'તરત જ યુદ્ધવિરામ કરો', અમેરિકાએ રશિયાની બે સૌથી મોટી ઓઈલ કંપનીઓ પર લગાવ્યો પ્રતિબંધ
રાષ્ટ્રપતિ ડોનાલ્ડ ટ્રમ્પે વ્લાદિમીર પુતિન સાથેની તેમની મુલાકાત મુલતવી રાખ્યા બાદ અમેરિકાએ રશિયા સામે કડક પગલાં લીધા છે
રાષ્ટ્રપતિ ડોનાલ્ડ ટ્રમ્પે વ્લાદિમીર પુતિન સાથેની તેમની મુલાકાત મુલતવી રાખ્યા બાદ અમેરિકાએ રશિયા સામે કડક પગલાં લીધા છે. બુધવાર, 22 ઓક્ટોબરના રોજ અમેરિકાએ રશિયાની બે સૌથી મોટી તેલ કંપનીઓ પર પ્રતિબંધોની જાહેરાત કરી જેથી મોસ્કો પર તાત્કાલિક યુદ્ધવિરામ માટે સંમત થવા માટે દબાણ કરી શકાય. એક દિવસ પહેલા અમેરિકન રાષ્ટ્રપતિએ પુતિન સાથેની તેમની સંભવિત મુલાકાત રદ કરવાની પુષ્ટી કરતા કહ્યું કે તેઓ નિરર્થક મુલાકાત ઇચ્છતા નથી. પુતિને અગાઉ તાત્કાલિક યુદ્ધવિરામની ટ્રમ્પની માંગણીને નકારી કાઢી હતી. અમેરિકાના ટ્રેઝરી સેક્રેટરી સ્કોટ બેસન્ટે નવા પ્રતિબંધોની જાહેરાત કરી હતી.
સોશિયલ મીડિયા પ્લેટફોર્મ X પર એક પોસ્ટમાં બેસન્ટે કહ્યું હતું કે, " હવે સમય આવી ગયો છે કે હત્યા રોકવામાં આવે અને તાત્કાલિક યુદ્ધવિરામ કરવામાં આવે. રાષ્ટ્રપતિ પુતિનના આ અર્થહીન યુદ્ધને સમાપ્ત કરવાનો ઇનકારને ધ્યાનમાં રાખીને ટ્રેઝરી વિભાગ રશિયાની બે સૌથી મોટી તેલ કંપનીઓ પર પ્રતિબંધો લાદી રહ્યું છે, જે ક્રેમલિનના યુદ્ધ મશીનને ભંડોળ પૂરું પાડે છે." તેમાં વધુમાં કહેવામાં આવ્યું છે, "ટ્રેઝરી વિભાગ રાષ્ટ્રપતિ ટ્રમ્પના બીજા યુદ્ધને સમાપ્ત કરવાના પ્રયાસોને સમર્થન આપવા માટે જો જરૂરી હોય તો વધુ પગલાં લેવા તૈયાર છે. અમે અમારા સાથીઓને અમારી સાથે જોડાવા અને આ પ્રતિબંધોનું પાલન કરવા માટે પ્રોત્સાહિત કરીએ છીએ."
ટ્રમ્પે પ્રતિબંધો વિશે શું કહ્યું?
તાજેતરના પગલા પર પ્રતિક્રિયા આપતા અમેરિકાના રાષ્ટ્રપતિ ડોનાલ્ડ ટ્રમ્પે કહ્યું હતું કે તેમને આશા છે કે પ્રતિબંધો ટૂંકા ગાળાના રહેશે. AFP એ ટ્રમ્પને ટાંકીને કહ્યું હતું કે, "આ ખૂબ જ કડક પ્રતિબંધો છે અને અમને આશા છે કે તે લાંબા સમય સુધી ટકશે નહીં. અમને આશા છે કે યુદ્ધનો ઉકેલ આવશે." પોતાના બીજા કાર્યકાળ માટે પદ સંભાળ્યા પછી ડોનાલ્ડ ટ્રમ્પ રશિયા અને યુક્રેન વચ્ચે યુદ્ધવિરામ સુનિશ્ચિત કરવા માટે કામ કરી રહ્યા છે. તેમના પ્રયાસો છતાં કોઈ નોંધપાત્ર પ્રગતિ થઈ નથી.
ટ્રમ્પે વધુમાં કહ્યું હતું કે, "જ્યારે પણ હું વ્લાદિમીર સાથે વાત કરું છું, ત્યારે અમારી સારી વાતચીત થાય છે અને પછી તેઓ કોઈ નિષ્કર્ષ પર પહોંચતા નથી." દરમિયાન, યુએસ ટ્રેઝરી સેક્રેટરીએ નવી કાર્યવાહી અંગે સ્પષ્ટતા કરતા કહ્યું કે આ પ્રતિબંધો છે, ગૌણ ટેરિફ નહીં. ફોક્સ બિઝનેસ સાથે વાત કરતા બેસન્ટે જણાવ્યું હતું કે આ કાર્યવાહી રશિયન ફેડરેશન સામે અમે લાદેલા સૌથી મોટા પ્રતિબંધોમાંની એક હશે. તેમણે ઉમેર્યું, "આ પ્રતિબંધો છે, ગૌણ ટેરિફ નહીં." જોકે, તેમણે પ્રતિબંધો વિશે વિગતવાર માહિતી આપી ન હતી.
ટોપ સ્ટોરી
ટ્રેન્ડિંગ સમાચાર
