Gujarat Rain: વીજળીના કડાકા સાથે આજે આ જિલ્લાઓમાં ધોધમાર વરસાદનું એલર્ટ 

રાજ્યમાં જૂન મહિનાથી જ અનેક જિલ્લાઓમાં વરસાદ ધમાકેદાર બેટિંગ કરી રહ્યો છે. જૂલાઈમાં પણ હવામાન વિભાગે ભારે વરસાદની આગાહી કરી છે.

પ્રતિકાત્મક તસવીર

Source : તસવીર સોશિયલ મીડિયા

અમદાવાદ :  રાજ્યમાં જૂન મહિનાથી જ અનેક જિલ્લાઓમાં વરસાદ ધમાકેદાર બેટિંગ કરી રહ્યો છે. જૂલાઈમાં પણ હવામાન વિભાગે ભારે વરસાદની આગાહી કરી છે. હવામાન વિભાગની આગાહી મુજબ આજે વરસાદ રાજ્યના અનેક જિલ્લાઓમાં ધમાકેદાર બેટિંગ કરશે.  12 જૂલાઈથી લઈ 17 જૂલાઈ સુધી વરસાદનું એલર્ટ જાહેર કરવામાં આવ્યું છે. હવામાન વિભાગે આગામી 17 જુલાઈ સુધી છૂટાછવાયા સ્થળોએ ગાજવીજ સાથે ભારે વરસાદની આગાહીનું અનુમાન વ્યક્ત કર્યું છે.

આજે આ જિલ્લાઓમાં ખાબકશે વરસાદ

હવામાન વિભાગની આગાહી મુજબ આજે રાજ્યના 7 જિલ્લાઓમાં ભારે વરસાદની આગાહી કરવામાં આવી છે.   અરવલ્લી, મહિસાગર, દાહોદ, અમરેલી, ભાવનગર, નવસારી, વલસાડ અને દમણ અને દાદરા નગર હવેલીમાં આજે ભારે વરસાદનું અનુમાન હવામાન વિભાગ દ્વારા વ્યક્ત કરવામાં આવ્યું છે. આ સિવાય સૌરાષ્ટ્રના અનેક જિલ્લાઓમાં સામાન્યથી લઈ મધ્યમ વરસાદની આગાહી છે. અમદાવાદ અને ગાંધીનગરમાં પણ આજે વરસાદનું એલર્ટ છે. 

હવામાન વિભાગની આગાહી પ્રમાણે રાજ્યમાં હવે 14 જુલાઈએ 11 જિલ્લાઓમાં ભારે વરસાદની આગાહી કરવામાં આવી છે. જ્યારે 15મી તારીખે 9 જિલ્લાઓમાં ભારે વરસાદની આગાહી કરવામાં આવી છે. ગુજરાતમાં સતત છેલ્લા કેટલાય દિવસોથી ભારે વરસાદની સ્થિતિ જોવા મળી રહી છે. ચોમાસાની શરૂઆત થતાની સાથે મેઘરાજાએ શાનદાર બેટિંગ કરી છે.

13 જૂલાઈના રોજ આ જિલ્લાઓમાં વરસાદનું અનુમાન

13 જૂલાઈ ઉત્તર અને મધ્ય ગુજરાતમાં વરસાદનું અનુમાન છે. કેટલાક જિલ્લાઓમાં હવામાન વિભાગે યલો એલર્ટ જાહેર કર્યુ છે. જેમાં બનાસકાંઠા, સાબરકાંઠા, મહેસાણા, અરવલ્લી, મહીસાગર, દાહોદ, પંચમહાલ, છોટા ઉદેપુર, નર્મદા, નવસારી, વલસાડ જિલ્લામાં ભારે વરસાદની આગાહી વ્યક્ત કરવામાં આવી છે.

અમદાવાદ અને ગાંધીનગરમાં વરસાદની આગાહી

હવામાન વિભાગે વધુમાં  હાલમાં મોન્સૂન ટ્રફ સક્રિય થતા 24 કલાક બાદથી વરસાદી માહોલ જામશે.  અમદાવાદ અને ગાંધીનગરમાં વીજળીના કડાકા સાથે છૂટાછવાયા હળવા વરસાદની આગાહી કરવામાં આવી છે.

રાજ્યના 207 જળાશયોમાં 54 ટકા જળ સંગ્રહ

રાજ્યમાં ચોમાસાની ઋતુમાં સાર્વત્રિક મેઘમહેરના પરિણામે હાલની સ્થિતિએ સરદાર સરોવર સહિત રાજ્યના 207 જળાશયોમાં કુલ સંગ્રહ શક્તિના 54 ટકા જળ સંગ્રહ થયો છે. ગુજરાતની જીવાદોરી સમાન સરદાર સરોવર યોજનામાં હાલમાં કુલ સંગ્રહ શક્તિના 49.42 ટકા પાણીનો જથ્થો ઉપલબ્ધ છે. ગત વર્ષે આ સમયે એટલે કે, તા. 11 જુલાઈ-2024ની સ્થિતિએ રાજ્યના 207 જળાશયોમાં 39.55  ટકા જળ સંગ્રહ હતો.