સ્વદેશી રસી Covaxin ને મંજૂરી માટે હજુ જોવી પડશે રાહ! WHO એ વધુ જાણકારી માગી

હૈદરાબાદ સ્થિત ભારત બાયોટેકે ઇમરજન્સી યુઝ લિસ્ટ (EUL)માં કોવેક્સિનનો સમાવેશ કરવાની માંગ કરી હતી.

પ્રતિકાત્મક તસવીર

Covaxin News: વિશ્વ આરોગ્ય સંસ્થા (WHO) ના ટેકનિકલ સલાહકાર જૂથે મંગળવારે ભારત બાયોટેકને ઇમરજન્સી ઉપયોગની મંજૂરી માટે ભારતની સ્વદેશી એન્ટિ-કોવિડ રસી 'કોવેક્સિન'ના સમાવેશ માટે અંતિમ 'લાભ-જોખમ મૂલ્યાંકન' કરવા માટે ભારત બાયોટેક પાસે વધારે સ્પષ્ટતા માગી છે. ટેકનિકલ સલાહકાર જૂથ હવે અંતિમ મૂલ્યાંકન માટે 3 નવેમ્બરે મળશે. હૈદરાબાદ સ્થિત ભારત બાયોટેક કંપની, જેણે રસી વિકસાવી હતી તેણે ઇમરજન્સી યુઝ લિસ્ટ (EUL) માં રસીનો સમાવેશ કરવા માટે 19 એપ્રિલના રોજ WHOને EOI (એક્સપ્રેશન ઑફ ઇન્ટરેસ્ટ) સબમિટ કર્યો હતો.

ટેકનિકલ એડવાઇઝરી ગ્રૂપે મંગળવારે ભારતની સ્વદેશી રસીને કટોકટીના ઉપયોગની સૂચિમાં સામેલ કરવા માટે કોવેક્સિન પરના ડેટાની સમીક્ષા કરવા માટે બેઠક કરી હતી. જૂથને આ સપ્તાહના અંત સુધીમાં નિર્માતા પાસેથી આ સ્પષ્ટતા મળે તેવી શક્યતા છે, જેને 3 નવેમ્બરે મળવાનું લક્ષ્ય છે.

ઇમરજન્સી ઉપયોગની સૂચિમાં રસીના સમાવેશ અંગેના પ્રશ્નના જવાબમાં, WHO એ કહ્યું, "ટેકનિકલ સલાહકાર જૂથ આજે (મંગળવારે) મળ્યા અને નિર્ણય લીધો કે રસીના વૈશ્વિક ઉપયોગને ધ્યાનમાં રાખીને અંતિમ લાભ-જોખમ મૂલ્યાંકન માટે ઉત્પાદક પાસેથી વધારાની સ્પષ્ટતા માંગવાની જરૂર છે.”

અગાઉ, હૈદરાબાદ સ્થિત ભારત બાયોટેકે ઇમરજન્સી યુઝ લિસ્ટ (EUL)માં કોવેક્સિનનો સમાવેશ કરવાની માંગ કરી હતી. રસી કંપની દ્વારા 19 એપ્રિલના રોજ WHO સમક્ષ EOI (એક્સ્પ્રેશન ઓફ ઈન્ટરેસ્ટ) રજૂ કરવામાં આવી હતી. Covaxin એ WHOને કોરોનાના મૂળ પ્રકાર સામે 77.8 ટકા અને ડેલ્ટા વેરિઅન્ટ સામે 65.2 ટકા અસરકારક ગણાવી હતી.

ભારતની પ્રથમ સ્વદેશી એન્ટિ-કોવિડ-19 રસી, કોવેક્સિન, કોડનેમ BBV 152, જાન્યુઆરીમાં સરકાર દ્વારા ઇમરજન્સી ઉપયોગ માટે મંજૂર કરવામાં આવી હતી. ચારથી છ અઠવાડિયાની વચ્ચે બે ડોઝ આપવામાં આવે છે.

જણાવી દઈએ કે ઈન્ડિયન કાઉન્સિલ ઓફ મેડિકલ રિસર્ચ (ICMR)ના એક અભ્યાસ અનુસાર, જો ભારત બાયોટેકની એન્ટી-કોવિડ રસી, કોવેક્સીનનો એક ડોઝ એવા વ્યક્તિને આપવામાં આવે છે જે પહેલા કોરોના વાયરસથી સંક્રમિત થઈ ચૂકી છે, તો તેને બે ડોઝ જેટલી જ એન્ટિબોડીઝ મળે છે.