડવી-કચ્છમાં 8 સેલ્સીયસ નોંધાયું છે.