આધાર નંબર વગર તત્કાલ ટિકિટ બુક નહીં થાય, જાણો લોગઈન કરવાની સંપૂર્ણ પ્રોસેસ

રેલવેનો નવો નિયમ ૧ જુલાઈથી લાગુ, IRCTC એકાઉન્ટ સાથે આધાર લિંક કરવાની સંપૂર્ણ પ્રક્રિયા જાણો.

અમદાવાદ: ટ્રેનમાં મુસાફરી કરતા કરોડો ભારતીયો માટે રેલવે દ્વારા એક મહત્વપૂર્ણ નિયમ બદલવામાં આવ્યો છે. હવે તત્કાલ ટિકિટ બુકિંગ માટે આધાર પ્રમાણીકરણ ફરજિયાત કરવામાં આવ્યું છે. એટલે કે, આગામી ૧ જુલાઈથી જો તમારું આધાર કાર્ડ તમારા IRCTC એકાઉન્ટ સાથે ચકાસાયેલું નહીં હોય, તો તમે તત્કાલ બુકિંગ સુવિધાનો લાભ લઈ શકશો નહીં.

રેલવે દ્વારા આ નિયમનો અમલ તત્કાલ ટિકિટ બુકિંગ પ્રક્રિયાને વધુ પારદર્શક બનાવવા અને અયોગ્ય બુકિંગ અટકાવવા માટે કરવામાં આવ્યો છે. ઘણા લોકો કન્ફર્મ સીટ ન મળતા તત્કાલ બુકિંગનો વિકલ્પ અપનાવે છે, અને આ નવા નિયમથી આ પ્રક્રિયા વધુ સુરક્ષિત બનશે.

IRCTC એકાઉન્ટ સાથે આધાર કેવી રીતે લિંક કરવું? જો તમે હજુ સુધી તમારા IRCTC એકાઉન્ટ સાથે આધાર લિંક નથી કર્યો, તો નીચે આપેલા સરળ સ્ટેપ્સ ફોલો કરીને તમે તે કરી શકો છો:

૧. IRCTC વેબસાઇટ/એપ ખોલો: સૌ પ્રથમ, તમારે IRCTC ની સત્તાવાર વેબસાઇટ www.irctc.co.in પર જવું પડશે અથવા IRCTC રેલ કનેક્ટ એપ ખોલવી પડશે. ૨. લોગિન કરો: આ પછી, તમારે તમારું યુઝરનેમ, પાસવર્ડ અને કેપ્ચા કોડ દાખલ કરીને લોગિન કરવું પડશે. ૩. માય પ્રોફાઇલ વિભાગમાં જાઓ: લોગિન કર્યા પછી, તમારે માય પ્રોફાઇલ (My Profile) વિભાગમાં જવું પડશે.

૪. આધાર KYC પર ક્લિક કરો: માય પ્રોફાઇલમાં તમને આધાર KYC નો વિકલ્પ મળશે, તેના પર ક્લિક કરો. ૫. આધાર નંબર દાખલ કરો અને OTP થી વેરિફાય કરો: અહીં તમારે તમારો આધાર કાર્ડ નંબર દાખલ કરવો પડશે અને તેને તમારા રજિસ્ટર્ડ મોબાઇલ નંબર પર આવતા OTP (વન ટાઈમ પાસવર્ડ) વડે વેરિફિકેશન કરવું પડશે.

આ પ્રક્રિયા પૂર્ણ થયા પછી, તમારું આધાર IRCTC એકાઉન્ટ સાથે સફળતાપૂર્વક લિંક થઈ જશે અને તમે ૧ જુલાઈથી તત્કાલ બુકિંગની સુવિધાનો લાભ લઈ શકશો. યાદ રાખો, આધાર વેરિફાઇડ IRCTC એકાઉન્ટ વિના તત્કાલ બુકિંગ શક્ય બનશે નહીં.