Ahmedabad Rain: અમદાવાદ શહેરના અનેક વિસ્તારોમાં વરસાદ શરુ

હવામાન વિભાગની આગાહી વચ્ચે અમદાવાદ શહેરમાં વરસાદ શરુ થયો છે. શહેરના અનેક વિસ્તારોમાં ધીમીધારે વરસાદ વરસી રહ્યો છે.

અમદાવાદ શહેરમાં વરસાદ

અમદાવાદ: હવામાન વિભાગની આગાહી વચ્ચે અમદાવાદ શહેરમાં વરસાદ શરુ થયો છે. શહેરના અનેક વિસ્તારોમાં ધીમીધારે વરસાદ વરસી રહ્યો છે. રવિવારની સાંજે શહેરમાં વરસાદ પડ્યો છે. અમદાવાદના શેલા, બોપલ, એસજી હાઈવે, પ્રહલાદનગર સહિતના વિસ્તારોમાં વરસાદ વરસ્યો છે. સાંજના સમયે અમદાવાદ શહેરના વાતાવરણમાં પલટો આવ્યો હતો. અચાનક જોરદાર પવન સાથે વરસાદ શરુ થયો હતો. રાણીપ, ચાંદખેડા, ગોતા, થલતેજ, નારણપુરા, સિંધુ ભવન રોડ પર વરસાદ વરસ્યો છે.  

અનેક જિલ્લામાં વરસાદ

હવામાન વિભાગની આગાહી અનુસાર રાજ્યમાં વરસાદી માહલો રહેશે.  દક્ષિણ ગુજરાત સહિતના અનેક વિસ્તારોમાં વરસાદી માહોલ રહેવાની શક્યતા હવામાન વિભાગે વ્યક્ત કરી છે. મધ્ય ગુજરાતના કેટલાક વિસ્તારમાં વરસાદની આગાહી કરવામાં આવી છે.હવામાન વિભાગની આગાહી વચ્ચે રાજ્યના અનેક જિલ્લાઓમાં વરસાદ વરસ્યો છે. દાહોદ જિલ્લાના વાતાવરણમાં પણ પલટો આવ્યો છે. વલસાડ જિલ્લામાં પણ વાતાવરણમાં પલટો આવ્યો છે. નર્મદા જિલ્લાના અનેક વિસ્તારમાં વરસાદ વરસ્યો છે. 

અંબાલાલ પટેલની વરસાદને લઈ આગાહી

આજથી 12 જૂન સુધી રાજ્યના વિવિધ વિસ્તારમાં વરસાદ પડશે. હવામાન નિષ્ણાત અંબાલાલ પટેલે આ આગાહી કરી છે. 21 જૂન બાદ રાજ્યના કેટલાક વિસ્તારમાં ભારે વરસાદ વરસશે.  આજથી મહારાષ્ટ્રમાં ભારે વરસાદની શક્યતા છે.  મુંબઈના લો લાઈન વિસ્તારમાં ભારે વરસાદ થવાની આગાહી કરવામાં આવી છે. 

દક્ષિણ ગુજરાત, દક્ષિણ સૌરાષ્ટ્ર, ઉત્તર સૌરાષ્ટ્ર, મધ્ય ગુજરાત  અને ઉત્તર ગુજરાતના કેટલાક ભાગોમાં ભારે પવન સાથે મધ્યમ વરસાદની શક્યતા અંબાલાલ પટેલ દ્વારા વ્યક્ત કરવામાં આવી છે.  17 થી 19 જૂન વચ્ચે અરબ સાગરમાં લો પ્રેશર સર્જાશે.  જ્યારે બંગાળના ઉપસાગરમાં ડીપ ડિપ્રેશન સર્જાશે. દેશના અનેક ભાગમાં  અતિભારે વરસાદ થશે.  

હવામાન વિભાગની આગાહી

દેશનાં ઘણાં રાજ્યો અત્યારે ભારે ગરમી અને હીટવેવનો સામનો કરી રહ્યાં છે. હીટવેવને કારણે અનેક લોકોએ જીવ ગુમાવ્યા છે. હીટવેવના કારણે દિલ્હી, યુપી, રાજસ્થાન, બિહાર, ઝારખંડ અને મધ્યપ્રદેશમાં હાલત ખરાબ છે. ભારતીય હવામાન વિભાગ (IMD) અનુસાર, આગામી ચાર દિવસમાં દેશના ઘણા રાજ્યોમાં વરસાદ (Rain) પડી શકે છે.

અનેક રાજ્યોમાં પારો 50 ડિગ્રી સુધી પહોંચી ગયો છે. જો કે કેટલાક રાજ્યોમાં હળવા વરસાદ (Rain)ને કારણે તાપમાનમાં ઘટાડો થયો છે. આ પછી પણ તાપમાન 43 થી 44 ડિગ્રી વચ્ચે રહે છે. દિલ્હી, યુપી, મધ્યપ્રદેશ, રાજસ્થાન અને બિહારના લોકો આ સમયે ચોમાસાની આતુરતાથી રાહ જોઈ રહ્યા છે.

મહારાષ્ટ્રના કોંકણ વિસ્તારમાં 6 જૂને ચોમાસું (Monsoon) આવી ગયું છે. ચોમાસું (Monsoon) હવે રત્નાગીરી અને સોલાપુર તરફ આગળ વધી રહ્યું છે. 9-10 જૂન સુધીમાં મુંબઈમાં ચોમાસુ આવી શકે છે.