Greece: ગ્રીસ કોસ્ટ ગાર્ડના જહાજ સાથે ટકરાઈ પ્રવાસીઓની હોડી, 14 લોકોના મોત

ગ્રીસના પૂર્વીય એજિયન ટાપુ ચિયોસ નજીક એક સ્પીડબોટ અને ગ્રીસ કોસ્ટ ગાર્ડના જહાજ સાથે ટકરાતા ઓછામાં ઓછા 14 લોકો માર્યા ગયા હતા.

પ્રતિકાત્મક તસવીર

Source : PTI

ગ્રીસના પૂર્વીય એજિયન ટાપુ ચિયોસ નજીક એક સ્પીડબોટ અને ગ્રીસ કોસ્ટ ગાર્ડના જહાજ સાથે ટકરાતા ઓછામાં ઓછા 14 લોકો માર્યા ગયા હતા. ગ્રીક કોસ્ટ ગાર્ડે મંગળવારે અહેવાલ આપ્યો કે 24 લોકોને બચાવી લેવામાં આવ્યા છે અને તેમને હોસ્પિટલમાં લઈ જવામાં આવ્યા છે. કોસ્ટ ગાર્ડના બે અધિકારીઓ પણ ઘાયલ થયા છે. સ્પીડબોટમાં કેટલા લોકો હતા તે હજુ સુધી જાણી શકાયું નથી.

બચાવ કામગીરી હજુ પણ ચાલુ છે, જેમાં ચાર પેટ્રોલિંગ જહાજો, એક હેલિકોપ્ટર અને ડાઇવર્સ સાથેની એક ખાનગી બોટનો સમાવેશ થાય છે. સ્થાનિક મીડિયાએ જાહેર કરેલા વીડિયોમાં જોવા મળી રહ્યું છે કે ધાબળામાં લપેટાયેલા એક વ્યક્તિને કોસ્ટ ગાર્ડ બોટમાંથી એમ્બ્યુલન્સમાં લઈ જવામાં આવી રહ્યો છે અને બે બાળકોને પણ ત્યાં લઈ જવામાં આવ્યા છે. કોસ્ટ ગાર્ડે એમ પણ જણાવ્યું હતું કે અથડામણ કેવી રીતે થઈ અથવા મૃતકોની ઓળખ અંગે હજુ સુધી કોઈ માહિતી નથી.

અકસ્માત કેવી રીતે થયો?

કોસ્ટ ગાર્ડના અધિકારીઓના જણાવ્યા અનુસાર, આ ઘટના ત્યારે બની જ્યારે તેમણે ચિઓસ તરફ જતી એક શંકાસ્પદ બોટ જોઈ અને તેને પાછી વાળવાનો આદેશ આપ્યો હતો. અધિકારીઓનો દાવો છે કે દાણચોરોએ જાણી જોઈને બોટને કોસ્ટ ગાર્ડના જહાજ તરફ દોરી હતી, જેના કારણે ગંભીર અથડામણ થઈ હતી. જોકે, સ્વતંત્ર રીતે પુષ્ટી થઈ શકી નથી કે ટક્કરનું ચોક્કસ કારણ શું હતું. 

ગ્રીસ યુરોપિયન યુનિયનનો મુખ્ય પ્રવેશદ્વાર છે

ગ્રીસ યુરોપિયન યુનિયનનો મુખ્ય પ્રવેશદ્વાર છે, ખાસ કરીને યુદ્ધ અને ગરીબીથી ભાગી રહેલા લોકો માટે. આ માર્ગ પર સુરક્ષાના અભાવ અને તોફાની સમુદ્રને કારણે અકસ્માતો વારંવાર થાય છે. છેલ્લા કેટલાક વર્ષોમાં ગ્રીસ અને ઘણા EU દેશોએ સ્થળાંતર નિયમો કડક કર્યા છે. આમાં દેશનિકાલ ઝડપી બનાવવા અને અટકાયતમાં વધારો શામેલ છે. વધુમાં યુરોપિયન દેશોમાં સ્થળાંતર એક સતત ચર્ચાનો વિષય છે. કેટલાક દેશોમાં જમણેરી પક્ષોનો પ્રભાવ વધ્યો છે અને નિયમો વધુ કડક બન્યા છે. પરિણામે આશ્રય મેળવનારા લોકોની સંખ્યા હવે પહેલા જેવી રહી નથી.