હવે રોકડ ઉપાડવા ATM જવાની જરૂરત નથી, ફક્ત એક સ્કેનથી મળશે રોકડ, જાણો કેવી રીતે?
NPCIએ RBI પાસે માંગી મંજૂરી, 20 લાખથી વધુ દુકાનો પર મળશે ₹10,000 સુધી ઉપાડવાની સુવિધા.
UPI cash withdrawal: ડિજિટલ પેમેન્ટ્સને વધુ સરળ અને સુલભ બનાવવા માટે નેશનલ પેમેન્ટ્સ કોર્પોરેશન ઓફ ઇન્ડિયા (NPCI) એક મહત્ત્વપૂર્ણ પગલું ભરવા જઈ રહ્યું છે. એક અહેવાલ મુજબ, NPCI એ રિઝર્વ બેંક ઓફ ઇન્ડિયા (RBI) પાસે UPI દ્વારા રોકડ ઉપાડવાની સુવિધા માટે મંજૂરી માંગી છે. જો આ મંજૂરી મળે તો, દેશભરના 20 લાખથી વધુ બિઝનેસ કોરસપોન્ડન્ટ (BC) આઉટલેટ્સ પર લોકો ફક્ત તેમના ફોનથી QR કોડ સ્કેન કરીને ₹10,000 સુધીની રોકડ ઉપાડી શકશે. આ નવી સિસ્ટમ ખાસ કરીને ગ્રામીણ અને દૂરના વિસ્તારોમાં બેંકિંગ સેવાઓને વધુ સરળ બનાવશે.
QR કોડ સ્કેન કરો અને પૈસા ઉપાડો
હાલમાં, UPI આધારિત રોકડ ઉપાડની સુવિધા અમુક પસંદગીના ATM અને દુકાનોમાં જ ઉપલબ્ધ છે, જેમાં શહેરોમાં ₹1,000 અને ગામડાઓમાં ₹2,000 ની મર્યાદા નક્કી કરાઈ છે. પરંતુ, NPCI દ્વારા પ્રસ્તાવિત નવી યોજના હેઠળ, આ મર્યાદા વધારીને ₹10,000 સુધી કરવામાં આવી શકે છે. આ નવી સિસ્ટમ હેઠળ, ગ્રાહકો ફક્ત તેમના સ્માર્ટફોન પરની કોઈપણ UPI એપ્લિકેશનનો ઉપયોગ કરીને BC આઉટલેટ્સ પરના QR કોડને સ્કેન કરીને સરળતાથી રોકડ મેળવી શકશે. આનાથી એવા ગ્રાહકોને ખાસ ફાયદો થશે, જેમને ફિંગરપ્રિન્ટ ઓથેન્ટિકેશનમાં મુશ્કેલી પડે છે અથવા જેઓ ડેબિટ કાર્ડનો ઉપયોગ કરવાથી ખચકાય છે.
બિઝનેસ કોરસપોન્ડન્ટ્સ એટલે શું?
બિઝનેસ કોરસપોન્ડન્ટ્સ (BC) એ સ્થાનિક એજન્ટો છે જે દૂરના વિસ્તારોમાં બેંકિંગ સેવાઓ પૂરી પાડે છે, જ્યાં બેંકની શાખાઓ કે ATM ઉપલબ્ધ નથી. તેઓ બેંકની સેવાઓનું વિસ્તરણ કરીને લોકો સુધી પહોંચવામાં મદદ કરે છે. આ BC કોઈ દુકાનદાર, સ્વૈચ્છિક સંસ્થા (NGO) કે વ્યક્તિગત એજન્ટ પણ હોઈ શકે છે. અત્યાર સુધી, લોકો આધાર-આધારિત પ્રમાણીકરણ અથવા ડેબિટ કાર્ડનો ઉપયોગ કરીને જ BC પાસેથી પૈસા ઉપાડતા હતા. હવે UPI દ્વારા રોકડ ઉપાડની સુવિધા શરૂ થતા, આ પ્રક્રિયા વધુ ઝડપી અને સરળ બનશે.
ગ્રાહકો માટે નવી સુવિધા
NPCI નો આ પ્રસ્તાવ ડિજિટલ ઇન્ડિયાના લક્ષ્યને વધુ મજબૂત બનાવશે. લાખો નાના સર્વિસ પોઈન્ટ્સ અને દુકાનદારોને આ માટે QR કોડ પૂરા પાડવામાં આવશે, જેનાથી તેઓ નાની બેંક શાખાઓની જેમ કામ કરી શકશે. આનાથી રોકડ ઉપાડ માટે ATM કે બેંકની શોધમાં ભટકવાની જરૂર નહીં પડે અને સમયનો પણ બચાવ થશે. આ નવી સિસ્ટમ ખાસ કરીને ગ્રામીણ વિસ્તારોમાં નાણાકીય સમાવેશને વેગ આપશે અને લોકોને આધુનિક બેંકિંગ સેવાઓનો લાભ મેળવવામાં મદદ કરશે. NPCI એ વર્ષ 2016 માં UPI ની શરૂઆત કરી હતી, અને આ નવી સુવિધા તેનું જ એક મોટું વિસ્તરણ ગણી શકાય.
ટોપ સ્ટોરી
ટ્રેન્ડિંગ સમાચાર
