મુંબઈ સહિત મહારાષ્ટ્રમાં ચોમાસું બેસી ગયું, જાણો ગુજરાતમાં ક્યારથી ભારે વરસાદ તૂટી પડશે, હવામાન વિભાગની લેટેસ્ટ આગાહી
મહારાષ્ટ્રમાં ચોમાસું સક્રિય, શરૂઆતમાં નબળું રહ્યા બાદ ૧૨ થી ૧૫ જૂન વચ્ચે ચોમાસું ગતિ પકડશે તેવી આગાહી.
Monsoon 2025 Gujarat arrival date: ગુજરાતમાં ચોમાસાની આતુરતાનો અંત હવે નજીક આવી રહ્યો છે. આજે ૮ જૂન, ૨૦૨૫ થી મુંબઈ અને મહારાષ્ટ્રના મોટાભાગના વિસ્તારોમાં ચોમાસું સક્રિય થઈ ગયું છે, જેના પગલે આગામી ૧૦ જૂન આસપાસ ચોમાસું ગુજરાતના વલસાડ આસપાસ પહોંચી શકે તેવી શક્યતા છે.
ચોમાસાના આગમન અને પ્રારંભિક તબક્કાની આગાહી
હવામાન વિભાગના જણાવ્યા અનુસાર, શરૂઆતમાં રાજ્યમાં ચોમાસાનું આગમન થોડું નબળું રહી શકે છે. એટલે કે, પ્રારંભિક તબક્કામાં વ્યાપક અને ભારે વરસાદની શક્યતા ઓછી છે. જોકે, આ સ્થિતિ લાંબો સમય ટકશે નહીં.
૧૨ થી ૧૫ જૂન વચ્ચે સક્રિયતા: હવામાનશાસ્ત્રીઓના મતે, ૧૨ થી ૧૫ જૂન આસપાસ ચોમાસું વધુ સક્રિય થઈ જશે અને ગતિ પકડશે. આ સમયગાળા દરમિયાન રાજ્યના વિવિધ ભાગોમાં સારો વરસાદ જોવા મળી શકે છે.
મહારાષ્ટ્રમાં ચોમાસાના સક્રિયકરણથી ગુજરાતમાં તેના આગમનની આશા વધુ પ્રબળ બની છે. ખેડૂતો અને સામાન્ય નાગરિકો સૌ કોઈ આ કાળઝાળ ગરમીમાંથી રાહત મેળવવા માટે મેઘરાજાની રાહ જોઈ રહ્યા છે.
ગુજરાતમાં આગામી ૭ દિવસ છૂટાછવાયા વરસાદની આગાહી
ગુજરાતમાં ચોમાસાના આગમનની પ્રતીક્ષા વચ્ચે હવામાન વિભાગે આગામી ૭ દિવસ રાજ્યમાં છૂટાછવાયા વરસાદની આગાહી કરી છે. આજે, ૮ જૂન, ૨૦૨૫ ના રોજ સૌરાષ્ટ્ર અને દક્ષિણ ગુજરાતના કેટલાક જિલ્લાઓમાં મેઘમહેર થઈ શકે છે. બીજી તરફ, હવામાન નિષ્ણાત અંબાલાલ પટેલે પણ ગુજરાતમાં ચોમાસાના આગમન અને તેની ગતિવિધિ અંગે મહત્વપૂર્ણ આગાહીઓ કરી છે. તેમના મતે, રાજ્યમાં ચોમાસાનો પ્રારંભ ધીમો રહી શકે છે, પરંતુ જૂન મહિનાના મધ્ય સુધીમાં તે સક્રિય બની જશે અને વ્યાપક વરસાદ લાવી શકે છે.
આજે કયા જિલ્લાઓમાં વરસાદની આગાહી?
હવામાન વિભાગ દ્વારા આજે ૮ જૂન, ૨૦૨૫ ના રોજ નીચેના જિલ્લાઓમાં વરસાદની સંભાવના વ્યક્ત કરવામાં આવી છે:
- સૌરાષ્ટ્ર: રાજકોટ, જૂનાગઢ, અમરેલી, ગીર સોમનાથ, ભાવનગર, દીવ.
- દક્ષિણ ગુજરાત: દાહોદ, છોટાઉદેપુર, નર્મદા, ભરૂચ, સુરત, તાપી, ડાંગ, નવસારી, વલસાડ, દમણ અને દાદરા નગર હવેલી.
આ વરસાદ પ્રી-મોન્સૂન એક્ટિવિટીનો ભાગ હોઈ શકે છે, જે વાતાવરણને ઠંડુ પાડવામાં મદદ કરશે અને ચોમાસાના આગમન માટે અનુકૂળ પરિસ્થિતિઓ બનાવશે.
ખેડૂતો અને સામાન્ય નાગરિકો માટે આ રાહતના સમાચાર છે, કારણ કે લાંબા સમયથી ચાલી રહેલી ગરમી અને બફારાથી છુટકારો મળી શકે છે. જોકે, શરૂઆતમાં ધીમા પ્રારંભને કારણે પાણીની જરૂરિયાત ધરાવતા વિસ્તારોમાં વધુ વરસાદની રાહ જોવી પડશે.
ટોપ સ્ટોરી
ટ્રેન્ડિંગ સમાચાર
