રાજકોટ: ફનબ્લાસ્ટ ગેમઝોનમાં શોર્ટ સર્કિટથી નાસભાગ, TRP જેવી મોટી દુર્ઘટના બનતા અટકી

કાલાવડ રોડ પર આવેલા ગેમઝોનમાં રવિવારની ભીડ વચ્ચે સ્પાર્ક થતા અફરાતફરી; ફાયર બ્રિગેડની ટીમ તુરંત દોડી આવી, તમામ લોકોનું સુરક્ષિત રેસ્ક્યુ કરાયું, ગેમઝોન પાસે ફાયર NOC હોવાનો તપાસમાં ખુલાસો.

Huge Fire at Rajkot Funblast Gamezone, People Safe, Rescue Complete

Source : video grab

Show Quick Read

Key points generated by AI, verified by newsroom

• રાજકોટના ફનબ્લાસ્ટ ગેમઝોનમાં શોર્ટ સર્કિટથી આગ લાગી.
• રવિવારે વેકેશનને કારણે બાળકો અને પરિવારોની ભીડ હતી.
• ફાયર સેફ્ટી સિસ્ટમ સક્રિય થતાં જાનહાનિ ટળી.
• ગેમઝોન પાસે તમામ જરૂરી મંજૂરીઓ અને NOC હતી.

Rajkot Gamezone fire today: રાજકોટના લોકો હજુ TRP ગેમઝોનની ગોઝારી દુર્ઘટના ભૂલ્યા નથી, ત્યાં આજે 26 એપ્રિલ, રવિવારના રોજ શહેરના પોશ એરિયા ગણાતા કાલાવડ રોડ પર આવેલા 'ફનબ્લાસ્ટ ગેમઝોન'માં આગ લાગવાની ઘટના સામે આવતા સૌના જીવ તાળવે ચોંટી ગયા હતા. વેકેશનનો સમય અને રવિવારની રજા હોવાથી ગેમઝોનમાં મોટી સંખ્યામાં પરિવારો અને બાળકો મનોરંજન માટે આવ્યા હતા. અચાનક શોર્ટ સર્કિટના કારણે સ્પાર્ક થતાં સ્મોક ડિટેક્ટર એક્ટિવ થઈ ગયા હતા અને હૂટર વાગવા લાગતા લોકોમાં ભારે નાસભાગ મચી ગઈ હતી. જોકે, રાહતની વાત એ રહી કે ફાયર સેફ્ટી સિસ્ટમ બરાબર કામ કરી જતાં સમયસર તમામ લોકોનું સુરક્ષિત રેસ્ક્યુ કરી લેવામાં આવ્યું અને કોઈ પણ પ્રકારની જાનહાનિ થઈ નથી. આ ઘટનાથી રાજકોટમાં TRP ગેમઝોન જેવી જ બીજી એક ભયાનક દુર્ઘટના સદનસીબે ટળી ગઈ છે.

હૂટર વાગતા જ જીવ બચાવવા લોકો બહાર તરફ દોડ્યા

આજે રવિવાર હોવાથી ફનબ્લાસ્ટ ગેમઝોનમાં બાળકો અને મોટેરાઓની ભારે ભીડ જામી હતી. લોકો પોતાની મસ્તીમાં ગેમ્સ રમી રહ્યા હતા, ત્યાં જ અચાનક શોર્ટ સર્કિટના કારણે સ્પાર્ક થયો અને ધુમાડો નીકળવા લાગ્યો હતો. ધુમાડાના કારણે તરત જ ગેમઝોનમાં લાગેલા સ્મોક ડિટેક્ટર્સ એક્ટિવ થઈ ગયા હતા અને જોરજોરથી હૂટર (સાયરન) વાગવા લાગ્યા હતા. સાયરનનો અવાજ સાંભળતા જ અંદર રહેલા લોકોમાં ડર અને ફફડાટ વ્યાપી ગયો હતો. જીવ બચાવવા માટે અંદર અફરાતફરી મચી ગઈ અને સૌ કોઈ બહારના ગેટ તરફ દોડવા લાગ્યા હતા. ગેમઝોનમાંથી ધુમાડાના ગોટેગોટા નીકળતા જોઈને આસપાસથી પસાર થતા લોકો પણ ગભરાઈ ગયા હતા.

તમામ મંજૂરીઓ અને NOC હોવાનો ખુલાસો

આ ઘટનાની જાણ થતાં જ ફાયર બ્રિગેડનો કાફલો અને 108 એમ્બ્યુલન્સની ટીમો ગણતરીની મિનિટોમાં જ ઘટનાસ્થળે દોડી આવી હતી. મ્યુનિસિપલ કોર્પોરેશનના ડેપ્યુટી કમિશનર નંદાણીની સીધી દેખરેખ હેઠળ ફાયર વિભાગે ઝીણવટભરી તપાસ હાથ ધરી હતી. સંચાલકોની પૂછપરછ અને પ્રાથમિક તપાસમાં એ વાત સામે આવી છે કે આગ શોર્ટ સર્કિટના કારણે લાગી હતી. સૌથી મોટી રાહતની બાબત એ જોવા મળી કે આ ગેમઝોનના સંચાલકો પાસે ફાયર વિભાગની વેલિડ NOC (નો ઓબ્જેક્શન સર્ટિફિકેટ) હતી અને નવા કડક નિયમો મુજબની તમામ જરૂરી મંજૂરીઓ પણ લેવામાં આવેલી હતી.

અન્ય ગેમઝોનમાં પણ ચેકિંગ હાથ ધરાય તેવી શક્યતા

જો આજે સુરક્ષાના સાધનોએ સમયસર કામ ન કર્યું હોત, તો આ આગ વિકરાળ સ્વરૂપ ધારણ કરી શકી હોત અને નિર્દોષ લોકોના જીવ જોખમમાં મુકાઈ ગયા હોત. હાલમાં ઉનાળુ વેકેશનનો માહોલ હોવાથી શહેરોના તમામ ગેમઝોનમાં ભારે ભીડ જોવા મળી રહી છે. ફાયર વિભાગ દ્વારા આ ગેમઝોનની સુરક્ષા વ્યવસ્થાની સઘન તપાસ ચાલી રહી છે. આ ઘટનાને પગલે હવે શહેરના અન્ય ગેમઝોનનાં સંચાલકોને પણ તેમની ફાયર સેફ્ટી સિસ્ટમ અને સુરક્ષાના સાધનો તાત્કાલિક રી-ચેક કરવા માટે કડક સૂચના આપવામાં આવે તેવી પૂરી શક્યતા છે.