દક્ષિણ આફ્રિકા સામે ભારતની 6 વિકેટે હાર, શ્રેણી 1-1થી સરભર કરી

સેન્ચુરિયનઃ સુકાની જેપી ડ્યુમિની તથા ક્લાસેને નોંધાવેલી આક્રમક અડધી સદીની મદદથી સાઉથ આફ્રિકાએ અહીં રમાયેલી બીજી ટ્વેન્ટી20 ક્રિકેટ મેચમાં ભારતને છ વિકેટે હરાવીને ત્રણ મેચની શ્રેણીને 1-1થી સરભર કરી હતી. ભારતના ચાર વિકેટે 188 રનના જવાબમાં ટોસ જીતીને પ્રથમ ફિલ્ડિંગ કરનાર યજમાન ટીમે 18.4 ઓવરમાં 4 વિકેટે 189 રન બનાવીને વિજય હાંસલ કરી લીધો હતો.

સુપરસ્પોર્ટ પાર્ક ખાતે ત્રણ મેચની T-20 શ્રેણીની બીજી T-20માં ટોસ હાર્યા બાદ પ્રથમ બેટિંગ કરવા ઉતરેલી ભારતીય ટીમે 16 ઓવરના અંતે 4 વિકેટ ગુમાવી 188 રન બનાવી સાઉથ આફ્રિકાને 189 રનનો લક્ષ્યાંક આપ્યો હતો. મનીષ પાંડેએ 3 છગ્ગા અને 4 ચોગ્ગા સાથે આક્રમક બેટિંગ કરતા 48 બોલમાં 79 રન બનાવ્યા હતા. જ્યારે ધોનીએ પણ 3 છગ્ગા અને 4 ચોગ્ગા સાથે અડધી સદી(52) ફટકારી અણનમ રહ્યો હતો. સુરેશ રૈના 32, શિખર ધવન 24, વિરાટ કોહલી 1 અને રોહિત શર્મા 0 રન બનાવી આઉટ થયા હતા.

લક્ષ્યાંક ચેઝ કરનાર સાઉથ આફ્રિકન ટીમે 38 રનના સ્કોરે ઓપનર હેન્ડ્રિક્સ (26) તથા સ્મટ્સની (2) વિકેટ ગુમાવી દીધી હતી. ત્યારબાદ ડ્યુમિની તથા ક્લાસેને ત્રીજી વિકેટ માટે 93 રનની ભાગીદારી નોંધાવીને ટીમને વિજય તરફ દોરી હતી. ડ્યુમિનીએ 40 બોલમાં 64 તથા ક્લાસેને 30 બોલમાં 69 રન નોંધાવ્યા હતા. બેરાર્ડિને 10 બોલમાં 16 રન બનાવ્યા હતા. લેગ સ્પિનર ચહલ ખર્ચાળ સાબિત થયો હતો અને તેણે ચાર ઓવરમાં 64 રન આપી દીધા હતા.