સરદારધામના ટ્રસ્ટી ગગજી સુતરિયાનું નિવેદન: 'આપણી દીકરીઓની કમ્મરે રિવોલ્વર લટકતી હોવી જોઈએ', ઇઝરાયલની જેમ…
શોપિંગ કરવા નીકળે ત્યારે દીકરીઓ રિવોલ્વર રાખે, ૨૫ વર્ષના ભવિષ્યનું વિચારીને વાત કરું છું: ગગજી સુતરિયા, નિવેદનથી રાજકીય અને સામાજિક વર્તુળોમાં ચર્ચા.
Gagji Sutaria revolver remark: પાટીદાર સમાજની અગ્રણી સંસ્થા સરદારધામના ટ્રસ્ટી ગગજી સુતરિયાએ મહિલાઓની સુરક્ષા અને દેશની સુરક્ષા અંગે એક મોટું અને સંભવિતપણે વિવાદાસ્પદ નિવેદન આપ્યું છે, જેનાથી રાજકીય અને સામાજિક વર્તુળોમાં ચર્ચા શરૂ થઈ ગઈ છે.
સરદારધામના ટ્રસ્ટી ગગજી સુતરિયાએ કહ્યું છે કે, 'આપણી દીકરીઓની કમ્મરે રિવોલ્વર લટકતી હોવી જોઈએ'. તેમણે આ વાતને વધુ સ્પષ્ટ કરતા જણાવ્યું કે, જ્યારે દીકરીઓ શોપિંગ કરવા નીકળે ત્યારે પણ તેમની કમ્મરે રિવોલ્વર લટકતી હોવી જોઈએ. તેમનું આ નિવેદન વ્યક્તિગત સુરક્ષા, ખાસ કરીને મહિલાઓની સુરક્ષા અંગેના તેમના કડક મંતવ્યો દર્શાવે છે.
આ સાથે જ, ગગજી સુતરિયાએ દેશની સુરક્ષા વ્યવસ્થા અંગે પણ એક સૂચન કર્યું છે. તેમણે ઇઝરાયલનું ઉદાહરણ આપતા કહ્યું કે, દેશના દરેક નાગરિકને પોતાની અને દેશની સુરક્ષા માટે તાલીમ આપવી જોઈએ. ઇઝરાયલમાં ફરજિયાત લશ્કરી સેવા અને નાગરિકોને અપાતી સુરક્ષા તાલીમનો તેઓ સંદર્ભ આપી રહ્યા હોય તેવું લાગી રહ્યું છે.
ગગજી સુતરિયાએ જણાવ્યું કે, તેઓ કોઈ તાત્કાલિક પરિસ્થિતિ અંગે નહીં, પરંતુ આગામી ૨૫ વર્ષના ભવિષ્યને ધ્યાનમાં રાખીને આ વાત કરી રહ્યા છે. તેમનો કહેવાનો અર્થ સ્પષ્ટ છે કે ભવિષ્યની સુરક્ષા પડકારોનો સામનો કરવા માટે નાગરિકોને સજ્જ કરવા અને સ્વરક્ષણ માટે તૈયાર કરવા જરૂરી છે.
કૉંગ્રેસ મહિલા નેતા જેની ઠુમ્મરનું સમર્થન
રાજકોટના જેતપુરના કૉંગ્રેસ મહિલા નેતા જેનીબેન ઠુમ્મરે ગગજી સુતરિયાના નિવેદનનું સમર્થન કર્યું છે. તેમણે કહ્યું કે, સરકારની 'સ્ત્રીશક્તિ કરણ'ની વાતો માત્ર પોકળ સાબિત થતી દેખાઈ રહી છે. જેનીબેન ઠુમ્મરે કાયદો વ્યવસ્થાની સ્થિતિ પર પ્રશ્ન ઉઠાવતા કહ્યું કે, ગુજરાત સરકારી ચિત્ર પ્રમાણે રહ્યું નથી અને રાત્રે પણ મહિલાઓ સુરક્ષિત નથી. તેમણે તો ત્યાં સુધી દાવો કર્યો કે નવરાત્રીમાં પણ રોજ એક દુષ્કર્મની ઘટના સામે આવતી હતી. આ પરિસ્થિતિને જોતા તેમણે ગગજી સુતરિયાના નિવેદનને સમર્થન આપતા કહ્યું કે, મહિલાઓએ પોતાની સુરક્ષા માટે રિવોલ્વર રાખવા માટે સરકારે પરવાનગી આપવી પડશે. તેમણે શિક્ષણ અંગે પણ ટિપ્પણી કરતા કહ્યું કે, 'ભણસે ગુજરાત'ની વાતો થાય છે, પરંતુ સરકારી શાળાઓમાં વિદ્યાર્થીઓની સંખ્યા ઘટતી જાય છે. તેમણે મહિલાઓને સુરક્ષા માટે તાલીમ પણ આપવી જોઈએ તેવી હિમાયત કરી.
ગૃહ રાજ્યમંત્રી હર્ષ સંઘવીનું નિવેદન
બીજી તરફ, ગુજરાતના ગૃહ રાજ્યમંત્રી હર્ષ સંઘવીએ ગગજી સુતરિયાના નિવેદન અંગે પોતાનો દ્રષ્ટિકોણ રજૂ કર્યો. તેમણે ગગજી સુતરિયાને સામાજિક આગેવાન ગણાવ્યા અને કહ્યું કે તેઓ મહિલા સશક્તિકરણ માટે હંમેશા તત્પર રહે છે. હર્ષ સંઘવીએ ગગજી સુતરિયાના નિવેદનનો અર્થઘટન કરતા કહ્યું કે, તેમનો કહેવાનો મુખ્ય ધ્યેય દીકરીઓ આવનારા અલગ અલગ વિભાગોમાં નોકરી મેળવે અને સશક્ત થાય તેવો હોય તેવું હું માનું છું. (એટલે કે શાબ્દિક રીતે રિવોલ્વર રાખવાને બદલે સુરક્ષા દળોમાં જોડાઈને સશક્ત બને).
ગૃહ રાજ્યમંત્રીએ ગુજરાતમાં મહિલાઓની સુરક્ષા અને ગુનેગારોને સજા અપાવવા અંગે સરકારની કામગીરી ગણાવી. તેમણે કહ્યું કે, ગુજરાતમાં ૧૦૦ દિવસની અંદર અનેક દીકરીઓને ન્યાય અપાવવામાં સરકારને સફળતા મળી છે. તેમણે ભરૂચના અંકેશ્વરના કેસનું ઉદાહરણ આપ્યું, જ્યાં ૭૨ દિવસના સમયમાં ગુનેગારને ફાંસીની સજા સંભળાવવામાં આવી. હર્ષ સંઘવીએ દાવો કર્યો કે, ગુજરાતમાં 'તારીખ પે તારીખ'ની માન્યતા હતી તેને તેમની સરકારે દૂર કરી છે અને ગુજરાત પોલીસે ગણતરીના દિવસોમાં ચાર્જશીટ ફાઈલ કરી છે. તેમણે છેલ્લા ૧૦૦ દિવસમાં ૧૧ જેટલા ગુનેગારોને ફાંસીની સજા સંભળાવવામાં આવી હોવાનું પણ જણાવ્યું.
ટોપ સ્ટોરી
ટ્રેન્ડિંગ સમાચાર
