આવતીકાલનું હવામાન: આગામી 22 કલાકમાં 15 રાજ્યોમાં મુશળધાર વરસાદની આગાહી, એલર્ટ જાહેર

Tomorrow weather forecast India: ઉત્તર અને મધ્ય ભારતમાં હજુ પણ કાળઝાળ ગરમીનો પ્રકોપ યથાવત્ રહેશે, જાણો દિલ્હી, યુપી, બિહાર અને રાજસ્થાન સહિત 15 રાજ્યોમાં કેવું રહેશે 24 મેનું હવામાન.

tomorrow weather forecast monsoon update heavy rain alert 15 states imd

Source : ai

Show Quick Read

Key points generated by AI, verified by newsroom

• દેશના ૧૫ રાજ્યોમાં ભારે પવન સાથે વરસાદની આગાહી.
• દિલ્હી, યુપી, રાજસ્થાનમાં ગરમી યથાવત રહેશે.
• પૂર્વોત્તર રાજ્યોમાં ભારે વરસાદથી સર્જાઈ પૂર જેવી સ્થિતિ.
• હિમાચલ, ઉત્તરાખંડમાં પવન સાથે કરા અને વરસાદની શક્યતા.

Tomorrow weather forecast India: દેશમાં એક તરફ કાળઝાળ ગરમી લોકોના તોરબા કાઢી રહી છે, તો બીજી તરફ ચોમાસાના આગમનના એંધાણ મળી રહ્યા છે. દિલ્હી, યુપી, બિહાર, મધ્ય પ્રદેશ, રાજસ્થાન અને પંજાબ-હરિયાણામાં તાપમાન 40 થી 45 ડિગ્રીને પાર પહોંચી ગયું છે અને લોકો કાગડોળે વરસાદની રાહ જોઈ રહ્યા છે. આ વચ્ચે રાહતના સમાચાર એ છે કે પ્રી-મોન્સૂન એક્ટિવિટી શરૂ થઈ ગઈ છે અને હવામાન વિભાગે આગામી 22 કલાકમાં 15 રાજ્યોમાં 70 કિમી પ્રતિ કલાકની ઝડપે પવન ફૂંકાવા સાથે ભારે વરસાદ અને વાવાઝોડાની ચેતવણી આપી છે. બીજી બાજુ પૂર્વોત્તર રાજ્યોમાં તો વરસાદે અત્યારથી જ તબાહી મચાવવાનું શરૂ કરી દીધું છે.

ચાલો જાણીએ કે 24 મેના રોજ દેશના અલગ-અલગ રાજ્યોમાં હવામાન કેવું રહેશે:

દિલ્હી-NCR (24 થી 28 મે)

દિલ્હી અને એનસીઆરમાં ભયંકર ગરમી વચ્ચે આવતીકાલે વાદળછાયું વાતાવરણ જોવા મળી શકે છે. જોરદાર પવનો અને આંધી સાથે હળવા છાંટા પડવાની પણ સંભાવના છે. જોકે, 24 થી 28 મે સુધી હીટવેવ (લૂ) નો પ્રકોપ વધશે અને મહત્તમ તાપમાન 45 ડિગ્રી સુધી પહોંચી શકે છે.

ઉત્તર પ્રદેશ (24 મે)

યુપીના પૂર્વીય ભાગોમાં દિવસ દરમિયાન તીવ્ર હીટવેવ રહેવાની સંભાવના છે. હવામાન વિભાગના જણાવ્યા મુજબ, કેટલાક વિસ્તારોમાં રાત્રે પણ ભારે બફારો અને ગરમી રહેશે. બાંદામાં તો તાપમાન 46.4 ડિગ્રી સુધી પહોંચી ગયું છે.

બિહાર (24 થી 28 મે)

બિહારમાં વાવાઝોડાનું એલર્ટ આપવામાં આવ્યું છે. 25 મેના રોજ પટણા સહિતના વિસ્તારોમાં ભારે વરસાદ અને તોફાન આવી શકે છે. 24 અને 25 મેના રોજ દરભંગા, મધુબની, ગયા, ભાગલપુર અને પૂર્ણિયામાં પણ વરસાદની આગાહી છે.

રાજસ્થાન (24 મે)

રાજસ્થાનમાં ગરમીનું મોજું ચાલુ જ છે અને 24 મેથી તે વધુ આકરું બનશે. આગામી આખું અઠવાડિયું હવામાન સૂકું રહેશે અને તાપમાનમાં 2-3 ડિગ્રીનો વધારો થશે. જોકે, 40-50 કિમીની ઝડપે ફૂંકાતા ધૂળવાળા પવનો ક્યાંક આંશિક રાહત આપી શકે છે.

આ પણ વાંચોઃ ચોમાસું આગળ વધ્યું: આ રાજ્યોમાં અતિભારે વરસાદની આગાહી; 70 કિમીની ઝડપે વાવાઝોડું ફૂંકા

ઉત્તરાખંડ અને હિમાચલ (24 મે)

પહાડી વિસ્તારોમાં હવામાન પલટાયું છે. 24 મેના રોજ દેહરાદૂનમાં હળવો વરસાદ અને નૈનીતાલમાં પવન સાથે કરા પડવાની શક્યતા છે. જ્યારે હરિદ્વારમાં ગરમી સાથે ધૂળની ડમરીઓ ઉડશે. હિમાચલમાં રોહતાંગ પાસ અને કુલ્લુમાં હિમવર્ષા થઈ રહી છે. ચંબા, કાંગડા, મંડી અને શિમલામાં 40-50 કિમીની ઝડપે પવન સાથે યલો એલર્ટ છે.

પંજાબ અને હરિયાણા (24 થી 27 મે)

પંજાબ, હરિયાણા અને ચંદીગઢમાં પણ ગરમી લોકોને શેકી નાખશે. 24 થી 27 મે વચ્ચે આ વિસ્તારોમાં તીવ્ર હીટવેવની આગાહી હોવાથી લોકોને બપોરે કામ વગર બહાર ન નીકળવા સલાહ અપાઈ છે.

ઝારખંડ અને ઓડિશા (24 થી 25 મે)

ઝારખંડમાં 24 અને 25 મેના રોજ રાંચી, જમશેદપુર, ધનબાદ અને બોકારોમાં ભારે પવન સાથે વરસાદની ચેતવણી છે. જ્યારે ઓડિશાના ઝારસુગુડા અને સંબલપુરમાં હીટવેવનું એલર્ટ છે, તો બીજી બાજુ બાલાસોર અને કટકમાં 40-50 કિમીની ઝડપે પવન સાથે વાવાઝોડાની આગાહી છે.

આ પણ વાંચોઃ ગુજરાતમાં કમોસમી વરસાદની આફત! આજે 9 જિલ્લામાં પડશે માવઠું? હવામાન વિભાગની આગાહી

અરુણાચલ અને કેરળમાં ભારે વરસાદ

અરુણાચલ પ્રદેશમાં અતિભારે વરસાદ અને વાવાઝોડાને કારણે પૂર જેવી સ્થિતિ સર્જાઈ છે, પુલો ધોવાયા છે અને ઘરોને નુકસાન થયું છે. દક્ષિણમાં કેરળ માટે પણ IMD દ્વારા ભારે વરસાદનું ઓરેન્જ એલર્ટ અપાયું છે અને 28 મે થી 3 જૂન વચ્ચે પણ ત્યાં ભારે વરસાદની શક્યતા છે. તમિલનાડુમાં પણ આગામી ત્રણ દિવસ ધોધમાર વરસાદનું એલર્ટ છે.