સુમુલ ડેરીનો ચૂંટણી કાર્યક્રમ જાહેર, 15 જૂલાઈએ યોજાશે મતદાન

સુમુલ ડેરીનો ચૂંટણી કાર્યક્રમ જાહેર કરવામાં આવ્યો છે. સુમુલ ડેરીની વ્યવસ્થાપક સમિતિની સામાન્ય ચૂંટણી માટેનું સત્તાવાર જાહેરનામું પ્રસિદ્ધ કરવામાં આવ્યું છે.

સુમુલ ડેરીનો ચૂંટણી કાર્યક્રમ જાહેર કરવામાં આવ્યો છે

Show Quick Read

Key points generated by AI, verified by newsroom

• સુમુલ ડેરીની વ્યવસ્થાપક સમિતિની ચૂંટણીનો કાર્યક્રમ જાહેર થયો.
• ઉમેદવારીપત્રો ૨૦ થી ૨૪ જૂન ભરાશે, ૧૫ જુલાઈએ મતદાન યોજાશે.
• ૧૭ જુલાઈએ મતગણતરી થશે અને તે જ દિવસે પરિણામ જાહેર થશે.

સુમુલ ડેરીનો ચૂંટણી કાર્યક્રમ જાહેર કરવામાં આવ્યો છે. સુમુલ ડેરીની વ્યવસ્થાપક સમિતિની સામાન્ય ચૂંટણી માટેનું સત્તાવાર જાહેરનામું પ્રસિદ્ધ કરવામાં આવ્યું છે. 20 જૂનથી 24 જૂન સુધી ઉમેદવારી પત્રો ભરવાની પ્રક્રિયા હાથ ધરાશે.ત્યારબાદ 27 જૂનના રોજ ઉમેદવારી પત્રોની ચકાસણી કરવામાં આવશે. ઉમેદવારીપત્રો પાછા ખેંચવા માટે 29 જૂનથી 4 જૂલાઈ સુધીનો સમય આપવામાં આવ્યો છે.

જે બાદ 6 જુલાઈના રોજ બપોરે 12:00 કલાકે હરીફ ઉમેદવારોની આખરી યાદી પ્રસિદ્ધ કરવામાં આવશે. આ પ્રતિષ્ઠિત ચૂંટણી માટે જ મતદાન જરૂરી બનશે તો તે 15 જૂલાઈને બુધવારના રોજ સવારે 9થી સાંજે ચાર દરમિયાન યોજાશે. સુરત અને તાપી જિલ્લાના વિવિધ 16 મતદાર વિભાગો માટે જુદા જુદા મતદાન મથકો નક્કી કરવામાં આવ્યા છે. મતદાન પૂર્ણ થયા બાદ 17 જૂલાઈના રોજ મતગણતરી હાથ ધરવામાં આવશે અને તે જ દિવસે ચૂંટણીનું પરિણામ પણ જાહેર કરવામાં આવશે. 

ચૂંટણી અધિકારી દ્વારા આ અંગેનું વિધિવત જાહેરનામું પ્રસિદ્ધ કરાતા જ સુરત અને તાપી જિલ્લાના રાજકારણમાં ગરમાવો આવી ગયો છે. જાહેર કરાયેલા સત્તાવાર કાર્યક્રમ અનુસાર, આગામી 15 જુલાઈના રોજ સુમુલ ડેરીના તમામ 16 મતદાર વિભાગો માટે મતદાન પ્રક્રિયા હાથ ધરવામાં આવશે. જ્યાં પશુપાલકો અને સહકારી મંડળીના પ્રતિનિધિઓ પોતાના મતાધિકારનો ઉપયોગ કરશે. દક્ષિણ ગુજરાતની આર્થિક કરોડરજ્જુ ગણાતી આ ડેરી પર વર્ચસ્વ જમાવવા માટે ભાજપ પ્રેરિત પેનલો અને અન્ય સહકારી નેતાઓ વચ્ચે કાંટાની ટક્કર થવાની પૂરેપૂરી સંભાવના છે. જાહેરનામું બહાર પડતાં જ અત્યારથી જ ઉમેદવારો નક્કી કરવાની પ્રક્રિયા શરૂ થઈ ગઈ છે. 

સુરત અને તાપી જિલ્લાના વિવિધ 16 મતદાર વિભાગો માટે જુદા જુદા મતદાન મથકો નક્કી કરવામાં આવ્યા છે.  જેમાં મુખ્યત્વે સુમુલડેરી (સુરત),  ટી.એચ.આર. પ્લાન્ટ (ચલથાણ), નવી પારડી ડેરી, એ.પી.એમ.સી. (માંડવી, ઉમરપાડા, કુકરમુંડા, ડોલવણ), વાંસકુઇ, સુરત ડીસ્ટ્રીક્ટ કો.ઓ.બેંક (માંગરોલ), સુરત જિલ્લા સહકારી સંઘ (બારડોલી),  ઉચ્છલ, નિઝર અને બાજીપુરા શીત કેન્દ્ર તથા વ્યારા અને સોનગઢ ખાતેના વિવિધ હોલ અને વિદ્યાલયોનો સમાવેશ થાય છે.  મતદાન પ્રક્રિયા પૂર્ણ થયા બાદ 17 જુલાઈને શુક્રવારના રોજ સવારે 11 કલાકે સુમુલ ડેરી, સુરત ખાતે આવેલા બેન્કવેટ હોલમાં મતગણતરી હાથ ધરવામાં આવશે અને ત્યારબાદ તરત જ પરિણામો જાહેર કરવામાં આવશે.