ટ્રેનમાં ભીડના કારણે રિઝર્વ સીટ પર પણ ના બેસવા મળે તો શું તમને વળતર મળશે?

હોળી અને દિવાળી જેવા તહેવારો દરમિયાન ટ્રેનોમાં સીટ શોધવી મુશ્કેલ બની જાય છે. આ મહિને રક્ષાબંધન ઉજવવામાં આવશે અને ટ્રેનો અને બસોમાં પણ ભીડ હોય છે. મુસાફરો ટ્રેન મુસાફરી માટે અગાઉથી ટિકિટ બુક કરાવે છે.

હોળી અને દિવાળી જેવા તહેવારો દરમિયાન ટ્રેનોમાં સીટ શોધવી મુશ્કેલ બની જાય છે

હોળી અને દિવાળી જેવા તહેવારો દરમિયાન ટ્રેનોમાં સીટ શોધવી મુશ્કેલ બની જાય છે. આ મહિને રક્ષાબંધન ઉજવવામાં આવશે અને ટ્રેનો અને બસોમાં પણ ભીડ હોય છે. મુસાફરો ટ્રેન મુસાફરી માટે અગાઉથી ટિકિટ બુક કરાવે છે. જો કે, ક્યારેક જ્યારે ટ્રેનના ડબ્બા ભરેલા હોય છે, ત્યારે મુસાફરોને તેમની રિઝર્વ સીટો સુધી પહોંચવામાં મુશ્કેલીનો સામનો કરવો પડે છે. અનેકવાર એ મુસાફરોને કન્ફર્મ ટિકિટ હોવા છતાં ઉભા ઉભા મુસાફરી કરવી પડે છે. શું રેલવે આવા કિસ્સાઓમાં વળતર આપે છે?

જ્યારે કોઈ મુસાફર ટ્રેન ટિકિટ બુક કરાવે છે અને તેમની સીટ કન્ફર્મ થાય છે ત્યારે તેઓ આરામદાયક મુસાફરીની આશા રાખીને રાહતનો શ્વાસ લે છે. જો કે, જ્યારે તેઓ ટ્રેનમાં ચઢે છે, ત્યારે તેઓ ભીડને કારણે તેમની રિઝર્વ સીટ સુધી પહોંચી શકતા નથી. ટિકિટ વિનાના મુસાફરો રિઝર્વ ડબ્બામાં ન ચઢે તે સુનિશ્ચિત કરવું રેલવેનું પ્રાથમિક કર્તવ્ય છે. જો, ભીડને કારણે કોઈ વ્યક્તિ તેમની રિઝર્વ સીટમાં મુસાફરી કરી શકતી નથી, તો રેલવેને વળતર આપવાની જરૂર પડી શકે છે. કારણ કે આ સેવામાં ખામી માનવામાં આવશે.

એવા ઘણા કિસ્સાઓ બન્યા છે જ્યાં ગ્રાહક અદાલતોએ મુસાફરોને આવી મુશ્કેલીઓ માટે વળતર આપ્યું છે. પાર્થસારથી (પિતા), નિર્મલા કેટી (માતા) અને આદિત્ય ટીપી (પુત્ર) એ 10 ડિસેમ્બર, 2023ના રોજ કન્યાકુમારી-પુણે એક્સપ્રેસમાં તિરુપતિ જવા માટે ટ્રેન નંબર 16382માં સ્લીપર ટિકિટ બુક કરાવી હતી. તેમની સીટો કન્ફર્મ થઈ ગઈ હતી. જ્યારે આદિત્યના માતા-પિતા ટ્રેનમાં ચઢ્યા ત્યારે તેમને પોતાની સીટો પર બેસવા દેવામાં આવ્યા ન હતા. રિઝર્વ ટિકિટ વિના ડબ્બામાં ઘણા મુસાફરોએ સીટો પર કબજો જમાવી લીધો હતો.

શરૂઆતમાં મુસાફરોને વિનંતી કરવામાં આવી અને ઝપાઝપી થઈ પરંતુ તેઓએ તેમ છતાં તેમને તેમની સીટો પર જવા દેવાનો ઇનકાર કર્યો. ટ્રેન સ્ટાફ અને રેલ એપમાં ફરિયાદ નોંધાવવામાં આવી. બાદમાં વૃદ્ધ દંપતીને તેમની સીટો મળી ગઈ પરંતુ તેમના દીકરાને સીટ મળી નહોતી. જોકે, જેમ જેમ મુસાફરી આગળ વધતી ગઈ તેમ તેમ આરક્ષિત ડબ્બામાં ભીડ વધતી ગઈ. ઘણા મુસાફરો રિઝર્વ બર્થ નીચે સૂઈ ગયા. ડબ્બો ભીડથી ભરાઈ ગયો, જેના કારણે વૃદ્ધ દંપતી બાથરૂમમાં પણ જઈ શક્યા નહીં.

આદિત્ય ટીપીએ વારંવાર રેલ મદદ એપ અને આરપીએફ ટીમોની મદદ માંગી. તેમને સહાયનું વચન મળ્યું પરંતુ તેમની સમસ્યાનો ઉકેલ આવ્યો નહીં. 30 નવેમ્બર, 2024ના રોજ પરિવાર ગ્રાહક અદાલતમાં ગયો. પલક્કડ જિલ્લા ગ્રાહક અદાલતે ૩ ફેબ્રુઆરી, 2026ના રોજ પરિવારની તરફેણમાં ચુકાદો આપ્યો, જેમાં રેલવેને પીડિતને 50,000 વળતર ચૂકવવાનો આદેશ આપ્યો.

ટ્રેનોમાં બેઠક અંગે ઘર્ષણ સામાન્ય છે. જો કે, જો તમારી પાસે રિઝર્વ છે પરંતુ તેમ છતાં તમને તેના પર બેસવા દેવામાં આવી રહ્યા નથી તો પહેલું પગલું એ છે કે ટ્રેન સ્ટાફ અથવા TTE નો સંપર્ક કરો અને સીટ માટે વિનંતી કરો. જો સમસ્યાનો ઉકેલ ન આવે તો તમે રેલ મદદ એપ પર ફરિયાદ નોંધાવી શકો છો. તમારે તમારો ફરિયાદ નંબર નોંધવો જોઈએ અને પુરાવા તરીકે ફોટા અને વીડિયો પણ લેવા જોઈએ. જો તમારી સમસ્યાનું સમાધાન ન થાય અને તમારી મુસાફરી પૂર્ણ થઈ જાય તો તમે રેલવે પાસેથી વળતરની માંગ કરી શકો છો. તમે તમારો ફરિયાદ નંબર, ફોટા, વીડિયો અને અન્ય પુરાવા આપીને ગ્રાહક અદાલતમાં તમારો કેસ રજૂ કરી શકો છો. જો રેલવે તરફથી બેદરકારી કે સેવામાં ખામી જોવા મળશે તો રેલવેને વળતર આપવું પડશે.