Ahmedabad: ઘુમામાં 9 કલાકમાં ફરી દીપડો દેખાતા લોકોમાં ફફડાટ, બાળકોને અવાવરું જગ્યાએ ન જવા સૂચના
અમદાવાદના બોપલ-ઘૂમા વિસ્તારમાં આવેલા શરણદીપ મેન્શન્સમાં મધરાતે દીપડો ઘૂસી આવતાં સમગ્ર વિસ્તારમાં ભયનો માહોલ સર્જાયો છે.
- અમદાવાદના ઘુમામાં શરણદીપ મેન્શન્સમાં દીપડો ઘૂસતા ભયનો માહોલ.
- વન વિભાગે ડ્રોન અને ટ્રાન્ક્યુલાઇઝર ગનથી સર્ચ ઓપરેશન શરૂ કર્યું.
- મધરાતે પ્રવેશ્યા બાદ વહેલી સવારે ફરી દીપડો દેખાયો, શોધખોળ ચાલુ.
- સ્થાનિકોને સાવચેત રહેવા અપિલ, બાળકોની સુરક્ષા જાળવવા સૂચના.
અમદાવાદ: અમદાવાદના બોપલ-ઘૂમા વિસ્તારમાં આવેલા શરણદીપ મેન્શન્સમાં મધરાતે દીપડો ઘૂસી આવતાં સમગ્ર વિસ્તારમાં ભયનો માહોલ સર્જાયો છે. રહેણાંક વિસ્તારમાં દીપડાની હાજરીના સમાચાર મળતા જ વન વિભાગ, કાંકરિયા પ્રાણી સંગ્રહાલય (ઝૂ)ની ટીમ અને સ્થાનિક તંત્ર તાત્કાલિક સ્થળ પર દોડી આવ્યું હતું. દીપડાને પકડવા માટે ડ્રોનથી સર્ચ ઓપરેશન હાથ ધરાયું છે, જ્યારે સાંજ બાદ ફરી એકવાર સર્ચ ઓપરેશન વધુ તેજ કરવામાં આવશે. વન વિભાગે સ્થાનિક લોકોને સાવચેત રહેવા તેમજ ખાસ કરીને નાના બાળકોને અવાવરું સ્થળોએ ન જવા માટે સૂચના આપી છે.
વહેલી સવારે ફરી દેખાયો દીપડો
વન વિભાગના જણાવ્યા અનુસાર, મોડી રાત બાદ આજે વહેલી સવારે ફરી દીપડાની મૂવમેન્ટ જોવા મળી હતી. શરણદીપ મેન્શન્સના બંગલા નંબર-20 નજીક દીપડો જોવા મળ્યાની માહિતી મળતા ટીમે સમગ્ર વિસ્તારને કોર્ડન કરી સર્ચ ઓપરેશન શરૂ કર્યું હતું.
મધરાતે શરણદીપ મેન્શન્સમાં દીપડાની એન્ટ્રી
પ્રાથમિક માહિતી મુજબ, શરણદીપ મેન્શન્સમાં મધરાતે દીપડો કમ્પાઉન્ડ વોલ કૂદીને અંદર પ્રવેશ્યો હતો. દીપડાની હલચલને કારણે સમગ્ર સોસાયટીમાં દોડધામ મચી ગઈ હતી. રાતભર દીપડો સોસાયટીમાં ફરતો રહ્યો હતો, જેના કારણે આસપાસના શ્વાનો પણ સતત ભસતા અને ભાગતા જોવા મળ્યા હતા.
દીપડાએ મરઘીનો શિકાર કર્યો હોવાની શક્યતા
સ્થળ પરથી મળેલા પુરાવાના આધારે વન વિભાગનું માનવું છે કે દીપડાએ એક મરઘીનું મારણ કર્યું હોઈ શકે છે. શિકારની શોધમાં જંગલમાંથી રહેણાંક વિસ્તારમાં પ્રવેશ્યો હોવાની શક્યતા પણ વ્યક્ત કરવામાં આવી રહી છે. વન વિભાગના અધિકારીઓના પ્રાથમિક અનુમાન મુજબ, રહેણાંક વિસ્તારમાં દેખાયેલો દીપડો અંદાજે આઠથી નવ વર્ષનો હોઈ શકે છે. તેની હિલચાલ અને પગલાંના નિશાનના આધારે ટીમ સતત તેની શોધખોળ કરી રહી છે.
ડ્રોન અને ટ્રાન્ક્યુલાઇઝર ગનથી સર્ચ ઓપરેશન
દીપડાને સુરક્ષિત રીતે પકડવા માટે વન વિભાગે ડ્રોનની મદદથી સમગ્ર વિસ્તારનું એરિયલ સર્વેલન્સ શરૂ કર્યું છે. સાથે જ ટ્રાન્ક્યુલાઇઝર ગન સાથે વિશેષ ટીમ પણ સ્થળ પર તૈનાત કરવામાં આવી છે. જરૂર પડશે તો દીપડાને પાંજરામાં પકડવાની વ્યવસ્થા પણ કરવામાં આવશે.
દસક્રોઈ, સાણંદ સહિત આસપાસના વિસ્તારોમાં પણ તપાસ
માત્ર ઘૂમા જ નહીં પરંતુ દસક્રોઈ, સાણંદ અને આસપાસના વિસ્તારોમાં પણ વન વિભાગે તપાસ શરૂ કરી છે. દીપડો અન્ય વિસ્તારમાં ગયો હોવાની સંભાવનાને ધ્યાનમાં રાખીને વિવિધ સ્થળોએ પેટ્રોલિંગ વધારવામાં આવ્યું છે. વન વિભાગના જણાવ્યા મુજબ, દીપડો દિવસ દરમિયાન ઝાડી અથવા અવાવરું વિસ્તારમાં સંતાઈ જાય તેવી શક્યતા હોવાથી સાંજ પડ્યા બાદ ફરી એકવાર મેગા સર્ચ ઓપરેશન હાથ ધરવામાં આવશે. દીપડો પકડાય નહીં ત્યાં સુધી વન વિભાગ અને કાંકરિયા ઝૂની ટીમ સતત સ્થળ પર તૈનાત રહેશે.
આ પણ વાંચો- અમદાવાદના ઘૂમામાં વન વિભાગનું સર્ચ ઓપરેશન, દીપડાને પકડવા ગોઠવાયા પાંજરા, પોલીસે સમગ્ર વિસ્તારને કર્યો કોર્ડન
સ્થાનિકોને સાવચેત રહેવાની અપીલ
વન વિભાગે બોપલ-ઘૂમા વિસ્તારના લોકોને અનાવશ્યક બહાર ન નીકળવા, નાના બાળકોને એકલા ન મોકલવા અને કોઈપણ સ્થળે દીપડો જોવા મળે તો તાત્કાલિક વન વિભાગ અથવા પોલીસને જાણ કરવા અપીલ કરી છે. હાલ સમગ્ર વિસ્તારમાં સઘન દેખરેખ રાખવામાં આવી રહી છે અને દીપડાને પકડવા માટે સતત પ્રયાસો ચાલુ છે.
ટોપ સ્ટોરી
ટ્રેન્ડિંગ સમાચાર
