NMACC ન્યુ યોર્કમાં ૩-દિવસીય 'ઇન્ડિયા વીકેન્ડ'નું આયોજન કરશે: ભારતીય કલા, સંસ્કૃતિ અને ફેશનનો ભવ્ય ઉત્સવ
૧૨ થી ૧૪ સપ્ટેમ્બર, ૨૦૨૫ દરમિયાન ડેવિડ એચ. કોચ થિયેટરમાં યોજાશે; 'ધ ગ્રેટ ઇન્ડિયન મ્યુઝિકલ'નું યુએસ પ્રીમિયર અને મનીષ મલ્હોત્રાનો 'સ્વદેશ ફેશન શો' મુખ્ય આકર્ષણ.
Nita Ambani cultural event New York: ભારતીય કલા અને સંસ્કૃતિના પ્રચાર-પ્રસાર માટે પ્રતિબદ્ધ, નીતા મુકેશ અંબાણી કલ્ચરલ સેન્ટર (NMACC) હવે વૈશ્વિક મંચ પર પોતાની છાપ છોડવા સજ્જ છે. સેન્ટર દ્વારા આગામી વર્ષે સપ્ટેમ્બર માસમાં અમેરિકાના ન્યૂયોર્ક શહેરમાં 'નીતા મુકેશ અંબાણી કલ્ચરલ સેન્ટર ઇન્ડિયા વીકેન્ડ'ની પ્રથમ ભવ્ય આવૃત્તિનું આયોજન કરવાની ઘોષણા કરવામાં આવી છે. આ ત્રિદિવસીય સાંસ્કૃતિક મહોત્સવ ૧૨ થી ૧૪ સપ્ટેમ્બર, ૨૦૨૫ દરમિયાન ન્યૂયોર્કના પ્રતિષ્ઠિત ડેવિડ એચ. કોચ થિયેટરમાં યોજાશે, જ્યાં ભારતીય પરંપરા અને આધુનિકતાનો અનોખો સમન્વય જોવા મળશે.
ભારતની શ્રેષ્ઠતા વિશ્વ સમક્ષ
આ મહત્વકાંક્ષી પહેલ અંગે NMACCના સ્થાપક અને અધ્યક્ષા શ્રીમતી નીતા અંબાણીએ જણાવ્યું હતું કે, "ભારતમાં વિશ્વની શ્રેષ્ઠતા દર્શાવવી અને ભારતની શ્રેષ્ઠતાને વિશ્વ સમક્ષ લાવવાનું અમારું હંમેશા લક્ષ્ય રહ્યું છે. અમે 'નીતા મુકેશ અંબાણી કલ્ચરલ સેન્ટર ઇન્ડિયા વીકેન્ડ'ને પ્રથમ વખત ન્યૂયોર્ક શહેરમાં પ્રસ્તુત કરવા માટે અત્યંત ઉત્સાહિત છીએ! આ કાર્યક્રમ ભારતના સમૃદ્ધ સાંસ્કૃતિક વારસા – આપણી કલા, હસ્તકલા, સંગીત, નૃત્ય, ફેશન અને સ્વાદિષ્ટ ભોજન – ની વૈશ્વિક ઉજવણી તરીકે પરિકલ્પિત કરવામાં આવ્યો છે."
'ધ ગ્રેટ ઇન્ડિયન મ્યુઝિકલ' થી ભવ્ય શરૂઆત
આ સાંસ્કૃતિક મહોત્સવનો શુભારંભ ભારતના સૌથી ભવ્ય અને વખણાયેલા નાટ્ય નિર્માણ 'ધ ગ્રેટ ઇન્ડિયન મ્યુઝિકલ: સિવિલાઇઝેશન ટુ નેશન'ના યુનાઇટેડ સ્ટેટ્સ પ્રીમિયર સાથે થશે. સુપ્રસિદ્ધ દિગ્દર્શક ફિરોઝ અબ્બાસ ખાન દ્વારા દિગ્દર્શિત આ મ્યુઝિકલ, ઈ.સ. પૂર્વે ૫,૦૦૦ થી લઈને ૧૯૪૭માં ભારતની સ્વતંત્રતા સુધીની ગૌરવશાળી સફરને નૃત્ય, કલા, ફેશન અને સંગીતના અદ્ભુત તાલમેલ દ્વારા જીવંત કરશે. આ પ્રસ્તુતિ ભારતીય સંસ્કૃતિની ગહનતા અને વિવિધતાને વૈશ્વિક દર્શકો સમક્ષ ઉજાગર કરશે.
ઉદ્ઘાટન સમારોહમાં 'સ્વદેશ ફેશન શો' અને સ્વાદનો જલસો
કાર્યક્રમનો ઉદ્ઘાટન સમારોહ ૧૨ સપ્ટેમ્બરના રોજ યોજાશે, જેની શાનદાર શરૂઆત 'સ્વદેશ ફેશન શો' થી થશે. આ વિશેષ ફેશન શોનું કુશળ સંચાલન ભારતના ખ્યાતનામ ડિઝાઇનર મનીષ મલ્હોત્રા દ્વારા કરવામાં આવશે. આ શોમાં ભારતના પ્રખ્યાત પરંપરાગત વણકરો અને કુશળ કારીગરોની અદભૂત કલાકૃતિઓ પ્રદર્શિત કરવામાં આવશે, જે ભારતીય વસ્ત્રકળાની સમૃદ્ધિ દર્શાવશે.
ત્યારબાદ, તે જ સાંજે, મિશેલિન-સ્ટાર શેફ વિકાસ ખન્ના દ્વારા પ્રાચીન ભારતથી લઈને આધુનિક ભારત સુધીની વાનગીઓ અને સ્વાદોની એક અવિસ્મરણીય રાંધણ પ્રસ્તુતિ કરવામાં આવશે. આ ગેસ્ટ્રોનોમિકલ જર્ની ભારતીય ભોજનની વૈવિધ્યતા અને ઉત્કૃષ્ટતાનો અનુભવ કરાવશે.
ટોપ સ્ટોરી
ટ્રેન્ડિંગ સમાચાર
