પંજાબ અને કેરલ બાદ રાજસ્થાન સરકાર નાગરિકતા સંશોધન કાયદાના વિરોધમાં પ્રસ્તાવ લાવશે

ગુરુવારે રાજસ્થાનના નાયબ મુખ્યમંત્રી સચિન પાયલટે તેની જાહેરાત કરી છે.

નવી દિલ્હીઃ નાગરિકતા સંશોધન કાયદા વિરુદ્ધ રાજસ્થાન સરકાર પણ વિધાનસભામાં પ્રસ્તાવ લઇને આવશે. આ અગાઉ પંજાબ અને કેરલ સરકાર પણ વિધાનભામાં સીએએ વિરુદ્ધ પ્રસ્તાવ પાસ કરાવી ચૂકી છે. ગુરુવારે રાજસ્થાનના નાયબ મુખ્યમંત્રી સચિન પાયલટે તેની જાહેરાત કરી છે. ગેહલોત સરકાર 24 જાન્યુઆરીથી શરૂ થઇ રહેલા બજેટ સત્ર દરમિયાન આ પ્રસ્તાવ રાજ્ય વિધાનસભામાં લાવશે.

Deputy Chief Minister of Rajasthan, Sachin Pilot in Jaipur: Everyone has the right to express their dissent. Our government will also bring a resolution against the Citizenship Amendment Act in the State Assembly. pic.twitter.com/RfbG6x5H2g

— ANI (@ANI) January 23, 2020

નાયબ મુખ્યમંત્રી સચિન પાયલટે કહ્યું કે તમામ લોકોને પોતાનો વિરોધ વ્યક્ત કરવાનો અધિકાર છે. અમારી સરકાર પણ નાગરિકતા સંશોધન કાયદા વિરુદ્ધ વિધાનસભામાં પ્રસ્તાવ લઇને આવશે. રાજસ્થાન સિવાય પશ્વિમ બંગાળની સરકાર પણ આ કાયદા વિરુદ્ધ પ્રસ્તાવ લાવવાની તૈયારી કરી ચૂકી છે. રાજ્યના સંસદીય કાર્યમંત્રી પાર્થ ચેટર્જીએ કહ્યું કે, 27 જાન્યુઆરીના બપોરે બે વાગ્યે વિધાનસભાના વિશેષ સત્રમાં આ પ્રસ્તાવ લાવવામાં આવશે. તે સિવાય કેરલ અને પંજાબની સરકાર આ કાયદાના વિરુદ્ધમાં પ્રસ્તાવ પાસ કરી ચૂકી છે. મહારાષ્ટ્ર સરકારે પણ સીએએ વિરુદ્ધ વિધાનસભામાં પ્રસ્તાવ પાસ કરવાનો નિર્ણય લીધો છે.