સાત હજારથી વધુ ગ્રામ પંચાયતોની યોજાશે ચૂંટણી, આયોગે કલેકટરોને તૈયાર રહેવા કર્યો આદેશ
રાજ્ય ચૂંટણી આયોગે તમામ જિલ્લા કલેકટરો, પ્રાંત અધિકારીઓને પત્ર લખીને ગ્રામ પંચાયતની ચૂંટણી માટે તૈયાર રહેવા આદેશ કર્યો છે.
પાલિકા- પંચાયતોની ચૂંટણી બાદ ગુજરાતમાં OBC અનામતના કારણે અટકી પડેલી ગ્રામ પંચાયતોની સામાન્ય અને મધ્યસત્ર ચૂંટણી 15મી એપ્રિલ પહેલા સંપન્ન થાય તેવા સંકેતો મળી રહ્યા છે. રાજ્ય ચૂંટણી આયોગે તમામ જિલ્લા કલેકટરો, પ્રાંત અધિકારીઓને પત્ર લખીને ગ્રામ પંચાયતની ચૂંટણી માટે તૈયાર રહેવા આદેશ કર્યો છે.
પ્રાથમિક અનુમાન મુજબ 30 જૂન 2025 સુધીમાં જેની મુદત પૂર્ણ થાય છે તેવી સાત હજાર ગ્રામ પંચાયતો છે જેની ચૂંટણી યોજવામાં આવશે. રાજ્ય ચૂંટણી આયોગના સચિવે લખેલા પત્રમાં સ્પષ્ટ કહેવાયું કે 1 એપ્રિલ 2022થી લઈ 30 જૂન 2025 સુધી મુદત પૂર્ણ થતા ગ્રામ પંચાયતોની સામાન્ય, વિભાજન, મધ્યસત્ર, પેટાચૂંટણી આગામી સમયમાં યોજવાની થાય છે. જેથી મતદાન મથકો મંજૂર કરવા અને તેની ચકાસણી કરી પ્રમાણપત્રો મેળવી લેવામાં આવે. કલેકટરને સંબોધીને લખાયેલા આ પત્રમાં ગ્રામ પંચાયતોના ચૂંટણી અધિકારી તરીકે નાયબ મામલતદારો, મદદનીશ તાલુકા વિકાસ અધિકારી, વિસ્તરણ અધિકારીઓ તેમજ ચૂંટણી કામગીરીના અનુભવી કર્મચારીની નિયુક્તિ કરવાની રહેશે. એપ્રિલના પ્રથમ સપ્તાહમાં શૈક્ષણિક કાર્ય બંધ હોવાથી આ દિવસોમાં ચૂંટણી થતા છેલ્લા અઢી વર્ષથી ચાલતા વહીવટદારી શાસનનો અંત આવશે.
નોંધનીય છે કે સ્થાનિક સ્વરાજની ચૂંટણી યોજાઇ હતી. જેમાં ભાજપનો ભવ્ય વિજય થયો હતો. રાજ્યની 68 નગરપાલિકાઓમાંથી 62 પર ભારતીય જનતા પાર્ટી (ભાજપ)નો ભવ્ય વિજય થયો છે, જ્યારે કોંગ્રેસ માત્ર એક નગરપાલિકા જીતવામાં સફળ રહી છે. 68 નગરપાલિકાઓ પૈકી 62 પર ભાજપે સત્તા મેળવી, જ્યારે 66 પૈકીની 60 નગરપાલિકાઓ પર સ્પષ્ટ બહુમત પ્રાપ્ત કર્યો હતો. ભારતીય જનતા પાર્ટીએ જૂનાગઢ મહાનગર પાલિકા સાથે કુલ 62 નગરપાલિકા પર જીત મેળવી છે. ત્રણેય તાલુકા પંચાયતમાં પણ ભાજપની જીત થઈ છે. જ્યારે કોંગ્રેસના ખાતામાં માત્ર એક નગરપાલિકા આવી છે. જ્યારે પાંચ નગરપાલિકામાં અન્યની જીત થઈ છે.
ટોપ સ્ટોરી
ટ્રેન્ડિંગ સમાચાર
