શું ગુજરાત પર કોઈ મોટો ખતરો છે? DGP એ તમામ SP અને કમિશનરોને આપ્યું 100 કલાકનું અલ્ટીમેટમ, 30 વર્ષનો રેકોર્ડ તપાસાશે
Gujarat high alert: રાષ્ટ્ર વિરોધી તત્વોમાં ફફડાટ: તમામ SP અને CP ને તાકીદનો આદેશ, જૂના ગુનેગારોનું વેરિફિકેશન કરી તાત્કાલિક 'ડોઝીઅર' તૈયાર કરવા સૂચના.
Gujarat high alert: દિલ્હીમાં થયેલા બોમ્બ બ્લાસ્ટના ગંભીર પ્રત્યાઘાતો ગુજરાતની સુરક્ષા વ્યવસ્થા પર પણ જોવા મળી રહ્યા છે. રાજ્યની સુરક્ષાને અભેદ બનાવવા માટે ગુજરાતના પોલીસ વડા (DGP) વિકાસ સહાયે તાત્કાલિક અસરથી એક મહત્વપૂર્ણ આદેશ જારી કર્યો છે. આ આદેશ અંતર્ગત રાજ્યના તમામ જિલ્લા અને શહેરના પોલીસ વડાઓને અલ્ટીમેટમ આપવામાં આવ્યું છે કે, છેલ્લા 30 વર્ષ દરમિયાન રાષ્ટ્ર વિરોધી પ્રવૃત્તિઓમાં સંડોવાયેલા કે પકડાયેલા તમામ આરોપીઓનું માત્ર 100 કલાકની અંદર સઘન વેરિફિકેશન કરવામાં આવે. આ ઝુંબેશનો મુખ્ય ઉદ્દેશ્ય આવા તત્વોનો વર્તમાન ડેટાબેઝ અપડેટ કરવાનો અને કોઈ પણ અનિચ્છનીય પ્રવૃત્તિને ડામી દેવાનો છે.
100 કલાકનું અલ્ટીમેટમ: પોલીસ તંત્ર એક્શન મોડમાં
રાજ્ય પોલીસ વડા વિકાસ સહાય દ્વારા ગુજરાતના તમામ પોલીસ કમિશનર (CP) અને જિલ્લા પોલીસ અધિક્ષક (SP) ને સ્પષ્ટ સૂચના આપવામાં આવી છે કે સુરક્ષા બાબતે કોઈ પણ પ્રકારની ઢીલ ચલાવી લેવામાં આવશે નહીં. દિલ્હીની ઘટના બાદ સતર્કતાના ભાગરૂપે, DGPએ એક વિશેષ ડ્રાઈવ શરૂ કરી છે. જેમાં પોલીસ અધિકારીઓને આગામી 100 કલાકની સમયમર્યાદામાં કામગીરી પૂર્ણ કરવાનો ટાર્ગેટ આપવામાં આવ્યો છે. આ સમયગાળા દરમિયાન પોલીસે તેમના વિસ્તારના જુના રેકોર્ડ્સ તપાસીને ગ્રાઉન્ડ લેવલે વેરિફિકેશન કરવાનું રહેશે.
30 વર્ષના ઈતિહાસનું થશે 'પોસ્ટમોર્ટમ'
આ તપાસ માત્ર વર્તમાન સમય પૂરતી સીમિત નથી. આદેશ અનુસાર, છેલ્લા 30 વર્ષના સમયગાળા દરમિયાન ગુજરાતના અલગ-અલગ પોલીસ સ્ટેશનોમાં જે કોઈ પણ વ્યક્તિ રાષ્ટ્ર વિરોધી પ્રવૃત્તિઓ, આતંકવાદી ગતિવિધિઓ અથવા દેશની સુરક્ષાને જોખમમાં મૂકતા ગુનાઓમાં પકડાયા હોય, તેવા તમામ લોકોની યાદી તૈયાર કરવામાં આવશે. 3 દાયકાના આ રેકોર્ડને તપાસીને હાલ આ શખ્સો ક્યાં છે અને શું કરી રહ્યા છે, તેની ઝીણવટભરી તપાસ કરવામાં આવશે.
Gujarat Police has vigorously started checking all accused of last 30 years who were involved in anti national activities. Instructions have been issued that this checking should be completed in the next 100 hours by all Police Stations. @GujaratPolice remains ever vigilant to… pic.twitter.com/8DFMW4ZxoB
— DGP Gujarat (@dgpgujarat) November 17, 2025
'ડોઝીઅર' તૈયાર કરવાની પ્રક્રિયા
માત્ર યાદી બનાવવી પૂરતી નથી, પરંતુ તેનું વેરિફિકેશન કર્યા બાદ એક વિગતવાર અહેવાલ એટલે કે 'ડોઝીઅર' (Dossier) તૈયાર કરવાનો આદેશ આપવામાં આવ્યો છે. આ ડોઝીઅરમાં આરોપીની ગુનાહિત પૃષ્ઠભૂમિ, તેની હાલની પ્રવૃત્તિઓ, સંપર્કો અને રહેઠાણ સહિતની તમામ વિગતો અપડેટ કરવામાં આવશે. આ પ્રક્રિયા પૂર્ણ થયા બાદ ફાઈનલ રિપોર્ટ 100 કલાક પૂરા થતાં જ DGP ઓફિસને સુપરત કરવાનો રહેશે.
સ્લીપર સેલ અને સંગઠિત ગુનાખોરી પર પ્રહાર
પોલીસ વડાના આ નિર્ણય પાછળનો મુખ્ય હેતુ રાજ્યમાં શાંતિ અને સલામતી જાળવી રાખવાનો છે. ઘણીવાર જૂના ગુનેગારો અથવા સ્લીપર સેલ નિષ્ક્રિય થઈને સામાન્ય જીવન જીવતા હોય છે અને તક મળ્યે ફરી સક્રિય થતા હોય છે. આ 100 કલાકના સઘન ચેકિંગ દ્વારા પોલીસ આવા તત્વોને ફરીથી સક્રિય થતા અટકાવવા માંગે છે અને ઇન્ટેલિજન્સ બ્યુરો પાસે એક અપડેટેડ ડેટાબેઝ તૈયાર રહે તે સુનિશ્ચિત કરવા માંગે છે.
ટોપ સ્ટોરી
ટ્રેન્ડિંગ સમાચાર
