Gujarat Govt Recruitment: 'હવે સરકારી ભરતી વર્ષોમાં નહીં, મહિનાઓમાં પૂર્ણ થશે', GARC એ CM ને સોંપ્યો રિપોર્ટ; કરાઈ આ 9 મોટી ભલામણો
Gujarat Govt Recruitment: ડૉ. હસમુખ અઢિયાની અધ્યક્ષતામાં વહીવટી સુધારણા પંચનો માસ્ટર પ્લાન: કોમન એન્ટ્રન્સ ટેસ્ટ (CET) અને સંપૂર્ણ ડિજિટલ વેરિફિકેશન સાથે ભરતી પ્રક્રિયા બનશે સુપરફાસ્ટ.
Gujarat Govt Recruitment: ગુજરાતમાં સરકારી નોકરી માટે રાત-દિવસ મહેનત કરતા લાખો યુવાનો માટે અત્યંત રાહતના અને મોટા સમાચાર આવ્યા છે. સરકારી ભરતી પ્રક્રિયામાં થતા અસહ્ય વિલંબને નિવારવા માટે ગુજરાત વહીવટી સુધારણા પંચ (GARC) એ એક ક્રાંતિકારી બ્લુપ્રિન્ટ તૈયાર કરી છે. પંચના અધ્યક્ષ ડૉ. હસમુખ અઢિયાએ મુખ્યમંત્રી ભૂપેન્દ્ર પટેલને સુપરત કરેલા છઠ્ઠા અહેવાલમાં ભરતી પ્રક્રિયાને ઝડપી, પારદર્શક અને સરળ બનાવવા માટે 9 મહત્વપૂર્ણ ભલામણો કરી છે. આ રિપોર્ટનો મુખ્ય ઉદ્દેશ્ય કોઈપણ સરકારી ભરતી પ્રક્રિયાને વધુમાં વધુ 1 વર્ષની સમયમર્યાદામાં પૂર્ણ કરવાનો છે, જેથી ઉમેદવારોનો કિંમતી સમય બગડે નહીં.
ભરતી પ્રક્રિયામાં ક્રાંતિકારી બદલાવ માટેની 9 ભલામણો
GARC દ્વારા સૂચવવામાં આવેલા સુધારાઓ જો અમલમાં આવશે તો ઉમેદવારોને મોટી રાહત મળશે. રિપોર્ટની મુખ્ય બાબતો નીચે મુજબ છે:
1. સમયમર્યાદા નિશ્ચિત કરાઈ (Fixed Timeline)
હવે ભરતી પ્રક્રિયા લાંબી નહીં ખેંચાય. પંચે ભલામણ કરી છે કે જે ભરતી 3 તબક્કામાં (સ્ટેજમાં) થતી હોય, તેને 9 થી 12 મહિનામાં પૂર્ણ કરવી. જ્યારે 2 તબક્કાવાળી પરીક્ષાઓ માટે 6 થી 9 મહિનાની સમયમર્યાદા નક્કી કરવામાં આવી છે. ભવિષ્યમાં આ સમયગાળો હજુ ઘટાડવાનો લક્ષ્યાંક છે.
2. કોમન એન્ટ્રન્સ ટેસ્ટ (CET)
એક સમાન લાયકાત ધરાવતી અલગ-અલગ કેડર માટે વારંવાર પરીક્ષાઓ આપવાને બદલે હવે એકરૂપતા લાવવામાં આવશે. આ માટે સંયુક્ત પ્રીલિમ્સ અને વિષયવાર મેઈન્સ પરીક્ષા યોજવી અથવા 'કોમન એન્ટ્રન્સ ટેસ્ટ' દાખલ કરવી. આનાથી વહીવટી ખર્ચ ઘટશે અને પ્રક્રિયા ઝડપી બનશે.
3. વર્ષમાં બે વાર માંગણી પત્રક (Requisition Windows)
દરેક વિભાગોએ જ્યારે ઈચ્છા થાય ત્યારે ભરતી બહાર પાડવાને બદલે શિસ્તબદ્ધ થવું પડશે. દર વર્ષે બે ચોક્કસ 'રિક્વિઝિશન વિન્ડો' નક્કી કરવામાં આવશે, જેમાં તમામ વિભાગોએ ઓનલાઇન માંગણી પત્રક સબમિટ કરવાના રહેશે. આ માટે એક કેન્દ્રીય સેલની રચના કરવામાં આવશે.
4. દસ્તાવેજોનું ડિજિટલ વેરિફિકેશન
હાલની મેન્યુઅલ પદ્ધતિને બદલે હવે 'સંપૂર્ણ ડિજિટલ ડોક્યુમેન્ટ વેરિફિકેશન' (IASS) અમલમાં આવશે. ડિજી-લોકરની જેમ API-લિંક્ડ ડેટાબેઝ અને યુનિક રજિસ્ટ્રી દ્વારા દસ્તાવેજોની ચકાસણી થશે, જે પ્રક્રિયાને ઝડપી અને ભૂલરહિત બનાવશે.
5. ઉમેદવાર માટે હાઈ-ટેક ડેશબોર્ડ
ઉમેદવારોની સુવિધા માટે 'એન્ડ ટુ એન્ડ ડેશબોર્ડ' બનાવવામાં આવશે. ઉમેદવારને એક યુનિક ID મળશે, જેના દ્વારા તે અરજીથી લઈને નિમણૂક સુધીની તમામ પ્રક્રિયા ટ્રેક કરી શકશે. એટલું જ નહીં, જિલ્લાવાર પોસ્ટિંગ માટે પણ ડિજિટલ માધ્યમથી જ પસંદગીની તક મળશે.
6. 'ઈઝ ઓફ ડુઇંગ' અપ્રોચ
એકીકૃત ડિજિટલ પોર્ટલ દ્વારા તમામ એજન્સીઓ અને ઉમેદવારો એકબીજા સાથે જોડાયેલા રહેશે. આના કારણે ઉમેદવારે એકના એક દસ્તાવેજો અલગ-અલગ ભરતી બોર્ડ સમક્ષ વારંવાર રજૂ કરવાની જરૂર રહેશે નહીં.
7. મેડિકલ ભરતી માટે નવું બોર્ડ (MSRB)
આરોગ્ય વિભાગમાં તબીબી નિષ્ણાતોની ભરતી ઝડપી બનાવવા માટે અલગથી 'મેડિકલ સર્વિસીઝ રિક્રૂટમેન્ટ બોર્ડ' (MSRB) ની રચના કરવાની ભલામણ કરવામાં આવી છે. સાથે જ GSSSB અને GPSSB જેવી સંસ્થાઓને GPSC જેવી સ્વાયત્તતા આપવાનું સૂચન છે.
8. કોમ્પ્યુટર આધારિત પરીક્ષાઓ (CBT)
પારદર્શિતા વધારવા અને ગેરરીતિ રોકવા માટે રાજ્યમાં શક્ય તેટલી પરીક્ષાઓ 'કોમ્પ્યુટર બેઝ્ડ' લેવા પર ભાર મૂકવામાં આવ્યો છે. આના પર દેખરેખ રાખવા માટે દરેક એજન્સીમાં 'એક્ઝામ મોનિટરિંગ યુનિટ' (EMU) સ્થપાશે.
9. આગામી 10 વર્ષનું કેલેન્ડર
ભવિષ્યનું પ્લાનિંગ અત્યારથી જ થશે. દરેક વિભાગની જરૂરિયાતોને ધ્યાનમાં રાખીને 10 વર્ષનું ભરતી કેલેન્ડર તૈયાર કરવામાં આવશે. જેમાં ઈમરજન્સી સર્વિસ અને ક્રિટિકલ કેડરની ભરતીને પ્રાથમિકતા આપવામાં આવશે.
ટોપ સ્ટોરી
ટ્રેન્ડિંગ સમાચાર
