તિબેટમાં ભૂકંપના જોરદાર ઝટકા, રિક્ટર સ્કેલ પર 7.0 તીવ્રતા નોંધાઈ
નેશનલ સેન્ટર ફોર સિસ્મોલોજી અનુસાર, તિબેટમાં ભારતીય સમય અનુસાર રાત્રે આશરે 8:03 વાગ્યે ભૂકંપના ઝટકા અનુભવાયા હતા.
- તિબેટમાં 7.0 તીવ્રતાનો ભૂકંપ આવ્યો.
- તાજેતરમાં નેપાળમાં ભૂકંપ, તિબેટમાં પૂર પણ આવ્યું.
- આ પ્રદેશમાં અગાઉ પણ અનેક મોટા ભૂકંપ આવ્યા.
ચીનના કબજા હેઠળના તિબેટ વિસ્તારમાં ગુરુવાર (22 ઑક્ટોબર)ના રોજ 7.0ની તીવ્રતાના ભૂકંપના ઝટકા અનુભવાયા હતા. નેશનલ સેન્ટર ફોર સિસ્મોલોજી અનુસાર, તિબેટમાં ભારતીય સમય અનુસાર રાત્રે આશરે 8:03 વાગ્યે ભૂકંપના ઝટકા અનુભવાયા હતા. ભૂકંપનું કેન્દ્ર 173 કિલોમીટરની ઊંડાઈએ હતું. ભૂકંપ બાદ હાલમાં જાનમાલના નુકસાન અંગેની સંપૂર્ણ માહિતી સામે આવી નથી.
આ પહેલાં 8 સપ્ટેમ્બરે ભારતના પાડોશી દેશ નેપાળમાં ભૂકંપ આવ્યો હતો. તિબેટ અને નેપાળની આસપાસનો વિસ્તાર ભૂકંપની દૃષ્ટિએ સંવેદનશીલ માનવામાં આવે છે. આ પહેલાં 26 ઑગસ્ટે નેપાળ-તિબેટ સરહદ નજીક બરફ અને ખડકો ખસવાને કારણે ભયાનક પૂર આવ્યું હતું. આ કુદરતી આફતમાં ઘરો, રસ્તાઓ અને પુલ તણાઈ ગયા હતા. આ દુર્ઘટનામાં અનેક લોકોનાં મોત થયાં હતાં, જ્યારે ઘણા લોકો લાપતા થયા હતા. ત્યારથી અસરગ્રસ્ત વિસ્તારોમાં રાહત અને બચાવ કામગીરી ચાલી રહી છે.
તિબેટમાં એક વર્ષ પહેલાં આવ્યો હતો 7ની તીવ્રતાનો ભૂકંપ
તિબેટમાં વર્ષ 2025માં રિક્ટર સ્કેલ પર આશરે 7ની તીવ્રતાનો ભૂકંપ આવ્યો હતો, જેમાં લગભગ 100 લોકોનાં મોત થયાં હતાં. આ ઉપરાંત, આશરે 1,000 ઘરોને નુકસાન થયું હતું. ભૂકંપનું કેન્દ્ર માઉન્ટ એવરેસ્ટથી લગભગ 75 કિલોમીટર ઉત્તર-પૂર્વમાં અને નેપાળની નજીક હતું. યુનાઇટેડ સ્ટેટ્સ જિયોલોજિકલ સર્વે અનુસાર, છેલ્લી એક સદી દરમિયાન આ વિસ્તારમાં 6 કે તેથી વધુની તીવ્રતાના ઓછામાં ઓછા 10 ભૂકંપ આવી ચૂક્યા છે.
તિબેટ વિસ્તારમાં ભૂકંપ કેમ આવે છે?
તિબેટ વિસ્તાર તેની ભૂકંપીય ગતિવિધિઓ માટે જાણીતો છે. તેનું મુખ્ય કારણ ભારતીય અને યુરેશિયન ટેક્ટોનિક પ્લેટો વચ્ચે થતી અથડામણ છે. આ જ અથડામણને કારણે હિમાલય પર્વતમાળાનું નિર્માણ થયું હતું. ઐતિહાસિક આંકડાઓ અનુસાર, આ વિસ્તારમાં અનેક વખત ભૂકંપીય ગતિવિધિઓ નોંધાઈ છે. આ કારણોસર તિબેટ અને તેની આસપાસનો વિસ્તાર ભૂકંપની દૃષ્ટિએ વિશ્વના સૌથી સક્રિય વિસ્તારોમાંનો એક માનવામાં આવે છે.
તિબેટ પહેલાથી જ દુર્ઘટનાનો સામનો કરી રહ્યું છે
26 ઓગસ્ટના રોજ, ગ્લેશિયર તૂટ્યા બાદ તિબેટમાં ભૂકંપ આવ્યો હતો અને ત્યારબાદ પૂર આવ્યું હતું. ચીનની સરહદે આવેલા આ વિસ્તારમાં વ્યાપક વિનાશ થયો છે.
જાન્યુઆરી 2025 માં પણ ભૂકંપે તબાહી મચાવી હતી
જાન્યુઆરી 2025 માં, તિબેટમાં એક શક્તિશાળી ભૂકંપ આવ્યો હતો. જેમાં 120 થી વધુ લોકો માર્યા ગયા હતા અને સેંકડો ઘાયલ થયા હતા. ચાઇના અર્થક્વેક નેટવર્ક્સ સેન્ટર (CENC) અનુસાર, સવારે 9:05 વાગ્યે આવેલા ભૂકંપની તીવ્રતા રિક્ટર સ્કેલ પર 6.8 હતી.
Before You Go
Gujarat Government: રાજ્યના ખેડૂતો માટે સરકારનો મહત્વનો નિર્ણય
ટોપ સ્ટોરી
ટ્રેન્ડિંગ સમાચાર
