Porbandar Rain: પોરબંદરના બરડા પંથકમાં ભારે પવન સાથે ધોધમાર વરસાદ
પોરબંદરના બરડા વિસ્તારમાં મેઘરાજા મન મૂકીને વરસ્યા છે. ગઈકાલ સવારથી આજ સવારના આઠ વાગ્યા સુધીમાં 24 કલાકમાં આઠ ઇંચ જેટલો વરસાદ વરસ્યો છે.
પોરબંદર: પોરબંદરના બરડા વિસ્તારમાં મેઘરાજા મન મૂકીને વરસ્યા છે. ગઈકાલ સવારથી આજ સવારના આઠ વાગ્યા સુધીમાં 24 કલાકમાં આઠ ઇંચ જેટલો વરસાદ પડતા વાડી ખેતરો રસ્તાઓ પાણીથી છલોછલ અને નદી નાળા તેમજ વોકળા ચેક ડેમો ઉપરથી પાણી વહેતા થયા છે. પોરબંદર જિલ્લામાં આજે પણ વહેલી સવારથી જ વરસાદી માહોલ જામ્યો છે.
છેલ્લા ત્રણ દિવસથી વરસાદી માહોલ
હાલમાં એકાદ મહિનાથી વરસાદ ખેંચાયો હતો અને ખેડૂતોના જીવ અધર ચડી ગયા હતા પરંતુ છેલ્લા ત્રણ દિવસથી વરસાદી માહોલ જામતા બે દિવસ છુટા છવાયા વરસાદી ઝાપટા આવ્યા અને ગઈકાલથી મેઘરાજાએ બરડા વિસ્તારમાં વરસવાનું ચાલુ કરતા બગવદર, ભારવાડા, કિદરખેડા, મોઢવાડા, વડાળા અને આબારામા ગામોમાં સવારથી સારો વરસાદ નોંધાયો છે.
બરડા ડુંગર નજીક આવેલ બખરલા, કાટવાણા, ગોઢાણા, નાગકા વગેરે ગામોમાં સાંજે 6:00 વાગ્યાથી સમગ્ર બરડા વિસ્તારમાં તમામ ગામોમાં સારો એવો વરસાદ નોંધાયો છે. 24 કલાકમાં છથી આઠ ઈંચ જેટલો વરસાદ નોંધાયો છે. ખેડૂતોના જણાવ્યા મુજબ અત્યારે મઘા નક્ષત્ર ચાલી રહ્યું છે અને મઘા નક્ષત્રમાં વરસાદ આવે તે કાચું સોનુ ગણાય છે.
આજે ધોધમાર વરસાદ થવાથી બરડા ડુંગર ઉપરથી પાણી વહેતું હોય જાણે ડુંગર ઉપરથી નદી આવતી હોય તેવા રમણીય દ્રશ્યો જોવા મળેલ અને ગોઢાણાથી ખીસ્ત્રી જતા રોડ ઉપર પણ નદી વહેતી હોય તેવા દ્રશ્ય જોવા મળ્યા હતા.
દરિયાકાંઠે 3 નંબરનું સિગ્નલ
રાજ્યમાં ભારે વરસાદની આગાહીના પગલે આગામી 5 દિવસ માછીમારોને દરિયો ન ખેડવાની સૂચના આપવામાં આવી છે. રાજ્યનાં સમગ્ર દરિયાકાંઠે 3 નંબરનું સિગ્નલ લગાવવામાં આવ્યું છે. હવામાન વિભાગે પાંચ દિવસ સુધી ભારેથી અતિભારે વરસાદનું અનુમાન વ્યક્ત કર્યું છે.
રાજ્યમાં અત્યંત ભારે વરસાદની આગાહી
એક સાથે 5 સિસ્ટમ સક્રિય થતા હજુ પણ રાજ્યમાં અત્યંત ભારે વરસાદ વરસી શકે છે તેમ હવામાન વિભાગ દ્વારા કહેવામાં આવ્યું છે. અમદાવાદ અને આસપાસના વિસ્તારોમાં ગાજવીજ સાથે માધ્યમથી ભારે વરસાદની સંભાવના છે. ડૉ. એ. કે. દાસ, ડાયરેક્ટર, હવામાન વિભાગ દ્વારા આ આગાહી કરવામાં આવી છે.
મેંદરડામાં સૌથી વધુ 12.5 ઈંચ વરસાદ
જૂનાગઢના વંથલી, મેંદરડા, કેશોદમાં ધોધમાર વરસાદ વરસ્યો છે. આજે મેંદરડામાં સૌથી વધુ 12.5 ઈંચ વરસાદ વરસતા શહેર બેટમાં ફેરવાયું છે. વરસાદના કારણે જૂનાગઢમાં નવ રસ્તા બંધ કરવામાં આવ્યા છે. જૂનાગઢમાં નીચાણવાળા 52 ગામોને એલર્ટ કરવામાં આવ્યા છે. માણાવદર-વંથલી તાલુકાના 35 ગામનો સંપર્ક તૂટ્યો છે. મેંદરડામાં ભારે વરસાદને પગલે જૂનાગઢ-મેંદરડા રોડ બંધ કરવામાં આવ્યો છે. રસ્તો પર પાણી ફરી વળ્યા છે. જ્યાં જુઓ ત્યાં પાણી જ જોવા મળી રહ્યું છે.
જૂનાગઢના મેંદરડામાં 4 કલાકમાં અનરાધાર 10 ઇંચ વરસાદ ખાબકતા જળબંબાકારની સ્થિતિ સર્જાઈ હતી. ભારે વરસાદના પગલે તમામ શાળાઓમાં રજા જાહેર કરવામાં આવી છે.
રાજ્યમાં અત્યાર સુધીમાં સરેરાશ 68.91 ટકા વરસાદ
રાજ્યમાં અત્યાર સુધીમાં સરેરાશ 68.91 ટકા વરસાદ વરસ્યો છે. જેમાં સૌથી વધુ 72 ટકા વરસાદ દક્ષિણ ગુજરાતમાં જ્યારે ઉત્તર ગુજરાતમાં 71 ટકા, કચ્છમાં 70 ટકા, પૂર્વ મધ્યમાં 69 ટકા વરસાદ નોંધાયો છે. સૌરાષ્ટ્રમાં 63 ટકાથી વધુ સરેરાશ વરસાદ નોંધાયો છે. રાજ્યમાં ફરી એક વખત વરસાદી માહોલ જામ્યો છે. સરદાર સરોવર સહિત રાજ્યના કુલ 207 ડેમમાંથી 76 ડેમ હાઈએલર્ટ એટલે કે 70 થી 100 ટકા વચ્ચે ભરાયા છે. જ્યારે 26 ડેમ એલર્ટ પર તેમજ 22 ડેમ વોર્નિંગ પર મૂકવામાં આવ્યા છે. રાજ્યની જીવાદોરી સમાન સરદાર સરોવર ડેમમાં 76 ટકાથી વધુ જળસંગ્રહ છે.
ટોપ સ્ટોરી
ટ્રેન્ડિંગ સમાચાર
