મહીસાગરમાં ભગવો લહેરાયો: ભાજપનો ત્રણેય નગરપાલિકા અને તાલુકા પંચાયતમાં ભવ્ય વિજય
લુણાવાડા, સંતરામપુર અને બાલાસિનોર નગરપાલિકામાં ભાજપનો કબજો, ખાનપુર તાલુકા પંચાયતની પેટા ચૂંટણીમાં પણ ભાજપની જીત
Gujarat Local Body Election 2025: મહીસાગર જિલ્લાની ત્રણ નગરપાલિકા લુણાવાડા, સંતરામપુર અને બાલાસિનોર તેમજ ખાનપુર તાલુકા પંચાયતની ખાલી પડેલ કનોડ સીટની ચૂંટણીમાં ભારતીય જનતા પાર્ટી (ભાજપ)નો ભવ્ય વિજય થયો છે. આજે યોજાયેલી મતગણતરીમાં ભાજપે ત્રણેય નગરપાલિકામાં બહુમતી મેળવીને ભગવો લહેરાવ્યો છે. આ વિજયથી ભાજપના કાર્યકરો અને સમર્થકોમાં ખુશીનો માહોલ છવાયો છે.
આજે સવારે મહીસાગર જિલ્લાની ત્રણેય નગરપાલિકા માટે મતગણતરી પ્રક્રિયા શરૂ થઈ હતી. લુણાવાડા નગરપાલિકાની મતગણતરી લુણાવાડા આર્ટસ સાયન્સ એન્ડ કોમર્સ કોલેજ ખાતે, સંતરામપુર નગરપાલિકાની મતગણતરી સંતરામપુર કોલેજ ખાતે અને બાલાસિનોર નગરપાલિકાની મતગણતરી કરુણાનીકેતન હાઇસ્કુલ ખાતે યોજાઈ હતી. મતગણતરીના શરૂઆતના તબક્કાથી જ ભાજપના ઉમેદવારો આગળ રહ્યા હતા અને અંતે ત્રણેય નગરપાલિકામાં ભાજપે સ્પષ્ટ બહુમતી મેળવી હતી. ખાનપુર તાલુકા પંચાયતની પેટા ચૂંટણીમાં પણ ભાજપના ઉમેદવાર વિજયી બન્યા છે.
ભાજપના ઉમેદવારોનો વિજય થતા સમર્થકો અને કાર્યકરોમાં ઉત્સાહ જોવા મળ્યો હતો અને વિજય સરઘસ કાઢવામાં આવ્યા હતા. સંતરામપુરમાં ભાજપના વિજયને લઈને શિક્ષણ મંત્રી કુબેરભાઈ ડીંડોર પણ ખાસ ઉપસ્થિત રહ્યા હતા અને વિજેતા ઉમેદવારોને ફુલહાર પહેરાવીને અભિનંદન પાઠવ્યા હતા. કાર્યકર્તાઓએ એકબીજાને ગળે મળીને અને મોઢું મીઠું કરાવીને ખુશી વ્યક્ત કરી હતી.
મહીસાગર જિલ્લાની નગરપાલિકાની બેઠકોની સ્થિતિ:
| નગરપાલિકા | કુલ વોર્ડ | કુલ બેઠક | ભાજપ | કોંગ્રેસ | NCP | બસપા | અપક્ષ |
| લુણાવાડા | 7 | 28 | 16 | 11 | 0 | 0 | 1 |
| બાલાસિનોર | 7 | 28 | 16 | 9 | 2 | 1 | 0 |
| સંતરામપુર | 6 | 24 | 15 | 7 | 0 | 2 | 0 |
| કુલ નગરપાલિકા | 3 | 80 | 47 | 27 | 2 | 3 | 1 |
સ્થાનિક સ્વરાજ્યની ચૂંટણીઓમાં ભાજપની આ જીત ઘણી રીતે મહત્વપૂર્ણ છે:
કોંગ્રેસના ગઢમાં ગાબડું: ભાજપે કોંગ્રેસના મજબૂત ગણાતા વિસ્તારોમાં જીત મેળવીને કોંગ્રેસના પાયાને હચમચાવી દીધો છે.
જનતાનો વિશ્વાસ: આ જીત દર્શાવે છે કે લોકો હજુ પણ ભાજપ પર વિશ્વાસ મૂકી રહ્યા છે અને પાર્ટીની નીતિઓ અને કાર્યક્રમોને સમર્થન આપી રહ્યા છે.
આગામી ચૂંટણીઓ માટે સંકેત: આ પરિણામો આગામી વિધાનસભા અને લોકસભા ચૂંટણીઓ માટે ભાજપ માટે સકારાત્મક સંકેત છે.
સ્થાનિક સ્વરાજ્યની ચૂંટણીઓમાં ભાજપની આ ભવ્ય જીત કોંગ્રેસ માટે ચિંતાનો વિષય છે, જ્યારે ભાજપ માટે ઉજવણીનો અવસર છે. આ પરિણામો ગુજરાતના રાજકારણમાં નવા સમીકરણો સર્જી શકે છે.
5 હજાર ઉમેદવારો મેદાનમાં હતા
સ્થાનિક સ્વરાજ્યની ચૂંટણીમાં 5775 દાવેદારો મેદાનમાં ઉતર્યા હતા અને કુલ 36 લાખ 71 હજાર 479 મતદારોને મતાધિકાર મળ્યો હતો. રાજ્યમાં પાલિકા-પંચાયતના યોજાયેલા મતદાનમાં ઘણા મતદાન મથકો પર મતદારોની લાંબી લાંબી કતારો પણ જોવા મળી હતી.
ઉલ્લેખનીય છે કે, આ વખતે સ્થાનિક સ્વરાજ્યની ચૂંટણી માટે કુલ 7036 ઉમેદવારીપત્રો દાખલ થયા હતા, જેમાંથી 1261 પત્રો અમાન્ય ઠર્યા, જ્યારે કે 5775 ઉમેદવારોની ઉમેદવારી માન્ય રાખવામાં આવી. જે બાદ 478 ઉમેદવારોએ ઉમેદવારીપત્ર પરત ખેંચ્યા, જેના કારણે 213 બેઠકો બિનહરીફ થઈ ગઈ. જેના પગલે હરિફાઇ હેઠળની બેઠકો માટે કુલ 5 હજાર 84 ઉમેદવારો ચૂંટણીના જંગમાં મેદાને ઉતર્યા હતાં.
ટ્રેન્ડિંગ સમાચાર
ટોપ સ્ટોરી
