આજે બેંક યૂનિયનની હડતાળ, 1500 કરોડના ચેકનું ક્લિયરિંગ અટકશે

છેલ્લા ઘણા સમયથી સરકાર દ્વારા બેંકોનું ખાનગીકરણ કરવાની ચહલ પહલ શરૂ થઇ ગઇ છે. જેનો બેંક કર્મચારીઓના જુદા જુદા સંગઠનોના મહાસંગઠન યુનાઇટેડ ફોરમ ઓફ બેંક યુનિયન્સ(UFBU) દ્વારા ભારે વિરોધ કરવામાં આવી રહ્યો છે. UFBUની રજૂઆત છે કે જો બેંકોનું ખાનગીકરણ કરવામાં આવે તો ઘણી જગ્યાએ બેંકોની શાખાઓ બંધ કરવી પડે જેને કારણે કર્મચારીઓ બેકાર પણ થાય.

દેશભરના દસેક લાખ બેંક કર્મચારીઓ ૨૨મી તારીખે સરકારની નીતિનો વિરોધ કરશે. તેમ છતાં સરકાર દ્વારા કોઇ નિર્ણયની જાહેરાત નહિ કરવામાં આવે તો દિલ્હીમાં પાર્લામેન્ટ સમક્ષ વિરોધ પ્રદર્શન કરવામાં આવશે અને આગામી દિવસોમાં હડતાળ સહિતના વિરોધ પ્રદર્શન કરાશે. નોંધનીય છે કે, બેંક કર્મચારીઓની એક દિવસની પ્રતિક હડતાળને લીધે માત્ર અમદાવાદ શહેરમાં જ રૂપિયા ૧૫૦૦ કરોડના ચેકનું ક્લિયરન્સ સહિત રૂપિયા પાંચ હજાર કરોડના વ્યવહારો અટકશે.