IMD Alert: ઉત્તર ભારતમાં છવાયા ગાઢ વાદળો, કાશ્મીરથી દિલ્હી સુધી ભારે વરસાદ-બરફવર્ષાની ચેતવણી
ભારે વરસાદ અને બરફવર્ષાના કારણે પહાડી વિસ્તારોની હાલત પહેલાથી જ ખરાબ છે
IMD Alert: હિમાલય પર સ્થિત વેસ્ટર્ન ડિસ્ટર્બન્સની અસર આજે એટલે કે 28 ફેબ્રુઆરીએ સૌથી વધુ જોવા મળશે. ભારે વરસાદ અને બરફવર્ષાના કારણે પહાડી વિસ્તારોની હાલત પહેલાથી જ ખરાબ છે. જો આજે પણ પરિસ્થિતિ એવી જ રહેશે તો પરિસ્થિતિ વધુ ગંભીર બની શકે છે. હવામાન વિભાગે આજે પહાડી રાજ્યોમાં ભારે વરસાદ અને હિમવર્ષાની ચેતવણી જાહેર કરી છે. મેદાની વિસ્તારોમાં પણ સારા વરસાદની શક્યતા છે.
હવામાન વિભાગે લેટેસ્ટ સેટેલાઇટ તસવીરો પણ જાહેર કરી છે, જેમાં જોઈ શકાય છે કે ઉત્તર ભારત પર કઇ રીતે વાદળો છવાયેલા હતા. હવામાન વિભાગની આગાહી મુજબ, જમ્મુ અને કાશ્મીર, હિમાચલ પ્રદેશ અને ઉત્તરાખંડના કેટલાક ભાગોમાં ભારે બરફવર્ષા થઈ રહી છે અને આવતીકાલે સવાર સુધી વધુ બરફવર્ષા થવાની સંભાવના છે. આજે ઉત્તર પંજાબના કેટલાક ભાગોમાં ભારે વરસાદ પડશે. હરિયાણા, દિલ્હી, યુપી, એમપી, રાજસ્થાન જેવા અન્ય ભાગોમાં મધ્યમથી હળવો વરસાદ પડશે.
રાજધાની દિલ્હીમાં આજે વાવાઝોડા સાથે વરસાદની ચેતવણી આપવામાં આવી છે. આ સાથે વીજળી પડવાની શક્યતા પણ વ્યક્ત કરવામાં આવી છે. તાપમાનની વાત કરીએ તો આજે લઘુત્તમ તાપમાન 17 ડિગ્રી સેલ્સિયસ અને મહત્તમ તાપમાન 23 ડિગ્રી સેલ્સિયસ રહી શકે છે. ગઈકાલે દિલ્હીમાં ફેબ્રુઆરીના લઘુત્તમ તાપમાનમાં રેકોર્ડબ્રેક વધારો જોવા મળ્યો હતો, જે 19 ડિગ્રી સેલ્સિયસ હતો.
હવામાન વિભાગે આગાહી કરી છે કે ગુજરાતમાં આગામી 5 દિવસ સુધી તાપમાનમાં કોઈ નોંધપાત્ર ફેરફાર થવાની સંભાવના નથી, પરંતુ કેટલાક વિસ્તારોમાં તાપમાન 2 થી 3 ડિગ્રી સુધી વધી શકે છે. પવનની દિશા ઉત્તરથી પૂર્વ તરફ રહેવાની શક્યતા છે. હવામાન વિભાગે સૌરાષ્ટ્ર અને દક્ષિણ ગુજરાતના દરિયાકાંઠે 27 ફેબ્રુઆરી સુધી ગરમ અને ભેજવાળા પવન ફૂંકાવાની આગાહી કરી છે, જેના કારણે દરિયાકાંઠાના વિસ્તારોમાં તાપમાન સામાન્ય કરતાં વધુ રહી શકે છે.
જો કે, ગરમીથી રાહત આપનારા સમાચાર પણ છે. હવામાનશાસ્ત્રી અંબાલાલ પટેલની આગાહી મુજબ, રાજ્યમાં કમોસમી વરસાદની શક્યતા છે. ફેબ્રુઆરીના અંતમાં અને માર્ચના બીજા સપ્તાહમાં કમોસમી વરસાદ વરસી શકે છે, અને ઉત્તર ગુજરાત સહિત અનેક વિસ્તારોમાં માર્ચની શરૂઆતમાં પણ વરસાદની સંભાવના છે. 7 થી 10 માર્ચ વચ્ચે ફરીથી કમોસમી વરસાદ પડવાની શક્યતા વ્યક્ત કરવામાં આવી છે.
ટોપ સ્ટોરી
ટ્રેન્ડિંગ સમાચાર
