8મું પગાર પંચઃ રિપોર્ટ ક્યારે સોંપશે? પગાર કેટલો વધશે? સરકારે સંસદમાં કર્યો મોટો ખુલાસો
8th Pay Commission Recommendations: રાજ્યસભામાં ખુલાસો: 3 નવેમ્બર 2025 થી કાઉન્ટડાઉન શરૂ; પેન્શનના નિયમો અને નિવૃત્તિ તારીખને લઈને પણ સરકારે કરી મોટી સ્પષ્ટતા, જાણો શું કહ્યું નાણા રાજ્યમંત્રીએ.
8th Pay Commission Recommendations: કેન્દ્ર સરકારના લાખો કર્મચારીઓ અને પેન્શનધારકો માટે મહત્વના સમાચાર છે. જેની તેઓ આતુરતાથી રાહ જોઈ રહ્યા છે તે '8મા પગાર પંચ' (8th Pay Commission) ને લઈને એક મોટું અને સત્તાવાર અપડેટ સામે આવ્યું છે. મંગળવારે, 3 February, 2026 ના રોજ 'રાજ્યસભા' (Rajya Sabha) માં સરકારે સ્પષ્ટતા કરી દીધી છે કે પગાર પંચનું ગઠન થઈ ચૂક્યું છે અને તે નિર્ધારિત સમયમર્યાદામાં જ પોતાની ભલામણો રજૂ કરશે.
રાજ્યસભા સાંસદ જાવેદ અલી ખાનના પ્રશ્નનો લેખિત જવાબ આપતા કેન્દ્રીય 'નાણા રાજ્યમંત્રી' (MoS Finance) પંકજ ચૌધરીએ જણાવ્યું હતું કે, સરકારે 3 November, 2025 ના રોજ 8મા પગાર પંચની રચનાનું નોટિફિકેશન બહાર પાડ્યું હતું. આ તારીખથી જ પંચનું કામકાજ સત્તાવાર રીતે શરૂ થયેલું ગણવામાં આવે છે અને ત્યારથી જ તેની સમયમર્યાદાનું 'કાઉન્ટડાઉન' (Countdown) પણ શરૂ થઈ ગયું છે.
સરકારના નોટિફિકેશન અને નિયમો મુજબ, પગાર પંચે તેની રચનાની તારીખથી '18 મહિના' (18 Months) ની અંદર સરકારને પોતાનો રિપોર્ટ અને ભલામણો સોંપવાની રહેશે. પ્રગતિની વાત કરીએ તો, જાન્યુઆરી 2026 માં જ 'સ્ટાફ સાઈડ' (NC-JCM) દ્વારા માહિતી આપવામાં આવી હતી કે પંચને ઓફિસ ફાળવી દેવામાં આવી છે અને જરૂરી સ્ટાફની નિમણૂક પ્રક્રિયા પણ શરૂ થઈ ગઈ છે.
મંત્રીશ્રીએ પંચની કાર્યપદ્ધતિ વિશે સ્પષ્ટ કર્યું કે 8મું પગાર પંચ કેન્દ્ર સરકારના કર્મચારીઓના 'પગાર માળખા' (Salary Structure), વિવિધ પ્રકારના 'ભથ્થાં' (Allowances) અને 'પેન્શન' (Pension) સંબંધિત તમામ પાસાઓનો ઝીણવટભર્યો અભ્યાસ કરશે. આ વ્યાપક સમીક્ષા બાદ તૈયાર થયેલા રિપોર્ટના આધારે જ સરકાર ભવિષ્યના વેતન વધારાના નિર્ણયો લેશે.
એક અન્ય મહત્વના પ્રશ્નના જવાબમાં સરકારે પેન્શનરોની મોટી ચિંતા દૂર કરી છે. કર્મચારીઓમાં એવી આશંકા હતી કે શું 'નાણા બિલ 2025' (Finance Bill 2025) સરકારને નિવૃત્તિ તારીખના આધારે પેન્શનરો વચ્ચે ભેદભાવ કરવાની સત્તા આપે છે? આ અંગે પંકજ ચૌધરીએ સ્પષ્ટ કર્યું કે નિવૃત્તિની તારીખના આધારે પેન્શનરો વચ્ચે કોઈ જ ભેદભાવ રાખવામાં આવશે નહીં.
પેન્શનના નિયમો અંગે વધુ ફોડ પાડતા સરકારે જણાવ્યું કે કેન્દ્રીય કર્મચારીઓના પેન્શન હાલના 'CCS (Pension) Rules, 2021' અને 'CCS (Extraordinary Pension) Rules, 2023' મુજબ જ નક્કી થશે. હાલના નાગરિક કે સંરક્ષણ પેન્શનના નિયમોમાં કોઈ ફેરફાર કરવામાં આવ્યો નથી, જેથી પેન્શનરોએ ગભરાવાની જરૂર નથી.
આમ, સંસદમાં સરકારના જવાબ પરથી સ્પષ્ટ થાય છે કે પગાર પંચનું કામકાજ રાબેતા મુજબ ચાલી રહ્યું છે. આગામી દોઢ વર્ષની અંદર પંચ રિપોર્ટ સોંપશે અને ત્યારબાદ કેન્દ્રીય કર્મચારીઓને પગાર વધારાનો લાભ મળવાની શક્યતા છે.
ટોપ સ્ટોરી
ટ્રેન્ડિંગ સમાચાર
