Bhavnagar News : ભાવનગરમાં જુગાર પર રેડ દરમિયાન ભાગવા જતાં કૂવામાં ખાબકતા 3 યુવકોના મોત

Bhavnagar News : ભાવનગરમાં જુગાર પર રેડ દરમિયાન ભાગવા જતાં કૂવામાં ખાબકતા 3 યુવકોના મોત

Bhavnagar Police Raid News: ભાવનગરમાં એક ચકચારી ઘટનાથી અફરાતફરી મચી ગઇ છે. ભાવનગર તાલુકાના ઉખરલા ગામમાં વાડી વિસ્તારમાં આવેલ એક કૂવામાં પડી જવાથી રાહુલ ચૌહાણ, નિલેશ ડાભી અને અજીતસિંહ નામના ત્રણ યુવકોના કરુણ મોત નિપજ્યા છે. જુગાર રમવા બાબતે પોલીસ દરોડા દરમિયાન ભાગવા જતાં આ દુર્ઘટના ઘટી હોવાનું અનુમાન છે. ઘટનાને પગલે ભાવનગર સિવિલ હોસ્પિટલ ખાતે મોટી સંખ્યામાં લોકોના ટોળાં ઉમટી પડ્યા હતા.

ભાવનગરના ઉખરલા ગામના સીમ વિસ્તારમાં આવેલી વાડીમાં આ ચકચારી ઘટના ઘટી હતી. મળતી માહિતી અનુસાર, વાડી વિસ્તારમાં કેટલાક યુવકો એકત્રિત થઈને જુગાર રમી રહ્યા હતા. તે જ સમયે સ્થળ પર પહોંચેલી પોલીસની ટીમથી બચવા અને ભાગદોડ મચતાં અંધારામાં ત્રણ યુવકો નજીકમાં આવેલા ઊંડા કૂવામાં ખાબક્યા હતા. કૂવામાં પાણી હોવાના કારણે ત્રણેય યુવાનોનું ડૂબી જવાથી સ્થળ પર જ મોત નીપજ્યું હતું. સ્થાનિકોની મદદથી ત્રણેય યુવકોના મૃતદેહોને બહાર કાઢી પીએમ અર્થે ભાવનગર સિવિલ હોસ્પિટલ ખસેડવામાં આવ્યા હતા. જ્યાં મૃતકોના સ્વજનો અને સ્થાનિક લોકો મોટી સંખ્યામાં એકત્રિત થઈ ગયા હતા. આ મામલે પરિવારે ગંભીર આક્ષેપ કર્યો છે કે પોલીસની રેડ દરમિયાન જ ભાગવા જતાં આ દુર્ઘટના બની હતી. બીજી તરફ, પોલીસે ઘટના સમયે રેડ પાડવામાં આવી હોવાની વાતનો સ્પષ્ટ ઇનકાર કર્યો છે, જેના કારણે પોલીસ અને પરિવાર વચ્ચે ઘર્ષણની સ્થિતિ સર્જાઈ છે.