Saurashtra Rain: ગીર સોમનાથમાં વીજળી પડતા એકનું મોત, સૌરાષ્ટ્રના 5 જિલ્લામાં ધોધમાર વરસાદથી જળબંબાકાર

Saurashtra heavy rain: બળેલ પીપરીયામાં 1 કલાકમાં 5 ઈંચ વરસાદ ખાબક્યો, ખેતીપાકને નવું જીવતદાન મળતા ખેડૂતોમાં ખુશીની લહેર, જ્યારે તાલાલામાં વીજળી પડવાથી 1 વ્યક્તિનું મોત.

સૌરાષ્ટ્રમાં સાર્વત્રિક વરસાદ

Source : ABPLIVE AI

Show Quick Read

Key points generated by AI, verified by newsroom

• સૌરાષ્ટ્રમાં મેઘરાજાની ધમાકેદાર એન્ટ્રીથી પાકને નવું જીવતદાન મળ્યું.
• અમરેલી-જૂનાગઢમાં ભારે વરસાદથી જળબંબાકાર, તળાવો-ડેમ છલકાઈ ગયા.
• ભાવનગર, રાજકોટ, પોરબંદરમાં પાણી ભરાયા; વીજળી પડતાં એકનું મોત.

Saurashtra heavy rain: સૌરાષ્ટ્રના વિવિધ વિસ્તારોમાં મેઘરાજાએ ફરી એકવાર ધમાકેદાર એન્ટ્રી કરી છે. ગીર સોમનાથ, જૂનાગઢ, અમરેલી, રાજકોટ, ભાવનગર અને પોરબંદર સહિતના જિલ્લાઓના ગ્રામ્ય તેમજ શહેરી વિસ્તારોમાં બપોર બાદ અચાનક વાતાવરણમાં પલટો આવ્યો હતો અને સાર્વત્રિક ધોધમાર વરસાદ નોંધાયો હતો. લાંબા વિરામ બાદ આવેલા આ સારા વરસાદને પગલે મગફળી, કપાસ અને સોયાબીન જેવા ખરીફ પાકોને નવું જીવતદાન મળતા ધરતીપુત્રોના ચહેરા પર ખુશીની લહેર જોવા મળી રહી છે.

અમરેલી જિલ્લામાં સાર્વત્રિક મેઘમહેર

અમરેલી જિલ્લામાં બપોર પછી અનરાધાર વરસાદ વરસ્યો હતો. ખાસ કરીને બાબરા તાલુકાના બળેલ પીપરીયા ગામમાં માત્ર 1 કલાકમાં જ 5 ઈંચ જેટલો સાંબેલાધાર વરસાદ ખાબકતાં ગામના મુખ્ય રસ્તાઓ પર નદીઓ વહેતી હોય તેવા દ્રશ્યો સર્જાયા હતા અને ગામનું તળાવ પણ ઓવરફ્લો થઈ ગયું હતું. અમરેલી શહેરના બ્રાહ્મણ સોસાયટી, હાઉસિંગ બોર્ડ અને નાગનાથ વિસ્તારમાં પણ ભારે વરસાદ નોંધાયો છે. સાવરકુંડલા પંથકના ધોબા, પીપરડી અને ભમોદરા જેવા ગામોમાં સતત 3 દિવસથી વરસાદ ચાલુ છે. જાફરાબાદના કોસ્ટલ બેલ્ટમાં ભારે વરસાદના કારણે મુખ્ય બજારો જાણે સ્વિમિંગપુલમાં ફેરવાઈ ગઈ હતી, જ્યારે બગસરા અને ધારીના ગ્રામ્ય પંથકોમાં પણ ધોધમાર વરસાદ પડતાં ખેતરો પાણીથી તરબોળ થયા હતા.

જૂનાગઢ અને ગિરનાર પંથકમાં જળબંબાકાર

જૂનાગઢ શહેર અને જિલ્લામાં મેઘરાજાએ તોફાની બેટિંગ કરી છે. જૂનાગઢ શહેરમાં 1.61 ઈંચ જેટલો વરસાદ પડતાં મધુરમ, વૃંદાવન સોસાયટી, ભવનાથ, આઝાદ ચોક અને સરદાર બાગ જેવા વિસ્તારોમાં પાણી ભરાયા હતા. ઝાંઝરડા તરફ જતા ગરનાળામાં વરસાદી પાણી ભરાતા વાહનવ્યવહાર ખોરવાયો હતો અને એક બોલેરો કાર પણ ફસાઈ ગઈ હતી. ગિરનાર અને દાતાર પર્વત પર પડેલા ભારે વરસાદથી ગિરનારનાં ઝરણાં વહેતા થયા છે અને દામોદર કુંડ તથા વિલિંગ્ડન ડેમમાં નવા નીરની આવક થઈ છે. આ ઉપરાંત કેશોદમાં 1.38 ઈંચ વરસાદ નોંધાયો છે, જ્યારે માણાવદર, વિસાવદર, માળીયા હાટીના અને વંથલીમાં પણ વીજળીના કડાકા સાથે ભારે વરસાદથી રસ્તાઓ જળમગ્ન બન્યા હતા.

ભાવનગર, રાજકોટ અને પોરબંદરની સ્થિતિ

ભાવનગરના મહુવા શહેરમાં ગાજવીજ સાથે ધોધમાર વરસાદ પડતાં જનતા પ્લોટ, શાક માર્કેટ, ખારઝાંપા અને ગાર્ડન રોડ જેવા નીચાણવાળા વિસ્તારોમાં ગોઠણસમા પાણી ભરાયા હતા. શહેરમાં ઠેર-ઠેર પાણી ભરાતા નગરપાલિકાની પ્રિ-મોનસૂન કામગીરી સામે સ્થાનિક રહિશો સવાલો ઉઠાવી રહ્યા છે. નોંધનીય છે કે, મહુવા તાલુકામાં આ ચોમાસાની સીઝનનો કુલ 32.56 ઈંચ વરસાદ નોંધાઈ ચૂક્યો છે. પાલીતાણા અને તેના આસપાસના દુધાળા, ઘેટી તથા પાંચપીપળા ગામોમાં પણ સારો વરસાદ પડ્યો છે. રાજકોટના ગોંડલ શહેરમાં બસ સ્ટેશન, જેલ ચોક અને રેલવે સ્ટેશન રોડ પર વરસાદી પાણી ફરી વળ્યા હતા, જ્યારે પોરબંદરના કુતિયાણા પંથકમાં હાઈવે પર પાણી ભરાતા વાહનચાલકોને ભારે હાલાકીનો સામનો કરવો પડ્યો હતો.

ગીર સોમનાથમાં ખેતીને ફાયદો, વીજળી પડવાથી 1 મોત

ગીર સોમનાથના તાલાલા અને કોડીનારમાં માત્ર 2 કલાકમાં 1 ઈંચ વરસાદ નોંધાયો હતો. વેરાવળ, સુત્રાપાડા અને ઉનામાં પણ અડધાથી એક ઈંચ જેટલો વરસાદ પડ્યો છે. સતત 3 દિવસથી પડી રહેલા વરસાદથી ચોમાસુ પાકને મોટો ફાયદો થવાની આશા છે. જોકે, આ ખુશીના માહોલ વચ્ચે તાલાલાના વડાળા ગામમાં એક દુઃખદ ઘટના બની હતી. અહીં વીજળી પડતાં 46 વર્ષીય સમા ઇબુભાઈ નામના વ્યક્તિનું કમકમાટીભર્યું મોત નીપજ્યું હતું, જેને પગલે પરિવાર અને ગામમાં ભારે શોક વ્યાપી ગયો છે.