રાજ્યમાં લો પ્રેશર અને વેસ્ટર્ન ડિસ્ટરર્બન્સની અસરથી 2 ડિસેમ્બર સુધી માવઠાની આગાહી

રાજ્યમાં કમોસમી વરસાદનું સંકટ યથાવત છે.  આજે સાંજથી રાજ્યના વાતાવરણમાં પલટો આવશે. આ આગાહી  હવામાન વિભાગ દ્વારા કરવામાં આવી છે.

પ્રતિકાત્મક તસવીર

ગાંધીનગર:  રાજ્યમાં કમોસમી વરસાદનું સંકટ યથાવત છે.  આજે સાંજથી રાજ્યના વાતાવરણમાં પલટો આવશે. આ આગાહી  હવામાન વિભાગ દ્વારા કરવામાં આવી છે. જેને લઈ તમામ કલેક્ટરને એલર્ટ આપવામાં આવ્યું છે. ખેડૂતો માટે હવામાન વિભાગે પાક માર્ગદર્શિકા પણ જાહેર કરી છે.  માછીમારોને દરિયો નહીં ખેડવા સૂચના આપવામાં આવી છે. 

હવામાન વિભાગની આગાહી પ્રમાણે રાજ્યમાં આજથી બે ડિસેમ્બર સુધી અમરેલી, ભાવનગર, સુરત, ડાંગ, નવસારી, વલસાડ અને તાપી એમ સાત જિલ્લામાં ભારેથી અતિભારે વરસાદ પડી શકે છે. તો કેટલાક જિલ્લામાં 40થી 60 કિ.મીની ઝડપે પવન ફુંકાવા સહિત આઠ ઈંચ સુધીનો વરસાદ વરસી શકે છે. સાયક્લોનિક સર્ક્યુલેશનના પગલે ગુજરાતમાં ભરશિયાળે ચોમાસા જેવો માહોલ સર્જાય શકે છે. ગાજવીજ સાથે વરસાદ વરસી શકે છે. 

હવામાન વિભાગની આગાહી અનુસાર એક ડિસેમ્બરથી ત્રણ ડિસેમ્બર સુધી રાજ્યના વાતાવરણમાં પલટો રહેશે. એક ડિસેમ્બરે અમદાવાદ, આણંદ, ખેડા, પંચમહાલ, દાહોદ, સુરેંદ્રનગર, રાજકોટ, પોરબંદર, જૂનાગઢ, અમરેલી, ભાવનગર, ગીર સોમનાથ, બોટાદ, દીવમાં હળવો જ્યારે બનાસકાંઠા, સાબરકાંઠા, આણંદ, વડોદરા, છોટા ઉદેપુર, નર્મદા, ભરૂચ, તાપી સુરત, ડાંગ, નવસારી, દાદરાનગર હવેલી, દમણ, અમરેલી, ભાવનગર માં ભારેથી અતિભારે વરસાદ વરસી શકે છે.  આગામી બે ડિસેમ્બરના બનાસકાંઠા, સાબરકાંઠા, અરવલ્લી, પંચમહાલ, મહીસાગર, છોટા ઉદેપુર, નર્મદામાં ભારેથી અતિભારે વરસાદ વરસી શકે છે.  આ સિવાયના રાજ્યના અનેક ભાગમાં પણ વરસાદી માહોલ રહે તેવી હવામાન વિભાગે આગાહી કરી છે.

કમોસમી વરસાદની આગાહીને પગલે માછીમારો અને ખેડૂતોને સૂચના પણ આપવામાં આવી છે. માછીમારોને ત્રણ ડિસેમ્બર સુધી દરિયો ન ખેડવાની સૂચના આપવામાં આવી છે. ખેડૂતોને નમી જાય તેવા પાકને ટેકો આપવા અને તૈયાર થયેલા પાકને સુરક્ષિત સ્થળે ખસેડવાની સૂચના આપવામાં આવી છે. હવામાન વિભાગની આગાહી પ્રમાણે રાજ્યમાં આજથી બે ડિસેમ્બર સુધી અમરેલી, ભાવનગર, સુરત, ડાંગ, નવસારી, વલસાડ અને તાપી એમ સાત જિલ્લામાં ભારેથી અતિભારે વરસાદ પડી શકે છે.