'રશિયા-ચીન અમેરિકાથી ડરે છે': ઓઈલ ટેન્કર જપ્ત કર્યા બાદ ટ્રમ્પનો પુતિન અને જિનપિંગને પડકાર
અમેરિકી રાષ્ટ્રપતિએ એટલાન્ટિકમાં રશિયન જહાજ પકડ્યા બાદ નાટોના ફંડિંગ અને નોબેલ પ્રાઈઝ અંગે કર્યા ચોંકાવનારા દાવા.
Donald Trump Warning Russia China: વૈશ્વિક મહાસત્તાઓ વચ્ચે ચાલી રહેલી ખેંચતાણ વચ્ચે એક મોટી ઘટના બની છે. યુનાઇટેડ સ્ટેટ્સ (United States) દ્વારા એટલાન્ટિક મહાસાગરમાં રશિયન ધ્વજ ધરાવતું એક ઓઈલ ટેન્કર જપ્ત કરવામાં આવ્યું છે. યુએસ ગૃહ વિભાગે આ ઓપરેશનનો વીડિયો જાહેર કર્યા બાદ, અમેરિકી રાષ્ટ્રપતિ ડોનાલ્ડ ટ્રમ્પે (Donald Trump) આક્રમક વલણ અપનાવીને રશિયા અને ચીનને ખુલ્લી ચેતવણી આપી છે. ટ્રમ્પે રશિયન રાષ્ટ્રપતિ વ્લાદિમીર પુતિન (Vladimir Putin) અને ચીનના રાષ્ટ્રપતિ શી જિનપિંગ (Xi Jinping) ને સીધો પડકાર ફેંકતા કહ્યું છે કે આ બંને દેશો જો દુનિયામાં કોઈનાથી ડરતા હોય, તો તે માત્ર અમેરિકા છે. ટ્રમ્પે દાવો કર્યો કે તેમણે પોતાના પ્રથમ કાર્યકાળ દરમિયાન અમેરિકન સેનાને એટલી મજબૂત બનાવી દીધી છે કે દુશ્મન દેશો હવે અમેરિકા સામે આંખ ઉંચી કરતા પણ વિચારે છે. તેમણે યુક્રેન મુદ્દે પણ મોટું નિવેદન આપતા કહ્યું કે જો તેમણે સમયસર હસ્તક્ષેપ ન કર્યો હોત, તો આજે રશિયાએ આખા યુક્રેન પર કબજો જમાવી લીધો હોત. ટ્રમ્પના મતે, રશિયા અને ચીન જે દેશથી ભય અનુભવે છે તે 'ડોનાલ્ડ ટ્રમ્પ દ્વારા નિર્મિત નવું અમેરિકા' છે.
આ તણાવપૂર્ણ માહોલ વચ્ચે ટ્રમ્પે નાટો (NATO) દેશોની ઝાટકણી કાઢતા ફંડિંગનો મુદ્દો પણ ઉછાળ્યો હતો. તેમણે સ્પષ્ટ શબ્દોમાં કહ્યું કે નાટોના મોટા દેશોએ યાદ રાખવું જોઈએ કે ભૂતકાળમાં તેઓ પોતાની જીડીપી (GDP) ના 2 ટકા પણ સુરક્ષા માટે ચૂકવતા નહોતા. તે સમયે હું રાષ્ટ્રપતિ બન્યો ત્યાં સુધી અમેરિકા મૂર્ખતાપૂર્વક તેમના વતી નાણાં ચૂકવતું હતું. ટ્રમ્પે પોતાની ઉપલબ્ધિ ગણાવતા કહ્યું કે મેં માનપૂર્વક આ દેશોને જીડીપીના 5 ટકા સુધી ફંડિંગ આપવા મજબૂર કર્યા અને હવે તેઓ તરત જ ચૂકવણી કરી રહ્યા છે. જોકે, તેમણે ભવિષ્યની ચિંતા વ્યક્ત કરતા કહ્યું કે ભલે અમે નાટોને મદદ કરીએ, પરંતુ મને શંકા છે કે જ્યારે અમેરિકાને જરૂર પડશે ત્યારે નાટો આપણી પડખે ઊભું રહેશે કે કેમ? કારણ કે મારા મિત્ર હોવા છતાં, અમેરિકાના પીઠબળ વિના નાટોનો રશિયા કે ચીન સામે કોઈ ડર નથી.
પોતાના સંબોધનના અંતે ડોનાલ્ડ ટ્રમ્પે ફરી એકવાર નોબેલ શાંતિ પુરસ્કાર (Nobel Peace Prize) ન મળવા બદલ પોતાનું દુઃખ વ્યક્ત કર્યું હતું. તેમણે કહ્યું કે મેં એકલા હાથે દુનિયામાં ચાલી રહેલા 8 યુદ્ધોનો અંત આણ્યો છે અને લાખો નિર્દોષ લોકોના જીવ બચાવ્યા છે. આમ છતાં, નાટોના સભ્ય દેશ નોર્વેએ મને શાંતિ પુરસ્કાર આપ્યો નથી, જે અન્યાયી છે. ટ્રમ્પે ભારપૂર્વક કહ્યું કે નાટો અમેરિકાને સમર્થન આપે કે ન આપે, અમે હંમેશા તૈયાર છીએ, પરંતુ રશિયા અને ચીનને રોકવા માટે માત્ર ટ્રમ્પનું અમેરિકા જ સક્ષમ છે.
ટોપ સ્ટોરી
ટ્રેન્ડિંગ સમાચાર
