મરાઠા અનામત આંદોલનનો અંત? મનોજ જરંગેએ ભૂખ હડતાળ પાછી ખેંચી, 'આપણે જીતી ગયા' ની ઘોષણા
સરકારે મોટાભાગની માંગણીઓ સ્વીકારતા મનોજ જરંગેએ મહારાષ્ટ્ર સરકાર સાથેની મંત્રણા બાદ વિજયનો દાવો કર્યો. ગંભીર કેસો સિવાયના કેસ પાછા ખેંચવાની ખાતરી.
Manoj Jarange Maratha quota news: મરાઠા અનામત આંદોલનના નેતા મનોજ જરંગેએ મુંબઈના આઝાદ મેદાન ખાતે ચાલી રહેલી પોતાની ભૂખ હડતાળ પાછી ખેંચી લીધી છે. મહારાષ્ટ્ર સરકારના એક પ્રતિનિધિમંડળ સાથેની મંત્રણા બાદ તેમણે આ નિર્ણય લીધો. મંત્રીઓ સાથેની વાતચીત બાદ જરંગેએ આંદોલનના વિજયની ઘોષણા કરી, કારણ કે સરકારે તેમની ઘણી મુખ્ય માંગણીઓ સ્વીકારવાની ખાતરી આપી છે. જેમાં આંદોલનકારીઓ પરના કેસ પાછા ખેંચવા, હૈદરાબાદ ગેઝેટ લાગુ કરવું અને આંદોલનમાં જીવ ગુમાવનારા પરિવારોને સહાય આપવાનો સમાવેશ થાય છે.
મહારાષ્ટ્રમાં મરાઠા અનામતની માંગ સાથે ચાલી રહેલા આંદોલનના નેતા મનોજ જરંગેએ આજે પોતાની ભૂખ હડતાળને સત્તાવાર રીતે સમાપ્ત કરવાની જાહેરાત કરી છે. આ નિર્ણય મુંબઈના આઝાદ મેદાન ખાતે મહારાષ્ટ્ર સરકારના ત્રણ મંત્રીઓ સાથેની બેઠક બાદ લેવામાં આવ્યો. આ બેઠક પછી, મનોજ જરંગેએ તેમના સમર્થકોને સંબોધતા કહ્યું કે, "આપણે જીતી ગયા છીએ."
સરકારે સ્વીકારેલી મુખ્ય માંગણીઓ
મનોજ જરંગેએ જણાવ્યું કે સરકારી ડેલિગેશને તેમની ઘણી માંગણીઓ પર સહમતિ દર્શાવી છે. તેમણે એક પ્રેસ કોન્ફરન્સમાં આ અંગે માહિતી આપતા કહ્યું કે:
- કેસ પાછા ખેંચાશે: મરાઠા આંદોલન દરમિયાન નોંધાયેલા ગંભીર કેસો સિવાય, આંદોલનકારીઓ સામે નોંધાયેલા અન્ય તમામ કેસો પાછા ખેંચવા માટે સરકાર સહમત થઈ છે.
- નાણાકીય સહાય: આંદોલન દરમિયાન જીવ ગુમાવનારાઓના પરિવારોને નાણાકીય સહાય આપવા માટે સરકારે ખાતરી આપી છે.
- હૈદરાબાદ ગેઝેટ: આંદોલનની મુખ્ય માંગણીઓ પૈકીની એક એવી હૈદરાબાદ ગેઝેટને તાત્કાલિક લાગુ કરવા માટે સરકાર તૈયાર થઈ છે.
જટિલ મુદ્દાઓ અને બે મહિનાનો સમય
જોકે, કેટલીક માંગણીઓ એવી છે જેના પર સરકારને વધુ સમયની જરૂર છે. મનોજ જરંગેએ જણાવ્યું કે મરાઠા સમુદાયને કુણબીનો ભાગ જાહેર કરવા માટે સરકારી ઠરાવ (GR) બહાર પાડવાની માંગણી પર સરકારે બે મહિનાનો સમય માંગ્યો છે, કારણ કે આ એક જટિલ કાનૂની પ્રક્રિયા છે. આ ઉપરાંત, સતારા ગેઝેટને લાગુ કરવા માટે પણ કાયદાકીય પાસાઓની ચકાસણી કરવામાં આવશે.
અંતમાં, મનોજ જરંગેએ સ્પષ્ટ કર્યું કે સરકાર એક કલાકમાં GR બહાર પાડવાનું વચન આપ્યું છે. એકવાર GRની નકલ તેમને મળી જશે, ત્યાર બાદ આંદોલન પાછું ખેંચવાની સત્તાવાર ઘોષણા કરવામાં આવશે. તેમણે ઉમેર્યું કે જો સરકાર GR બહાર પાડે તો તેઓ આજે રાત્રે 9 વાગ્યા સુધીમાં મુંબઈ છોડી દેશે. આ સાથે જ, લાંબા સમયથી ચાલી રહેલા આંદોલનના અંતની આશા જાગી છે.
ટોપ સ્ટોરી
ટ્રેન્ડિંગ સમાચાર
