બ્લાઇન્ડ વર્લ્ડ કપઃ દીપકની 179 રનની ઇનિંગથી ભારતે શ્રીલંકાને 5 વિકેટે હરાવ્યું

દુબઇઃ ભારતે બ્લાઇન્ડ વર્લ્ડ કપમાં પોતાની પહેલી જીત મેળવી લીધી છે. ભારતે હરિયાણાના દીપક મલિકની 103 બૉલમાં રમેલી અનણમ 179 રનની ઇનિંગની મદદથી શ્રીલંકાને પાંચ વિકેટથી હાર આપી છે. આ જીત સાથે ભારતે પાંચમાં વન-ડે બ્લાઇન્ડ વર્લ્ડ કપમાં પોતાની પહેલી જીત નોંધાવી છે.

આ જીત બાદ હવે ભારતના વર્લ્ડ કપમાં ચાર પૉઇન્ટ થઇ ગયા છે. પૉઇન્ટ ટેબલમાં પાકિસ્તાન અત્યારે 6 પૉઇન્ટ સાથે નંબર વનની પૉઝિશનમાં છે. શ્રીલંકા અને બાંગ્લાદેશના ત્રણ-ત્રણ પૉઇન્ટ છે જ્યારે ઓસ્ટ્રેલિયાનો એક પૉઇન્ટ છે. નેપાલે હજુ સુધી પોતાનું ખાતું ખોલ્યુ નથી.

ભારતે ટૉસ જીતીને બૉલિંગ પસંદ કરી હતી, શ્રીલંકાએ મેચમાં 40 ઓવરોમાં આઠ વિકેટ ગુમાવીને 358 રનનો સ્કૉર કર્યો હતો. જ્યારે ટાર્ગેટનો પીછો કરવા ઉતરેલી ભારતીય ટીમે માત્ર 32 ઓવરમાં ચાર વિકેટના નુકશાન સાથે ટાર્ગેટને એચિવ કરી મેચ જીતી લીધી હતી. ભારત તરફથી દીપક મલિક 179 (103 બૉલ) રન ઉપરાંત પ્રકાશ જયરમૈયાએ 51 બૉલમાં 76 રન ફટકાર્યા હતા.